MAHAKIMU MOSHI WAPIGWA MSASA UENDESHAJI MASHAURI YA UCHAGUZI

Na Paul Mushi, Mahakama Kuu- Moshi

Mahakama Kuu Kanda ya Moshi imefanya Mafunzo maalum kwa jumla ya Mahakimu 21 wa Mahakama ya Hakimu Mkazi na Wilaya sita juu ya namna bora ya uendeshaji wa mashauri ya uchaguzi.

Lengo la Mafunzo hayo ni kuwawezesha Mahakimu wote wa wilaya  kanda ya Moshi juu ya kanuni, sheria na Maadili ya kushughulikia Mashauri ya Uchaguzi katika Kipindi hichi ambapo Tanzania inafanya uchaguzi Mkuu 2020.

Akifungua Mafunzo hayo hivi karibuni, Jaji Mfawidhi wa Mahakama Kuu, Kanda ya Moshi-Mhe. Jaji  Beatrice Mutungi amewasihi washiriki kusikiliza mashauri kwa uwazi, uhuru ili kuonyesha uhuru wa muhimili wa Mahakama hali itakayoongeza imani ya wananchi kwa Mahakama.

“Ninawasihi kufanya maamuzi kwa kuzingatia kanuni na sheria za nchi na kuepuka vishawishi vya rushwa pamoja na kusimamia maadili ya uhakimu ili kuhakikisha haki inatendeka kwa wakati,” alisema Mhe. Jaji Mutungi.

Naye Hakimu Mkazi Mkuu Mfawidhi, Mhe. Bernazitha Maziku aliwataka washiriki hao kusikiliza kwa makini mada zitakazofundishwa ili ziwasaidie kuepuka migogoro itakayoweza kusababishwa  kwa kukiukwa kwa taratibu za uendeshaji mashauri ya uchaguzi.

Mpaka sasa Mahakama kwa kushirikiana na Chuo tayari imeshafanya mafunzo ya uendeshaji wa mashauri ya uchaguzi kwa Maafisa mbalimbali wa Mahakama ikiwemo Majaji wa Mahakama ya Rufani, Majaji wa Mahakama Kuu ya Tanzania na Zanzibar, Naibu Wasajili, Mahakimu Wakazi Wafawidhi lengo likiwa ni kuwawezesha kuyashughulikia kwa ustadi zaidi na kwa wakati.

Jaji Mfawidhi, Mahakama Kuu Kanda ya Moshi, Mhe. Beatrice Mutungi akitoa nasaha zake kwa washiriki (hawapo pichani) wakati wa ufunguzi rasmi wa Mafunzo ya siku moja ya namna bora ya kuendesha mashauri ya uchaguzi yaliyofanyika hivi karibuni katika Ukumbi wa Mahakama ya Hakimu Mkazi Moshi.

Jaji Mfawidhi, Mahakama Kuu Kanda ya Moshi, Mhe. Beatrice Mutungi (katikati) akiwa katika picha ya pamoja na washiriki wa Mafunzo, kushoto ni Naibu Msajili, Mahakama Kuu Kanda ya Moshi, Mhe. Omary Kingwele na kulia ni Hakimu Mkazi Mfawidhi, Mahakama ya Hakimu Mkazi Moshi, Mhe. Benazitha Maziku.

Picha ya pamoja  na washiriki.

SHIRIKIANENI KWA MASLAHI YA TAASISI ; JAJI MSTAAFU WAMBURA

  Na Innocent Kansha - Mahakama

Jaji Mfawidhi Mstaafu wa Mahakama Kuu ya Tanzania, Divisheni ya Kazi, Mhe. Sophia Wambura amewataka watumishi wa Mahakama ya Tanzania kufanya kazi kwa upendo, ushirikiano na uadilifu ili kuleta tija kwa Taasisi.

Akizungumza wakati wa hafla fupi ya kumuaga baada ya kustaafu rasmi iliyofanyika katika Mahakama hiyo Oktoba 23 mwaka huu, Mhe. Jaji Mstaafu Wambura alisema kufanya kazi kama kama timu kutawezesha malengo yao na ya Taasisi kutimia.

“Ili mkono ukamilike ni lazima kila kidole kiwepo, ndipo mkono unaweza kufanya kazi kwa ukamilifu na ufanisi ndivyo basi tunatakiwa kama watumishi kufanya kazi kwa ushirikiano na kufikia mafanikio kwa maslahi mapana zaidi”, alisema Jaji .

Jaji Wambura aliongeza kwa kuzungumzia nafasi ya kiongozi katika kufanikisha hilo huku akisema kuwa. “Kiongozi bora ni mtu anayetumia muda wake kuonyesha dira ya kuwafikisha Watu kwenye hatima ya mafanikio ya mtu moja moja na hata Taasisi anayoiongoza kwa kusimamia uwazi, uwajibikaji na mahusiano mazuri pahala pa kazi.”

Aidha, Mhe. Jaji Mstaafu Wambura aliwaeleza watumishi hao kuwa katika kutimiza majukumu yao ni lazima waige kundi la ndege warukao angani bila kuongozwa na mtu bali hutumia karama walionayo na kufikia hatima yao kwa juhudi na ushirikiano wao. “Kila Mtumishi aliyepo hapa yupo kwa sababu na si bure hivyo anatakiwa kuonyesha karama ulizonazo kwa kushirikiana na wengine ili malengo yenu kama Watumishi na Taasisi yenu yatimie.”

Jaji Wambura aliwakumbusha watumishi kuzingatia maadili ya kazi ili kutoharibu taswira ya Taasisi na kupoteza imani ya Umma unaouhudumia, Viongozi wanapaswa kutoa maelekezo ya mara kwa mara kuwakumbusha watumishi masuala muhimu ya kinidhamu.

