JAJI KIONGOZI ATUNUKIWA SHAHADA YA UZAMIVU

Na Innocent Kansha, Arapha Rusheke –Mahakama, Dodoma

Jaji kiongozi wa Mahakama Kuu ya Tanzania Mhe. Dkt. Mustapher Mohamed Siyani leo tarehe 6 Disemba, 2024 ametunukiwa Shahada ya Uzamivu katika Chuo Kikuu cha Dodoma maarufu kama (UDOM) ambapo mahafali hayo yamefanyika kwenye Ukumbi wa mikutano Chimwaga jijini Dodoma.

Akizungumza mara baada ya kutunukiwa Shahada hiyo ya Uzamivu Mhe. Dkt. Siyani amesema kama Muhitimu wa shahada ya Uzamivu ya chuo Kikuu cha Dodoma alijiunga Chuoni hapo miaka mitatu iliyopita na amefanikiwa kuhitimu safari yake ya Shahada ya Uzamivu (PhD) kwa miaka mitatu ambacho ni kipindi cha chini kabisa kama ambavyo taratibu za chuo zilivyowekwa.

“Ni siku ya furaha kwangu kuona kwamba nimefikia tamati ya safari ya shahada yangu ya uzamivu kwa mafanikio pamoja na furaha hii niliyonayo ningependa kuzungumza mambo machache kwa watanzania na wengine ambao wanafutailia. Safari ya masomo ya shahada ya uzamivu ni safari ambayo mimi ningetamani kila mtanzania mwenye nafasi aifanye kwa maana inatoa fursa ya kujikita na kuwa mbobevu katika maeneo mbalimbali ambayo mtu atachagua na kwa hivyo kumpa mtu nafasi ya kuweza kuchangia Maendeleo ya Taifa letu,” amesema Dkt. Siyani.

 Mhe. Dkt. Siyani ameongeza kuwa, Chuo hicho kinatoa fursa ya idadi kubwa   ya wanafunzi wa uzamivu mathalani wahitimu wa uzamivu walikuwa takribani 54 ambao wamehitimu shahada zao za uzamivu.

“Safari ya masomo ya shahada ya uzamivu inataka mtu kutenga muda wa kutosha lakini pia kuwa na nidhamu ya huo muda kwa maana  kwamba  kwa mimi binafsi ambaye nilikuwa naendelea na majukumu ya kazi na huku nikisoma ilikuwa inanihitaji kuwa na nidhamu ya muda kuhakikisha kwamba ninapata nafasi ya kuendelea kuwahudumia watanzania lakini pia ninatimiza majukumu yangu…

kama mwanafunzi, na kwa kupitia fursa hii napenda kuwaamasisha wafanyakazi wenzangu ambao wapo Mahakama ya Tanzania lakini wafanyakazi na watumishi wa Serikali na watanzania kwa ujumla kuendelea kujiendeleza ni jambo la muhimu kwasababu bila elimu hatuwezi kupiga hatua za haraka za kuliletea maendeleo Taifa letu,” amesema Jaji Kiongozi huyo.

Aidha, Mhe. Dkt. Siyani amesema mwisho wa safari ya masomo imemuhamasisha kufanya kitu kingine kama mhitimu tayari ameanza kufikiria kitu kingine cha kufanya pamoja na kutumia taaluma hiyo aliyoipata kwenye safari hiyo ya masomo, tayari amefikiria kufanya maandiko mengine mengi ili watuwengi zaidi waweze kupata elimu ambayo ameimepata na kupitia utaalam ambao ameupata.

 “Shahada yangu ya uzamivu imejikita katika eneo la utoaji haki ningependa watu wengi zaidi wafahamu utafiti na tasnifu yangu, ilikuwa inaangalia changamoto ambazo Mahakama inakumbana nazo katika kuhakikisha kwamba inatimiza jukumu la kikatiba la kutoa haki kwa wakati.  Kwa hiyo tasnifu iyo imesheheni mambo mbalimbali ambayo ni changamoto za kisheria lakini pia za kiutendaji na mapendekezo ya nini kifanyike ili kuhakikisha kiu ya watanzania ya kupata haki kwa wakati inatimia. Ninatazama namna ambavyo nita andika zaidi ili watanzania watakao pata fursa ya kusoma nao waweze kufahamu wanapokuwa na shauri Mahakamani watarajie nini wafanye ilikuhakikisha kwamba tunatimiza takwa la katiba la kuhakikisha kwamba haki inapatikana kwa wakati,” amesema Jaji Kiongozi.

