JAJI KIONGOZI AMWAPISHA NAIBU MSAJILI MPYA

• Amtaka kuzingatia weledi, uwajibikaji

Na FAUSTINE KAPAMA-Mahakama, Dar es Salaam

Jaji Kiongozi wa Mahakama Kuu ya Tanzania, Mhe. Dkt. Mustapher Mohamed Siyani jana tarehe 12 Desemba, 2024 alimwapisha Mhe. John Chacha kuwa Naibu Msajili wa Mahakama Kuu ya Tanzania.

Hafla hiyo fupi ya uapisho ilifanyika katika Ofisi ya Jaji Kiongozi iliyopo kwenye jengo la Mahakama Kuu “Mwembeni” jijini Dar es Salaam na kuhudhuriwa na Viongozi kadhaa wa Mahakama, wakiwemo Majaji wa Mahakama Kuu ya Tanzania, Mhe. Salma Maghimbi na Mhe. Dkt. Angelo Rumisha.

Akizungumza baada ya uapisho huo, Jaji Kiongozi alimweleza Naibu Msajili mpya kuwa nafasi aliyoipata siyo upendeleao bali inatokana na kufanya kazi vizuri kwenye maeneo aliyokuwa anayahudumia.

Alimtaka kuzingatia weledi, uadilifu na uwajibika anapotekeleza majukumu yake mapya kama salamu ya Mahakama ya Tanzania inavyoeleza na kwamba hatakiwi kubweteka.

“Nafasi uliyoipata siyo upendeleao, bali inatokana na kazi nzuri unayoifanya. Usibweteke, endelea kufanya kazi. Ishi kiapo chako na kumbuka yanayoelezwa kwenye salamu ya Mahakama, yaani weledi, uadilifu na uwajibikaji, haya yatakusaidia katika kazi zako,” Mhe. Dkt. Siyani alisema.

Naye Jaji Kiongozi mstaafu wa Mahakama Kuu ya Tanzania, Mhe. Fakih Jundu, akizungumza katika hafla hiyo, alimkumbusha Naibu Msajili mpya kuwa kazi aliyopewa ni muhimu ndani ya Mahakama kwani Naibu Msajili ndiyo kiungo kati ya Mahakama na Wananchi.

“Kwa hiyo, unatakiwa kusimama imara kuiunguanisha Mahakama na Wananchi. Wewe ni kiungo muhimu kwenye maeneo mengi, kuhakikisha mashauri hayakwami na kuwa na mipango mizuri itakayosaidia mashauri kusikilizwa kwa haraka,” Mhe. Jundu alisema.

Alimhimiza Naibu Msajili mpya kutokuwa na upendeleo kwa mtu yoyote na kujiepusha na vishawishi ambavyo vinaweza kusababisha kuharibu kazi na kuifanya Mahakama kuwa na sifa mbaya.

“Zingatia sana maadili ya kazi yako ili usipate matatizo yatakayokupeleka sehemu mbaya. Usifanye watu wasikufikie na tumia lugha ya kiungwana. Matatizo na malalamiko ya watu yafanyie kazi na kupatia ufumbusi kwa haraka,” alisema.

Viongozi wengine waliohudhuria hafla hiyo ni Mtendaji Mkuu wa Mahakama ya Tanzania, Prof. Elisante Ole Gabriel, Msajili Mkuu wa Mahakama ya Tanzania, Mhe. Eva Nkya, Msajili wa Mahakama Kuu ya Tanzania, Mhe. Chiganga Tengwa, Naibu Msajili Mwandamizi wa Mahakama Kuu, Mhe. Sundi Fimbo na wengine.

Jaji Kiongozi wa Mahakama Kuu ya Tanzania, Mhe. Dkt. Mustapher Mohamed Siyani (kulia) akimwapisha Mhe. John Chacha kuwa Naibu Msajili wa Mahakama Kuu ya Tanzania. Picha chini akimkabidhi kiapo baada ya kuweka sahihi.

Jaji Kiongozi wa Mahakama Kuu ya Tanzania, Mhe. Dkt. Mustapher Mohamed Siyani akizungumza baada ya uapisho huo.

Jaji Kiongozi msaafu wa Mahakama Kuu ya Tanzania, Mhe. Fakih Jundu akizungumza katika hafla hiyo.

Jaji Kiongozi wa Mahakama Kuu ya Tanzania, Mhe. Dkt. Mustapher Mohamed Siyani (kulia) akiwa katika picha ya pamoja na Naibu Msajili, Mhe. John Chacha. Picha chini wakiwa na Jaji Kiongozi mstaafu, Mhe. Fakih Jundu.

Naibu Msajili, Mhe. John Chacha akiwa katika picha ya pamoja na Majaji wa Mahakama Kuu ya Tanzania. Picha chini akiwa na Viongozi waandamizi wa Mahakama.

Naibu Msajili, Mhe. John Chacha (kushoto) akiwa katika picha ya pamoja na  Viongozi kutoka Kitengo cha Maboresho cha Mahakama ya Tanzania. Picha mbili chini akiwa na Viongozi wengine waandamizi wa Mahakama.