Kwa upande mwingine, Mhe. Jaji Wambura aliwataka Watumishi kutoridhika na nafasi zao kazini aliwaasa kutafuta njia mbalimbali za kuongeza na kujiendeleza kielimu ili kutafuta fursa zaidi na kupanua wigo wa ujuzi na umahiri ili kutimiza majuku yao kwa ufasaha na weledi mkubwa zaidi.

Awali akitoa neno la utangulizi kwa niaba ya watumishi, Kaimu Jaji Mfawidhi wa Mahakama Kuu ya Tanzania Devisheni ya Kazi, Mhe. Imani Daud Aboud alisema kuwa wangependa kuendelea kuwa na Jaji Mstaafu Wambura kwa ari ya utendaji kazi wake ila kwa mujibu wa sheria hana budi kupumzika katika utumishi.

Mhe. Jaji Aboud aliongeza kuwa Jaji Mstaafu Wambura ni mtu aliyekuwa na upendo wa hali ya juu kazini, ushirikiano, kusimamia nidhamu za watumishi, alikuwa mtiifu na mwadilifu, aliongeza kuwa alikuwa mpenda haki asiye na makuu na lionyesha unyenyekevu siku zote na kiongozi hodari.

Naye, Jaji wa Mahakama Kuu ya Tanzania Divisheni ya Kazi, Mhe. Zainab Muruke alimuelezea Jaji Mstaafu Sophia Wambura kama mfanyakazi hodari mwenye msimamo imara wa kusimamia mambo anayoyaamini katika kazi, kuwatia hari watumishi hasa wa jinsia ya kike na kuwaasa watumishi kutobweteka kujiendeleza kitaaluma ili kuboresha ufanisi kazini

Jaji Mstaafu Sophia Wambura amestaafu baada ya kuhutumikia Muhimili wa Mahakama kwa takribani miaka 35 katika nyadhifa mbalimbali.

Jaji Mfawidhi Msataafu wa Mahakama Kuu ya Tanzania Divisheni ya Kazi Mhe. Sophia Wambura (aliyesimama) akitoa nasaha zake kwa watumishi wa Mahakama Kuu Divisheni ya kazi wakati wa hafla ya kumuaga iliyofanyika katika ukumbi wa Mahakama hiyo Jijini Dar es Salaam, katikati ni Kaimu Jaji Mfawidhi wa Mahakama Kuu ya Tanzania Divisheni ya Kazi, Mhe Imani Daud Aboud na kushoto ni Jaji wa Mahakama Kuu ya Tanzania Divisheni ya Kazi, Mhe. Zainab Muruke.

Kaimu Jaji Mfawidhi wa Mahakama Kuu ya Tanzania Divisheni ya Kazi, Mhe. Imani  Aboud (aliyesimama) akitoa neno la utangulizi wakati wa Hafla ya kumuaga Jaji Mfawidhi Msataafu, Mhe. Sophia Wambura (wa pili kulia),  kushoto ni Jaji wa Mahakama Kuu ya Tanzania, Divisheni ya Kazi, Mhe. Zainab Muruke na wa kwanza kulia ni Mtendaji wa Mahakama Kuu ya Tanzania, Divisheni ya Kazi- Bi. Hellen Mkumbwa.

Jaji Mfawidhi Mstaafu, Mhe. Sophia Wambura (wa pili kulia) akiwa kwenye picha ya pamoja na Watumishi wa Mahakama Kuu Divisheni ya Kazi (wa pili kushoto) ni Kaimu Jaji Mfawidhi wa Mahakama Kuu ya Tanzania- Divisheni ya Kazi Mhe, Imani  Aboud, (wa kwanza kulia) ni Jaji wa Divisheni hiyo, Mhe. Zainab Muruke na (wa kwanza kushoto) ni Jaji wa Mahakama Kuu ya Tanzania- Divisheni ya Kazi Mhe. Angaza Mwipopo.

Jaji wa Mahakama Kuu ya Tanzania Divisheni ya Kazi, Mhe. Zainab Muruke (aliyesimama) akitoa neno la shukrani mbele ya Jaji Mfawidhi Msataafu, Mhe. Sophia Wambura wakati wa hafla ya kumuaga iliyofanyika katika Ukumbi wa Mahakamani hapo, kushoto  ni Jaji wa Mahakama Kuu ya Tanzania Divisheni ya Kazi Mhe. Angaza Mwipopo.

Mtumishi wa Mahakama Kuu ya Tanzania Divisheni ya Kazi Bi. Jane Lwiza kwa niaba ya watumishi wenzake akitoa neno la shukrani wakati wa hafla ya kumuaga Jaji Mstaafu, Mhe. Sophia Wambura.

Baadhi ya watumishi wa Mahakama Kuu ya Tanzania Divisheni ya Kazi wakifanya Igizo fupi la kupanga mbinu za kukabiriana na adui kama ishara ya kuonyesha maana ya uongozi mahala pa kazi wakati wa hafla ya kumuaga Jaji Mfawidhi Msataafu wa Mahakama Kuu ya Tanzania Divisheni ya Kazi Mhe. Sophia

Jaji Mfawidhi Msataafu Mhe. Sophia Wambura akikata Keki iliyoandaliwa na watumishi wa Mahakama Divisheni ya Kazi ikiwa ni ishara ya kumpongeza baada ya kustaafu utumishi rasmi.

 

BODI YA MAJUZUU YA SHERIA MBIONI KUKAMILIMISHA JUZUU LA 2020

 Na Tawani Salum, Mahakama

Bodi ya Udhamini wa Taarifa ya Majuzuu ya Sheria imeendelea kwa kasi kukamilisha uchambuzi wa maamuzi ya Juzuu la mwaka 2016 na majuzuu ya miaka ya nyuma kuanzia mwaka 2007 na kuendelea na ifikapo mwisho wa mwezi Oktoba mwaka huu inategemea kukamilisha uchapishaji wa juzuu ya sheria ya mwaka huu.

