KAULI MBIU WIKI, SIKU YA SHERIA: NAFASI YA TAASISI KATIKA UTOAJI HAKI

Na NAOMI KITONKA-Kituo Jumuishi cha Masuala ya Familia, Temeke

Kuelekea Wiki na Siku ya Sheria nchini, Jaji Mkuu wa Tanzania, Mhe. Prof. Ibrahimu Hamis Juma leo tarehe 14 January 2025 ametangaza Kauli Mbiu itakayojadiliwa kwenye maadhimisho hayo katika mkutano wa Waandishi wa Habari uliofanyika katika ukumbi wa Mikutano wa Kituo Jumuishi cha Masuala ya Familia Temeke.

Kauli hiyo iliyotolewa na Jaji Mkuu ambayo inalenga kuelezea nafasi ya Taasisi mbalimbali katika utoaji haki inasema, “Tanzania 2050: Nafasi ya Taasisi Zinazosimamia Haki Madai katika Kufikia Malengo Makuu ya Dira ya Taifa ya Maendeleo.”

Akizungumza katika mkutano huo, Jaji Mkuu alisema, “Kauli mbiu hii inatusaidia kutumia mkakati na ufanyaji wa maboresho ya Mahakama hasa tunapoiendea dira mpya ya matumaini ya mafanikio 2050 ya uchumi wa kiwango cha kati ngazi ya juu.  Kama Mahakama tumejipanga kufanikisha mpango huo na tutakuwa na mjadala mpana wa kujiangalia kama Taasisi kwa sababu tumekuwa ni mmoja wa watekelezaji wakubwa wa Dira ya Maendeleo ya Taifa ya mwaka 2025…

“…kila Taasisi ya umma inapaswa kujua dhana ya haki ya madai sio tu suala la mahakamani ila kuanzia kwao na kila mahali,hatuwezi kukwepa wajibu wetu wa mageuzi makubwa ya kitaasisi na pia kujua umuhimu wa kutafuta wataalamu wa mabadiliko na maboresho katika Taasisi kuendea kasi ya maendeleo ya dira yetu,” aliongeza Jaji Mkuu.

Kauli mbiu hiyo pia ina lengo la kuzitahadhari Taasisi zinazosimamia haki-madai kuhusu umuhimu wa kufanya matayarisho ya hayo mabadiliko makubwa ili yawezeshe na kuepuka kuwa vikwazo kwa Tanzania kuwa Taifa lenye maendeleo yanayolingana na Nchi zenye uchumi wa kipato cha kati ngazi ya juu.

Katika mkutano huo Jaji Mkuu aliongozana na Jaji Kiongozi wa Mahakama Kuu ya Tanzania, Mhe. Dkt. Mustapher Mohamed Siyani, Kaimu Jaji Mfawidhi wa Kituo Jumuishi cha Masuala ya Familia Temeke, Mhe. Sharmillah Sarwatt na Msajili Mkuu wa Mahakama ya Tanzania, Mhe. Eva Kiaki Nkya, Naibu Msajili, Mhe. Evodia Kyaruzi, Mtendaji wa Mahakama ya Kituo Jumuishi Temeke, Bwana Samson Mashalla,Hakimu Mfawidhi wa Mahakama ya Watoto, Mhe. Mwamini Kazema, Mahakimu kutoka Mahakama ya Mwanzo na Mahakama ya Wilaya pamoja na watumishi wa kada mbalimbali kituoni hapo. 

Jaji Mkuu wa Tanzania, Mhe. Prof. Ibrahimu Hamis Juma akifafanua kwa Waandishi wa Habari leo tarehe 14 January 2025  kuhusu Kauli Mbiu ya Wiki na Siku ya Sheria kwa mwaka 2025.

Jaji Mkuu wa Tanzania, Mhe. Prof. Ibrahimu Hamis Juma akizungumza na Waandishi wa Habari kuelekea Wiki na Siku ya Sheria kwa mwaka  2025. Kushoto ni Jaji Kiongozi wa Mahakama Kuu ya Tanzania, Mhe. Dkt. Mustapher Mohamed Siyani na kulia ni Kaimu Jaji Mfawidhi Kituo Jumuishi cha Masuala ya Familia Temeke, Mhe. Sharmillah Sarwatt. 

Sehemu ya Waandishi wa Habari na Viongozi wa Mahakama wakimisikiliza Jaji Mkuu wa Tanzania, Mhe. Prof. Ibrahimu Hamis Juma (hayupo kwenye picha).

 (Habari hii imehaririwa na FAUSTINE KAPAMA-Mahakama, Dar es Salaam)