Na Innocent Kansha na Tawan Salum- Mahakama
Jaji
Mkuu wa Tanzania Mhe. Prof. Ibrahim Hamis Juma jana tarehe 15 Septemba, 2024 aliungana
na waumini wa Dini ya Kiislam mkoani Dar es salaam kuadhimisha swala ya
kumswalia Mtume Muhammad (S.A.W) iliyobeba kauli mbiu isemayo mmomonyoko wa
Maadili ni chanzo cha uvunjifu wa amani.
Akizungumza
katika sherehe ya mazalia ya Mtume Muhammad iliyofanyika katika viwanja vya
Mnazi Mmoja jijini Dar es salaam Jaji Mkuu Mhe. Prof. Juma alisema ujumbe wa
hafla hiyo uliobeba ujumbe wa Mtume Muhammad (S.A.W) na amani ikimaanisha
kwamba ni hafla ya kutafakari maisha na mafundisho mbalimbali ya Mtume Muhammad
kuhusu amani.
“Mtume
Muhammad ameendelea kutuhamasisha kuwa watu wema kufanya mema na kumuabudu Mungu.
Turudi tuangalie matendo ya Mtume Muhammad (S.A.W) ambayo yalimpambanua katika
mazingira ya amani, matukio ya zamani ambayo yalikuwa yanasisitiza amani na mbinu
alizokuwa anatumia zilikuwa za kisayansi na zenye ufanisi mkubwa zinazoweza
kutumika katika karne hii ya 21 ambazo zitadumisha amani,” alisema Jaji Mkuu.
Aidha,
Mhe. Prof Juma alisema kuwa sheria zinapata nguvu kama jamii ina maadili na
maadili yanapatikana katika mafundisho ya dini na hadithi za Mtume katika
Kitabu Kitakatifu. Mwenyezi Mungu alituumba tukiwa na utofauti lakini
ametuunganisha katika amani ambayo inatuwezesha kuishi na kushirikiana katika
nchi moja ambayo ni Tanzania.
“Mtume
Muhammad alikuwa na sifa zilizokuwa zinajenga amani kwa wakati huo na
tukizifuata kwa sasa zitatusaidia kujenga amani katika nchi yetu. Sifa mojawapo
ni ya subira, sifa hii ni ya muhimu sana unapochokozwa unahitaji subira, sifa
nyingine ni usitaimilivu, uvumilivu na kupenda maridhiano ndiyo misingi wa amani,”
aliongeza Jaji Mkuu.
Pia
Mtume Muhammad alikuwa na hadithi nyingi zilizomtambulisha kuwa na tahadhali
kabla ya kutokea kitendo chochote cha uvunjifu wa amani. Kwenye masuala ya amani
tahadhari ni muhimu sana siku zote usijitayarishe kupambana na maadui zako
badala yake tumia muda mwingi kumwelekea mwenyezi Mungu kuomba kwa ajili ya amani.
“Nyakati
nyingine hakutakuwa na ujumbe wa amani katika mazingira yaliyokuwa na dhuluma,
uonevu na ukandamizaji kushiriki katika makubaliano ambayo upande mmoja hauwezi
kuyatimiza mfano; unakopa fedha mkopo unakuwa chehchefu unatafuta mbinu za
kutolipa, vitendo hivyo vyote vinakuwa ni uvunjifu wa amani,” alisisitiza Jaji
Mkuu
Jaji
Mkuu Mhe. Prof. Juma akitoa mfano mwingine wa kudumisha amani aliongelea
mkataba wa Madina ujulikanao kama Katiba ya Madina. Mkataba huo ulimpambanua
Mtume kuwa kiongozi aliyetayari kuwaongoza watu wa dini, kabila na rangi mbalimbali
waweze kuishi pamoja kama ilivyo Tanzania, “tunayo Katiba ya nchi na sheria za
nchi, katiba ya nchi inatusaidia sisi tuweze kuishi kwa amani kwa umoja na
ushirikiano kwa sababu tunawatu wa jamii mbalimbali,” aliongeza Mhe. Prof.
Juma.
Naye,
Shekhe Mkuu wa Mkoa wa Dar es salaam Alhaji Walid Omari Kawambwa alimshukuru
Jaji Mkuu wa Tanzania kwa kuitikia wito wa kuwa Mgeni Rasmi na kushiriki sherehe
za kumbukizi ya mazalia ya Mtume Muhammad S.A.W.
“Nipongeze
Jaji Mkuu kwa kutupenda, kutuheshimisha, kutujali lakini umetupatia kipaumbele
cha hali ya juu, niwakumbushe wapenda amani wote kuwa jamii ya Tanzania ina amani
na tutaendelea kubaki kuwa nchi ya amani,” aliongeza Shekhe Kawambwa.
Shekhe Kawambwa alisema kuwa, katika jamii yoyote ya kistaarabu kuishi kwa maadili ni jambo lisiloepukika na hivyo basi husaidia kuiathiri jamii moja kwenda jamii nyingine kuweza kuishi kimaadili na hatimaye nchi nzima kuwa yenye maadili na kupelekea kujiepusha nchi kukumbwa na mmomonyoko wa maadili ambao unachangia uvunjifu wa amani.
Jaji Mkuu wa Tanzania Mhe. Prof. Ibrahim Hamis Juma akiwahutubia waumini wa Dini ya Kiislamu mkoani Dar es salaam kuadhimisha swala ya kumswalia Mtume Muhammad (S.A.W) iliyobeba kauli mbiu isemayo mmomonyoko wa Maadili ni chanzo cha uvunjifu wa amani jana tarehe 15 Septemba, 2024 katika viwanja vya mnazi mmoja jijini Dar es salaam.
Hakuna maoni:
Chapisha Maoni