Akizungumza katika  kikao cha Bodi hiyo, kilichofanyika hivi karibuni  katika ukumbi wa mikutano wa Chuo Kikuu Huria  jijini Dar es Salaam, Mwenyekiti wa Bodi, Jaji wa Mahakama ya Rufani Tanzania, Mhe. Jacobs Mwambegele alisema kuwa Majuzuu ya mwaka 2007 hadi 2015,2017 ,2018 na 2019 tayari yamewasilishwa  kwa Mzabuni kwa hatua ya mapitio na  uchapishaji.   

“Ni mpango wa Bodi na Mahakama kuhakikisha imemaliza kuchapisha Taarifa za Majuzuu ya Sheria ya Mwaka  2007 hadi Mwaka 2020 katika kipindi cha miezi kumi kuanzia mwezi wa nane mwaka huu,” alieleza Mhe. Jaji Mwambegele.

Naye Kaimu Mratibu wa  Bodi ya Udhamini wa Taarifa ya Majuzuu ya Sheria, Mhe. Kifungu Mrisho Kariho alisema kuwa Bodi hiyo imedhamiria kutoa Majuzuu hayo kwa mkupuo kwa kuwa tayari  kipindi kirefu kimepita toka 2006  bila Majuzuu hayo kuwafikia wadau walaji na  kurahisisha tafiti za kisheria  na  kumalizika  kwa Mashauri kwa wakati kupitia   Wahe. Majaji  na Mahakimu.

Mhe. Kariho aliongeza kuwa Majuzuu hayo yatasaidia katika uwasilishwaji wa hoja mpya  za kisheria Mahakamani  kupitia  Mawakili wa Serikali, Mawakili wa Kujitegemea  pamoja na wadau wengine katika fani ya Sheria.

Bodi hiyo ina jumla ya Wajumbe 12, ambao ni Majaji kutoka Mahakama ya Rufani, Majaji wa Mahakama Kuu Tanzania  Bara na Zanzibar, Wawakilishi toka Tanzania Bara na Zanzibar, Katibu na Mratibu wa Bodi hiyo.

Pichani ni Mwenyekiti wa Bodi ya Udhamini  ya Taarifa ya Majuzuu ya Sheria ambaye pia ni Jaji wa Mahakama ya Rufani Tanzania, Mhe. Jacobs Mwambegele na kulia ni Katibu wa Bodi hiyo, Prof. H.I. Majamba wakiwa katika kikao cha Bodi ya Udhamini  ya Taarifa ya Majuzuu ya Sheria  kilichofanyika hivi karibuni.

Baadhi ya wajumbe wa Bodi ya Udhamini  ya Taarifa ya Majuzuu ya Sheria wakiwa katika kikao hicho, Kulia ni Mhe.Jaji F. Manyanda,  kushoto ni Bi. Nelly Mwasongwe  na katikati ni Bw. H.A. Haji.

Wajumbe wa Bodi ya Udhamini  ya Taarifa ya Majuzuu ya Sheria wa kwanza kushoto ni Jaji wa Mahakama ya Rufani Mhe. S.A.  Lila, katikati Ni Jaji wa Mhakama Kuu Zanziabr Mhe. A. Mwampashi na wa kwanza kulia ni ni Kaimu Mratibu wa Bodi hiyo Mhe.Kifungu Mrisho Kariho wakifuatilia kikao hicho.

 

Wajumbe wa Bodi hiyo wakiendelea na majadiliano, kushoto ni Jaji wa Mahakama ya Rufani ya Tanzania, Mhe. Ignas Kitusi na kulia ni Prof. Majamba.

 

 

SIMAMIENI MAADILI KULINDA HESHIMA YA MAHAKAMA: JAJI KIONGOZI

 Na Lydia Churi- Mahakama, Geita

Jaji Kiongozi wa Mahakama Kuu ya Tanzania Mhe. Dkt.  Eliezer Feleshi amewataka watumishi wa Mahakama kusimamia maadili wanapotekeleza majukumu yao ya kila siku ili kutoa huduma bora kwa wananchi na kulinda heshima ya Mhimili huo.

Akizungumza kwa nyakati tofauti na Watumishi wa Mahakama za wilaya za Bukombe na Chato mkoani Geita, Jaji Kiongozi pia amewataka watumishi hao kufanya kazi kwa kushirikiana na kupendana wao kwa wao na wadau wote wa Mahakama wakiwemo wananchi wanaofika mahakamani kutafuta haki zao.

“Simamieni maadili ya kazi zenu, tuwe na ushirikiano mwema sisi wenyewe Pamoja na wadau wa Mahakama”, alisistiza Jaji Kiongozi.

Katika kuboresha utendaji kazi, Jaji Kiongozi aliwashauri watumishi wa Mahakama kujiendeleza kielimu ili wawe na uwezo wa kufanya kazi Zaidi ya moja. Aidha, aliwataka watumishi hao kujifunza na kuifahamu vizuri Taasisi wanayofanyia kazi.

Watumishi wapatiwe mafunzo/ ujuzi mbalimbali ili kuwawezesha kutekeleza vema majukumu yao ya kila siku. Alisema watumishi wa kada za chini mara nyingi wamekuwa wakisahaulika kupatiwa mafunzo hivyo ameutaka uongozi wa Mahakama kuhakikisha watumishi hao pia wanapatiwa mafunzo ya kuboresha utendaji kazi wao.  

Kuhusu usikilizwaji wa mashauri, Dkt. Feleshi amewataka Majaji na Mahakimu kusikiliza mashauri kwa haraka na ikiwezekana wasikilize hata siku ya Jumamosi ili kuondoa msongamano wa mashauri mahakamani. Alisema mashauri yanayopaswa kupewa kipaumbele ni yale ambayo watuhumiwa wake hawana dhamana ili kuondoa msongamano magerezani.