Naye, Mwenyekiti wa Bodi ya Chuo Kikuu cha Dodoma Profesa Rwekaza Mkandara amewapongeza kwa dhati wahitimu wote walioweza kumaliza masomo yao kwa mwaka 2024 katika fani zote ambazo wanatunukiwa vyeti vyao.

“Vilevile nawapongeza wanataaluma na wafanyakazi wengine kwa kazi kubwa waliyoifanya na kufanikisha waitimu hawa kumaliza masomo yao. Napenda kuwaasa wahitimu wetu kuwa baada ya kupata tuzo zenu muweke mbele dhamira ya kujiendeleza kielimu na maono ya baadae kwa sababu tupo katika dunia yenye ushindani mkubwa wa maarifa kwa hiyo lazima kuendana na wakati. Sote kwa pamoja tumeungana kuhakikisha kuwa wahitimu wanaandaliwa vizuri na kukomaa kitaaluma kwa viwango vya kimataifa,” amesema Profesa Mkandara.

Jaji kiongozi wa Mahakama Kuu ya Tanzania Mhe. Dkt. Mustapher Mohamed Siyani akiwa kwenye picha ya pamoja na meza kuu mara baada ya kutunukiwa shahada ya udaktari kushoto ni Mkuu wa Chuo Kikuu cha Dodoma ambaye pia ni Waziri wa Ulinzi na Jeshi la Kujenga Taifa Mhe.Dkt Stergomena .L.Tax na kulia ni Mwenyekiti wa Bodi ya Chuo Kikuu cha Dodoma Profesa Rwekaza Mkandara leo tarehe 6 Disemba, 2024 

Jaji kiongozi wa Mahakama Kuu ya Tanzania Mhe. Dkt. Mustapher Mohamed Siyani akitunukiwa Shahada ya Uzamivu na Mkuu wa Chuo Kikuu cha Dodoma ambaye pia ni Waziri wa Ulinzi na Jeshi la Kujenga Taifa Mhe.Dkt Stergomena .L.Tax katika Chuo Kikuu cha Dodoma maarufu kama (UDOM) leo tarehe 6 Disemba, 2024 ambapo mahafali hayo yamefanyika kwenye Ukumbi wa mikutano Chimwaga jijini Dodoma.

Jaji kiongozi wa Mahakama Kuu ya Tanzania Mhe. Dkt. Mustapher Mohamed Siyani (wa kwanza kushoto) akipongezwa na Mtendaji Mkuu wa Mahakama ya Tanzania Prof.Elisante Ole Gabriel (wa kwanza kulia )  mara baada ya kuhitimu shahada yake ya uzamivu.

Mtendaji Mkuu wa Mahakama ya Tanzania Prof. Elisante Ole Gabriel (wa pili kushoto) akiwa sehemu ya mahafali hayo.

Jaji kiongozi wa Mahakama Kuu ya Tanzania Mhe. Dkt. Mustapher Mohamed Siyani (wa nne kutoka kulia ) akisoma kiapo cha maadili ya taaluma mara baada ya kutunukiwa shahada ya uzamivu wakati wa mahafali hayo yaliyofanyika katika Ukumbi wa mikutano wa Chimwaga jijini Dodoma.

Jaji kiongozi wa Mahakama Kuu ya Tanzania Mhe. Dkt. Mustapher Mohamed Siyani (wa kwanza kushoto) akiwa na sehemu ya wahitimu wa shahada ya uzamivu wakati wa mahafali hayo yaliyofanyika katika Ukumbi wa mikutano wa Chimwaga jijini Dodoma.

(Picha na Innocent Kansha - Mahakama)