JAJI MKUU KUZINDUA RASMI JENGO LA MAHAKAMA KUU KANDA YA SHINYANGA KESHO

 Na Lydia Churi-Mahakama, Shinyanga

Jaji Mkuu wa Tanzania Mhe. Prof. Ibrahim Hamis Juma kesho anatarajiwa kuzindua rasmi jengo la Mahakama Kuu ya Tanzania Kanda ya Shinyanga katika hafla itakayofanyika kwenye viwanja vya Mahakama Kuu kuanzia saa 2:00 Asubuhi.

Uzinduzi huo unatarajiwa kuhudhuriwa na viongozi mbalimbali wa Serikali akiwemo Mkuu wa Mkoa wa Shinyanga, baadhi ya Waheshimiwa Majaji na viongozi wengine wa Mahakama ya Tanzania, viongozi wa dini, pamoja na wananchi wa mkoa huo.

Mhe. Prof. Juma amewasili mkoani Shinyanga kwa ajili ya uzinduzi huo ambapo pia alipata nafasi ya kukutana na Mkuu wa Mkoa wa Shinyanga Bi Zainab Telack na kufanya naye mazungumzo alipomtembelea ofisini kwake.

Jaji Mkuu pia alimkabidhi Mkuu huyo wa Mkoa kitabu cha Mwongozo wa taratibu za ufunguaji wa mashauri katika Mahakama ya Rufani.

Akizungumza kwa upande wake, Mkuu wa Mkoa wa Shinyanga amesema Serikali mkoani humo imefurahishwa na hatua ya Mahakama ya kusogeza huduma za Mahakama Kuu karibu zaidi na wananchi na kwamba itawasaidia wananchi kupata haki kwa wakati.  

Jaji Mkuu pia yuko mkoani humo kwa ajili ya kuanza vikao vya Mahakama ya Rufani vinavyotarajiwa kuanza Jumatatu, Agosti 10 mwaka huu katika kanda ya Shinyanga.

Jaji Mkuu wa Tanzania Mhe. Prof. Ibrahim Hamis akizungumza wakati alipomtembele Mkuu wa Mkoa wa Shinyanga Bi. Zainab Telack leo mjini Shinyanga. 

Viongozi wa Mahakama ya Tanzania wakiwa kwenye ofisi ya Mkuu wa Mkoa wa Shinyanga  walipoambatana na Jaji Mkuu. Wa pili kushoto ni Mtendaji Mkuu wa Mahakama ya Tanzania Bw. Mathias Kabunduguru akifuatiwa na Msajili Mkuu Mhe. Wilbert Chuma kushoto kwake. Wa pili kulia ni Msajili wa Mahakama ya Rufani Mhe. Kevin Mhina na wa kwanza kulia ni Msajili wa Mahakama Kuu ya Tanzania Mhe. Sharmila Sarwatt.

Mkuu wa Mkoa wa Shinyanga Bi. Zainab Telack kimkaribisha Jaji Mkuu ofisini kwake.