Jaji Kiongozi amewasisitiza Mahakimu kuhakikisha wanamaliza kwa haraka  mashauri hususan ya Mirathi na yale ya Ndoa. “Mashauri ya Ndoa yana athari kubwa kwa familia hasa Watoto, lakini pia mashauri ya Mirathi nayo yanaathiri Watoto yatima, Wajane na Wagane hivyo hayana budi kumalizika kwa wakati”, alisisitiza Jaji Kiongozi.

Akizungumza katika ofisi za wakuu wa wilaya za Bukombe na Chato, Jaji Kiongozi  amelishauri jeshi la polisi kuharakisha kufanya upepelezi ili mashauri yamalizike kwa wakati.

“Polisi harakisheni upelelezi, yapo mashauri yanayosubiri polisi kumaliza upelelezi na Mkurugenzi wa Mashtaka kutoa vibali”, alisema Dkt. Feleshi.

Alisema Mahakama imejiwekea mikakati ya kumaliza mashauri kwa wakati ikiwemo Majaji na Mahakimu kupangiwa idadi ya mashauri wanayopaswa kumaliza katika kipindi cha mwaka moja. Majaji wanatakiwa kusikiliza mashauri 220 na Mahakimu mashauri 250.

Jaji Kiongozi amemaliza ziara yake ya siku tano ya kikazi katika Kanda ya Mwanza ambapo alikagua shughuli za utendaji kazi katika Mahakama za wilaya za Nyamagana, Ilemela, Misungwi, Kwimba, Magu, Ukerewe na Sengerema. Jaji Kiongozi pia alitembelea Mahakama za wilaya za Bukombe, Chato Geita pamoja na Mahakama ya Hakimu Mkazi Geita.

Jaji Kiongozi wa Mahakama Kuu ya Tanzania Mhe. Dkt.  Eliezer Feleshi akishuka kwenye Kivuko akitoka Mkoani Geita kwenye ziara ya Ukaguzi baada ya kumaliza. Nyuma yake ni Jaji Mfawidhi wa Mahakama Kuu kanda ya Mwanza Mhe. Sam Mpaya Rumanyika. 

Jaji Kiongozi wa Mahakama Kuu ya Tanzania Mhe. Dkt.  Eliezer Feleshi (katikati) akiwa katika picha ya pamoja na Viongozi wa Mahakama wa kanda Mwanza na Makao Makuu ya Mahakama Kuu baada ya kumaliza kuzungumza na Watumishi wa Mahakama ya Wilaya ya Bukombe.  

Watumishi wa Mahakama ya Wilaya ya Bukombe wakimsikiliza Jaji Kiongozi alipokuwa akizungumza nao.  

Jaji Kiongozi wa Mahakama Kuu ya Tanzania Mhe. Dkt.  Eliezer Feleshi akizungumza na atumishi wa Mahakama ya Wilaya ya Bukombe 

WANANCHI WA SENGEREMA KUSOGEZEWA HUDUMA ZA UPATIKANAJI HAKI

 Na Lydia Churi- Mahakama Mwanza.

Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi ameiomba Kamati ya Ulinzi na Usalama ya wilaya ya Sengerema mkoani Mwanza kusaidia upatikanaji wa gereza lingine katika wilaya hiyo ili kurahisisha upatikanaji wa haki kwa wananchi.

Akizungumza na Mkuu wa Wilaya hiyo, Mhe. Emmanuel Kipole pamoja na Kamati ya Ulinzi na Usalama, Jaji Kiongozi amesema bila ya kuwa na mkakati madhubuti wa kuhakikisha kunakuwa na gereza lingine Sengerema, ni wazi mashauri hayatamalizika kwa wakati mahakamani.

Alisema katika kipindi cha kuanzia Januari hadi Septemba mwaka huu, Mahakama ya wilaya ya Sengerema ilisajili mashauri 329 na kati ya hayo, mashauri 325 yaliamuliwa na yaliyobaki yaklikuwa ni 118. Aliongeza kuwa sababu kubwa ya mashauri kubaki ni kukosekana kwa magereza kwenye wilaya hiyo.

Kwa mujibu wa taarifa ya Hakimu Mkazi Mfawidhi wa wilaya hiyo iliyosomwa kwa Jaji Kiongozi, mahabusu hufikishwa mahakamani mara mbili kwa wiki kwa ajili ya kusikilizwa kwa mashauri yao hali inayosababisha mashauri kutokumalizika kwa wakati.

Akizungumza na watumishi wa Mahakama ya Hakimu Mkazi Geita pamoja na Mahakama ya wilaya ya Sengerema kwa nyakati tofauti, Dkt. Feleshi aliwataka watumishi hao kujiepusha na vitendo vya rushwa na ukosefu wa maadili, kuacha  kuchongeana pasipokuwa na sababu za msingi na kuchafuana, badala yake wathaminiane na kuheshimiana kila moja katika kada yake.

Aliwataka watumishi hao kujiendeleza kielimu kwenye kada nje ya kada walizoajiriwa ili kuongeza ujuzi wa masuala mbalimbali. “Tujitahidi kujenga uwezo na thamani yetu, tusifanye kazi kwa mazoea” alisema. 

Naye Mkuu wa wilaya ya Sengerema, Emmanuel Kipole alielezea changamoto inayotokana na ukubwa wa wilaya yake kwamba wananchi wengine wamekuwa wakisafiri umbali mrefu kufuata huduma za Mahakama makao makuu ya wilaya hiyo.

Alisema wilaya ya Sengerema inazo Tarafa 2 na kata 47 ambapo kata 5 kati ya hizo zipo maeneo ya visiwani umbali wa zaidi ya kilometa 100 kutoka makao makuu ya wilaya hiyo hivyo wananchi wengine hutumia gharama kubwa kufuata haki zao.

