JUDICIARY OF TANZANIA

MAJAJI WA MAHAKAMA YA JUU ‘SUPREME COURT’ CHINA WATEMBELEA MAHAKAMA YA TANZANIA

   Mhe. Mohamed Chande Othman, Jaji Mkuu wa Tanzania akisisitiza jambo alipokuwa na ugeni wa Waheshimiwa Majaji wa Mahakama ya juu ya China walipotembelea ofisi za Mahakama ya Rufani jijini Dar es Salaam, kushoto ni Mhe. Zhang Jiannan, Jaji Kiongozi wa Mahakama ya Juu ya China, Kulia ni Mhe. Shaban Lila, Jaji Kiongozi wa Mahakama Kuu ya Tanzania. 

Baadhi ya Waheshimiwa Majaji wa Mahakama ya Juu ya China wakiwa pamoja na Maafisa Waandamizi wa Mahakama walipokuwa katika mjadala uliokuwa ukiendeshwa na Mhe. Jaji Mkuu mapema leo.

Jaji Kiongozi wa Mahakama ya Juu Nchini China Mheshimiwa Zhang Jiannan yuko Nchini kwa ziara ya kikazi yenye lengo la kuimarisha uhusiano na ushirikiano uliopo baina ya nchi za Tanzania na China.

Katika ziara yake Nchini, Mheshimiwa Jiannan ambaye anamwakilisha Jaji Mkuu wa China, leo alikutana na Jaji Mkuu wa Mahakama ya Tanzania Mheshimiwa Mohamed Chande Othman na kubadilishana uzoefu wa utendaji kazi wa Mahakama zao.

Akizungumzia changamoto za Mahakama nchini China, Mheshimiwa Jiannan alisema hivi sasa Mahakama za China zinakabiliwa na upungufu wa Majaji ikilinganishwa na idadi ya kesi zinazosajiliwa.

Kwa Upande wake, Jaji Mkuu wa Tanzania alisema baadhi ya changamoto zinazoikabili Mahakama ya Tanzania ni pamoja na upungufu wa Mahakama za mwanzo.

Alisema ili kukabiliana na upungufu huo, Tanzania inahitaji kuwa na Mahakama za Mwanzo 3000 nchi nzima. 

Hivi sasa kuna Mahakama za Mwanzo karibu 960 nchini kote ambazo hazitoshi ikilinganishwa na Idadi ya kata zilizopo Nchi mzima.Jaji Mkuu wa Tanzania alimshukuru Jaji Mkuu Kiongozi wa China kwa kuitembelea Mahakama ya Tanzania.

Katika ziara yake nchini, Jaji Jiannan ameongoza ujumbe wa Majaji na Watendaji wengine wa Mahakama wanne kutoka nchini China.

Mhe. Mohamed Chande Othman, Jaji Mkuu wa Tanzania akipokea zawadi kutoka kwa Mhe. Zhang Jiannan, Jaji Kiongozi wa Mahakama ya Juu ya China mara baada ya mazungumzo baina ya pande mbili i.e Mahama ya Tanzania na Mahakama ya Juu ya China.

    Mhe. Mohamed Chande Othman, Jaji Mkuu wa Tanzania (kulia), akimkabidhi zawadi ya sanamu ya asili kwa Mhe. Jaji Kiongozi wa Mahakama ya Juu ya China alipotembelea katika Ofisi za Mahakama ya Rufani. Lengo la ziara hiyo ni kuimarisha uhusiano na ushirikiano uliopo baina ya nchi za Tanzania na China.

Mhe. Shaban Lila, Jaji Kiongozi wa Mahakama Kuu ya Tanzania akiteta jambo na Mhe. Zhang Jiannan, Jaji Kiongozi wa Mahakama ya Juu ya China, ofisi kwake kwa Mhe. Jaji Kiongozi, ugeni huo wa China ulipata nafasi pia ya kutembelea Mahakama Kuu ya Tanzania ambapo walipata fursa ya kuelezwa mambo kadhaa juu ya utendaji kazi wa Mahakama hiyo.

  Mhe. Mohamed Chande Othman, Jaji Mkuu wa Tanzania, (katikati), Mhe. Zhang Jiannan, Jaji Kiongozi wa Mahakama ya Juu ya China (wa pili kushoto), Mhe. Mbarouk Mbarouk, Jaji wa Mahakama ya Rufani (T) (wa kwanza kushoto), Mhe. Shaban Lila, Jaji Kiongozi wa Mahakama Kuu ya Tanzania pamoja na Maafisa wengine wa Mahakama wakiwa katika picha ya pamoja na baadhi ya Wahe. Majaji wa Mahakama ya Juu ya China walipotembelea Mahakama ya Rufani mapema leo.