Aidha Mkuu huyo wa wilaya alimshukuru Jaji Mkuu wa Tanzania Mhe. Prof. Ibrahim Hamis Juma pamoja na viongozi wengine wa Mahakama kwa kusikia ombi lao na kuwaongezea idadi ya Mahakimu watatu katika Mahakama ya wilaya ya Sengerema. Awali Mahakama hiyo ilikuwa na Hakimu moja tu.

Kuhusu ombi la Mkuu wa wilaya ya Sengerema la kuanzishwa kwa Mahakama ya pili ya wilaya kwenye wilaya hiyo, Jaji Kiongozi alisema Mahakama ya Tanzania itaangalia uwezekano wa kuanzisha masjala ndogo ya Mahakama ya wilaya ili kusogeza huduma kwa wananchi wa wilaya hiyo.

Jaji Kiongozi anaendelea na ziara yake katika Mkoa wa Geita ambapo atamalizia katika wilaya za Bukombe na Chato.

Watumishi wa Mahakama ya wilaya ya Sengerema mkoani Mwanza wakimsikiliza Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi alipokuwa akizungumza nao wakati wa ziara yake ya ukaguzi wa shughuli za Mahakama katika kanda ya Mwanza. 

Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi akipanda mti wa kumbukumbu katika viwanja vya Mahakama ya wilaya ya Sengerma alipofika kukagua shughuli za Mahakama katika kanda ya Mwanza. 

Jaji Mfawidhi wa Mahakama Kuu ya Tanzania kanda ya Mwanza Mhe. Sam Rumanyika akipanda mti wa kumbukumbu katika viwanja vya Mahakama ya wilaya ya Sengerma wakati wa ziara ya Jaji Kiongozi kwenye kanda hiyo. 

Watumishi wa Mahakama ya wilaya ya Sengerema mkoani Mwanza wakiwa katika picha ya pamoja na Jaji Kiongozi wa Mahakama Kuu ya Tanzania Mhe. Dkt. Eliezer  Mbuki Feleshi (katikati waliokaa). 

Jaji Kiongozi wa Mahakama Kuu ya Tanzania Mhe. Dkt. Eliezer  Mbuki Feleshi akimsikiliza Mtendaji wa Mahakama ya Hakimu Mkazi Geita akielezea jambo.

Mkuu wa Mkoa wa Geita, Mhandisi Robert Gabriel akizungumza na Jaji Kiongozi wa Mahakama Kuu ya Tanzania Mhe. Dkt. Eliezer  Mbuki Feleshi (hayupo Pichani) wakati Jaji Kiongozi alipomtembelea ofisini kwake.

Mkuu wa Mkoa wa Geita, Mhandisi Robert Gabriel akizungumza na Jaji Kiongozi wa Mahakama Kuu ya Tanzania Mhe. Dkt. Eliezer  Mbuki Feleshi wakati Jaji Kiongozi alipomtembelea ofisini kwake.

Watumishi wa Mahakama ya Hakimu Mkazi Geita pamoja na Viongozi wa Mahakama wakiwa katika picha ya pamoja na Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi mara baada ya kuzungumza nao.

 

 

 

 

 

JAJI KIONGOZI AIOMBA TAKUKURU KUELIMISHA WANANCHI KUHUSU MALALAMIKO DHIDI YA MAHAKAMA

 Na Lydia Churi-Mahakama, Mwanza

Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi ameiomba Taasisi ya Kuzuia na Kupambana na Rushwa-Takukuru kuwaelimisha wananchi na kuyachunguza malalamiko ya rushwa dhidi ya Mahakama kwani mengine hutokana na wananchi kutofahamu taratibu mbalimbali za Mahakama.

Akizungumza na Mkuu wa wilaya ya Magu Mkoani Mwanza Pamoja na wajumbe wa Kamati ya Ulinzi na Usalama ya wilaya Magu, Jaji Kiongozi amesema tuhuma za rushwa dhidi ya Mahakama zinaweza kusababishwa na wananchi kutofahamu taratibu za utendaji kazi wa Mhimili huo ikiwemo jinsi ya upatikanaji wa nakala za hukumu, mwenendo wa shauri na namna ya usikilizwaji wa mashauri katika ngazi mbalimbali za Mahakama.

“Mahakama haijishirikishi na vitendo vya rushwa wala haiwalindi wanaojihusisha na vitendo hivyo”, alisema Jaji Kiongozi na kuongeza kuwa vitendo vya rushwa hufanywa na mtumishi mwenyewe asiye na maadili.

Alisema Mahakama haitasita kuwachukulia hatua kali za kinidhamu watumishi wake wanaojihusisha na vitendo vya rushwa na imekuwa ikifanya hivyo wakati wote.

Kuhusu upatikanaji wa nakala za hukumu, Jaji Kiongozi alisema Mahakama ilianzisha huduma ya usambazaji wa nyaraka zake mbalimbali iitwayo Posta Mlangoni baada ya kuingia mkataba na shirika la Posta Tanzania ambapo hivi sasa nakala za hukumu Pamoja na nyaraka nyingine husambazwa na kufikishwa moja kwa moja kwa wananchi.

Alisema licha ya kuwepo kwa huduma hiyo, bado kuna baadhi ya wananchi ambao hawajaikubali huduma hiyo na kutaka kufika wenyewe mahakamani kuchukua nakala za hukumu hivyo pamoja na Mahakama kuwaelimisha wananchi, ameiomba pia Takukuru kuwaelimisha wananchi wanaopeleka malalamiko ya aina hiyo dhidi ya Mahakama. 

 Wakati huo huo, Mkuu wa wilaya ya Misungwi Bw. Juma Samwel Sweda ameipongeza Mahakama ya Tanzania kwa maboresho ya huduma zake ikiwemo kujenga na kukarabati majengo yake na kuongeza kasi katika usikilizaji wa mashauri. “Hivi sasa majengo yanajengwa na mashauri yanapungua hususan kwenye mahakama ya wilaya ya Misungwi”, alisisitiza.

Mkuu huyo wa wilaya pia aliiomba Mahakama ya Tanzania kuangalia uwezekano wa kujenga jengo la kisasa la Mahakama ya wilaya ya Misungwi kwa kuwa jengo lililopo hivi sasa ni dogo ukilinganisha na mahitaji halisi.  

 Jaji Kiongozi anaendelea na ziara yake ya kikazi kwenye Mkoa wa Geita ambao ni sehemu ya Mahakama Kuu kanda ya Mwanza. Kiongozi huyo anatarajiwa kukagua shughuli za Mahakama katika wilaya za Chato na Bukombe.

Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi akimsikiliza Mtumishi wa Mahakama ya wilaya ya Magu (hayupo pichani) alipokuwa akizungumza na watumishi wa Mahakama hiyo alipoenda kukagua shughuli za Mahakama. Jaji Kiongozi yuko Mkoani Mwanza kwa ziara ya Ukaguzi. Kushoto ni Jaji Mfawidhi wa kanda hiyo Mhe. Sam Rumanyika na kulia ni Naibu Msajili wa Mahakama Kuu Masjala Kuu Mhe. Nyigulila Mwaseba akifuatiwa na Mtendaji wa Mahakama Kuu Bibi. Masalu Kisasila. 

Watumishi wa Mahakama ya wilaya ya Magu wakimsikilza Jaji Kiongozi wa Mahakama Kuu ya Tanzania Mhe. Dkt. Eliezer Feleshi alipozungumza nao. 

Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi (wa nne kushoto), Mkuu wa wilaya ya Magu Bw. Salum Kali (wa nne kulia) na Jaji Mfawidhi wa Mahakama Kuu kanda ya Mwanza Mhe. Sam Rumanyika wakiwa katika picha ya pamoja na wajumbe wa Kamati ya Ulinzi na Usalama ya wilaya hiyo na baadhi ya Viongozi wa Mahakama ya Tanzania wakati Jaji Kiongozi alipomtembelea Mkuu huyo wa wilaya ofisini kwake.

Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi (katikati) akiwa katika picha ya pamoja na Mkuu wa wilaya ya Kwimba (wa pili kulia) pamoja na wajumbe wa Kamati ya Ulinzi na Usalama ya wilaya na Viongozi kutoka Mahakama ya Tanzania.Wa pili kushoto ni Jaji Mfawidhi wa Mahakama Kuu kanda ya Mwanza Mhe. Sam Rumanyika. 

Watumishi wa Mahakama ya wilaya ya Kwimbawakimsikilza Jaji Kiongozi alipozungumza nao.

JAJI KIONGOZI AKAGUA SHUGHULI ZA MAHAKAMA WILAYANI UKEREWE

Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi ameendelea na ziara yake katika Kanda ya Mwanza ambapo jana alikagua shughuli za Mahakama katika wilaya ya Ukerewe. Pichani akisisitiza jambo alipokuwa akizungumza na watumishi wa Mahakama ya wilaya ya Ukerewe. Kushoto ni Jaji Mfawidhi wa Kanda ya Mwanza Mhe. Sam Rumanyika. 

Watumishi wa Mahakama ya wilaya ya Ukerewe wakimsikiliza Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi alipokuwa akizungumza nao. Amewataka watumishi hao kufanya kazi kwa uadilifu na kuw na utayari wa kujiendeleza kitaaluma. Jaji Kiongozi pia amesisitiza umuhimu wa matumizi ya Tehama katika kazi za Mahakama. 

Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi  akizungumza alipokuwa ofisini kwa Mkuu wa wilaya ya Ukerewe, Cornel Magembe alipomtembelea jana. 

Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi akiwa katika picha ya pamoja na Mkuu wa wilaya ya Ukerewe, Cornel Magembe (wa pili kushoto) pamoja na Wajumbe wa Kamati ya Ulinzi na Usalama ya Wilaya hiyo na Watumishi wa Mahakama.

Mkuu wa wilaya ya Ukerewe, Cornel Magembe akimsikiliza Jaji Kiongozi alipomtembelea ofisini kwake jana.

Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi akiwa katika picha ya pamoja na watumishi wa Mahakama ya wilaya ya Ukerewe. Wa tatu kushoto wliokaa ni Jaji Mfawidhi wa Kanda ya Mwanza Mhe. Sam Rumanyika na wengine waliokaa ni Viongozi wa Mahakama wakiwemo Naibu Wasajili, Mtendaji na Mahakimu.

Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi akikagua maendeleo ya ujenzi wa jengo la Mahakama ya wilaya ya Bunda akiwa njiani kurejea Mwanza baada ya kukagua shughuli za Mahakama wilayani Ukerewe. Kulia ni Jaji Mfawidhi wa kanda ya Mwanza Mhe. Sam Rumanyika akielezea jambo.  Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi akikagua maendeleo ya ujenzi wa jengo la Mahakama ya wilaya ya Bunda akiwa njiani kurejea Mwanza baada ya kukagua shughuli za Mahakama wilayani Ukerewe. 

Jengo la Mahakama ya wilaya ya Bunda likiendelea kujengwa. jengo hili linatarajiwa kukamilika ifikapo mwezi Disemba mwaka huu.Jaji Kiongozi wa Mahakama Kuu ya Tanzania Mhe. Dkt. Eliezer Feleshi akisaliamiana na Spika Mstaafu wa Bunge la Tanzania Mhe. Pius Msekwa alipofika nyumbani kwake Nansio Ukerewe kumsalimia.Jaji Kiongozi wa Mahakama Kuu ya Tanzania Mhe. Dkt. Eliezer Feleshi na Jaji Mfawidhi wa Kanda ya Mwanza Mhe. Sam Rumanyika wakiwa katika picha ya pamoja na Spika Mstaafu wa Bunge la Tanzania Mhe. Pius Msekwa walipofika nyumbani kwake Nansio Ukerewe kumsalimia.

GRAMU 351.99 ZA MADAWA YA KULEVYA ZATEKETEZWA TANGA

Na Amina Ahmad, Mahakama Kuu-Tanga

Mahakama Kuu Kanda ya Tanga kwa kushirikiana na wadau wake imeteketeza kiasi cha gramu 351.99 za madawa ya kulevya aina ya ‘Heroin Hydrochloride.’

Hatua hiyo imetokana na maamuzi ya shauri la uhujumu uchumi namba 4 la mwaka 2019 kati ya Jamhuri na Mshtakiwa Mussa Sembe ambapo baada ya hukumu kutolewa Mwezi julai mwaka huu, Mahakama ilithibitisha kuwa mshitakiwa hakuwa na hatia katika kesi hiyo iliyosikilizwa na Jaji wa Mahakama kuu ya Tanzania Kitengo cha makosa ya rushwa na uhujumu uchumi, Mhe. Lilian Mashaka.

Akizungumza na Waandishi wa habari walioshiriki kushuhudia zoezi hilo lililofanyika hivi karibuni katika eneo la kiwanda cha saruji cha Tanga Cement Jijini Tanga, Naibu Msajili wa Mahakama hiyo, Mhe. Francis Kabwe alisema mara baada ya hukumu kutolewa Mahakama  iliamuru madawa hayo yateketezwe.

“Ndugu Waandishi kilichofanyika leo ni utekelezaji wa amri ya Mahakama ya kuteketekeza madawa ya kulevya aina ya Heroini, baada ya mshitakiwa kutokuwa na hatia, Mahakama aliamua kutoa amri hii,” alisema Mhe. Kabwe.

Kwa upande wake Wakili wa Serikali Mwandamizi ambaye pia ni Mkuu wa  Mashtaka  Mkoa wa Tanga, Pius Hila amesema Serikali imekuwa ikifanya jitihada za kutosha kupambana na watu wote wanaojihusisha na madawa ya kulevya ili nguvu kazi ya taifa isiathirike.

Naye Msaidizi wa Mkuu wa Upelelezi Wilaya ya Tanga,  Inspekta Jeremia Ouko ametoa rai kwa wafanyabiashara na watuamiaji wa dawa za kulevya kuacha tabia hiyo kwani hawataachwa salama.

Naibu Msajili wa Mahakama Kuu Kanda ya Tanga, Mhe. Francis Kabwe (katikati) na wenzake Mkuu wa  Mashtaka  Mkoa wa Tanga (kushoto), Mhe. Pius Hila, Wakili wa Kujitegemea wakiwa katika zoezi maalumu la uteketezaji wa madawa ya kulevya aina ya ‘Heroine’. Zoezi hilo lilifanyika hivi karibuni katika eneo la kiwanda cha saruji cha Tanga Cement Jijini Tanga.

Wadau wa Mahakama wakiwa kwenye msafara kuelekea eneo lililoandaliwa kwa ajili ya uteketezaji wa Madawa ya kulevya lililopo Kiwanda cha Saruji- Tanga Cement 'Tanga Cement.'

        Mtaalam kutoka Kiwanda cha Saruji Tanga akiteketeza Madawa ya kulevya.

 

 

JAJI KIONGOZI ATAKA MASHAURI YA MIRATHI YA MUDA MREFU KUMALIZIKA MWAKA HUU

Na Lydia Churi- Mahakama, Mwanza

Jaji Kingozi wa Mahakama Kuu ya Tanzania Mhe. Dkt. Eliezer Mbuki Feleshi amewataka Majaji wa Mahakama Kuu pamoja na Mahakimu wote kuhakikisha wanasikiliza mashauri yanayohusu Mirathi yaliyofunguliwa muda mrefu na kuyamaliza ifikapo mwezi Disemba mwaka huu.

Akizungumza na Watumishi wa Mahakama Kuu ya Tanzania Kanda ya Mwanza katika siku ya kwanza ya ziara yake kwenye kanda hiyo, Jaji Kiongozi amesema   mashauri hayo ya mirathi yaliyofunguliwa muda uliopita hayapaswi kuvuka mwaka 2020 na amesisitiza kuwa ikiwezekana yasikilizwe hata siku ya Jumamosi ili kuhakikisha yanamaliza ndani ya mwaka huu.

“Mashauri ya Mirathi nyuma yake kuna wajane, wagane na Watoto yatima ambao wanahitaji matunzo ikiwemo kupata haki yao ya kusoma shule, ziko familia zinazovurugika na watoto kupata shida kutokana na mashauri ya aina hii kuchelewa kumalizika”, alisisitiza Jaji Kiongozi.

Jaji Kiongozi pia amewataka Majaji na Mahakimu waliopangiwa kusikiliza mashauri ya mirathi kujiwekea mikakati itakayowezesha mashauri hayo kumalizika ndani ya muda uliopangwa. Aliongeza kuwa viongozi hao hawatapaswa kuchukua likizo mpaka pale watakapokuwa wamemaliza kusikiliza mashauri waliopangiwa.

Wakati huo huo, Jaji Kiongozi amewashauri watumishi wa Mahakama kujiendeleza kielimu ili kuendana na wakati. Akitolea mfano wa kada ya Mahakimu, Dkt. Feleshi amesema hivi sasa Mahakimu wanaoomba ajira, asilimia kubwa wanakuwa tayari wameshajiendeleza kielimu na kuwa na sifa nyingi za kitaaluma walizozipata kipindi walipokuwa wakisubiri kupata ajira.

Akiwa katika ofisi ya Mkuu wa wilaya ya Ilemela alipoenda kumtembelea Kiongozi huyo, Jaji Kiongozi amewaomba Maafisa Tarafa nchini kuwaelimisha wananchi umuhimu wa kutumia Teknolojia ya Habari na Mawasiliano (TEHAMA) katika kurahisisha upatikanaji wa haki zao.

“Maafisa Tarafa kama walinzi wa amani mnao wajibu wa kuwaelimisha na kuwahamasisha wananchi kuwa Mahakama inaondokana na ulazima wa wananchi kufika mahakamani kufungua mashauri na badala yake watumie Tehama ili kurahisisha upatikanaji wa haki,” alisema.

Alisema faida za kutumia mfumo wa Tehama katika kurahisisha upatikanaji wa haki ni pamoja na kuondokana na matatizo ya rushwa na kupunguza muda wa wananchi kufika mahakamani ili muda huo wautumie kufanya shughuli nyingine za uzalishaji mali.

Akizungumzia changamoto za huduma ya Posta Mlangoni ambayo pia hutumika kurahisisha upatikanaji wa nyaraka mbalimbali za kimahakama ikiwemo nakala za hukumu kwa wananchi waliokuwa na shauri mahakamani, Jaji Kiongozi  amewataka wananchi wanaobadilisha anuani zao kuijulisha Mahakama ili waweze kupelekewa nakala zao za hukumu kupitia huduma hiyo ya Posta Mlangoni.

Posta Mlangoni ni huduma iliyoanzishwa na Mahakama ya Tanzania baada ya kuingia mkataba na Shirika la Posta Tanzania uliowezesha shirika hilo kusambaza nyaraka mbalimbali za kimahakama katika maeneo yote nchini.

Katika hatua nyingine, Jaji Kiongozi amewataka Majaji na Mahakimu wa kanda ya Mwanza kuyamaliza mashauri yote ya kanda ya Musoma yaliyosajiliwa kwenye kanda ya Mwanza kabla ya kuanzishwa kwa Mahakama kuu kanda ya Musoma ifikapo mwezi Disemba mwaka huu.  

Jaji Kiongozi anaendelea na ziara katika kanda ya Mwanzo ambapo anatarajiwa kukagua shughuli za Mahakama katika wilaya za Ukerewe, Kwimba, Chato, Bukombe pamoja na Mkoa wa Geita.

Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi akisalimiana na watumishi wa Mahakama Kuu kanda ya Mwanza alipowasili kuanza ziara ya kikazi katika kanda hiyo. Kulia ni Jaji Mfawidhi wa Mahakama Kuu kanda ya Mwanza Mhe. Sam Mpaya Rumanyika. 

Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi akiwa na Kaimu Mkuu wa Mkoa wa Mwanza na Mkuu wa wilaya ya Nyamagana Dkt. Phillis Nyimbi (wa nne kuhoto) alipoenda ofisini kwa Mkuu wa Mkoa wa Mwanza. Wengine pichani ni Viongozi na watumishi wa Mahakama ya Tanzania.   

Watumishi wa Mahakama Kuu kanda ya Mwanza wakimsikiliza Jaji Kiongozi wa Mahakama kuu ya Tanzania Mhe. Dkt. Eliezer Mbuki Feleshi alipozungumza nao. 

ELIMU YA UENDESHAJI MASHAURI YA UCHAGUZI ILETE TIJA; JAJI BENHAJJ

 Na Rosena Suka, IJA-Lushoto

Jaji wa Mahakama Kuu ya Tanzania, Mhe. Dkt. Benhajj Shaaban Masoud amewataka Wasaidizi wa Sheria wa Majaji kutumia vyema elimu ya uendeshaji wa mashauri ya uchaguzi ili kuleta mabadiliko chanya kwenye sekta ya sheria na haki nchini.

Akifunga rasmi Mafunzo hayo hivi karibuni yaliyofanyika katika Chuo cha Uongozi wa Mahakama Lushoto, Mhe. Jaji Dkt Masoud aliwaeleza washiriki kwamba, imani ya wananchi ni kuwa, Mahakama ni mahali pa kupata haki, hivyo basi Maafisa wa Mahakama wanatakiwa kutambua muhimu walionao kwa wananchi wanaowahudumia.

 “Ninawasihi sana kujiepusha na rushwa, kataeni rushwa, kemeeni rushwa na toeni elimu pale mnapopata nafasi na uwezo wa kufanya hivyo juu ya madhara ya rushwa kwenye mchakato mzima wa uchaguzi”

Aidha, aliendelea kwa kuwaomba Maafisa hao kufanya kazi kwa kuzingatia matakwa ya sheria, kanuni na miongozo mbalimbali ili kutekeleza majukumu anayopewa Jaji husika kwa wakati na pia kwa viwango bora.

Kwa upande mwingine, Mhe. Dkt Masoud aliwapongeza wawezeshaji wa mafunzo kwa jinsi walivyoendesha mafunzo hayo kwa umahiri mkubwa.

     Jaji wa Mahakama Kuu ya Tanzania, Mhe.Dkt Benhajj Shaaban Masoud akifunga Mafunzo ya namna bora ya uendeshaji wa mashauri ya uchaguzi kwa Wasaidizi wa Sheria wa Majaji yaliyofanyika katika Chuo cha Uongozi wa Mahakama Lushoto.

      Jaji wa Mahakama Kuu ya Tanzania ambaye pia ni Mkuu wa Chuo cha Uongozi wa Mahakama (IJA) Lushotot, Mhe. Dkt. Paul F. Kihwelo akiwasilisha mada katika mafunzo hayo.

     Jaji wa Mahakama kuu ya Tanzania, Mhe. Dkt Benhajj Masoud akimkabidhi Cheti cha ushiriki Hakimu Mkazi Mhe. Edga Edom Mwaiswaga baada ya kumaliza mafunzo hayo.