MAHAKAMA YA RUFANI YAHITIMISHA KIKAO CHAKE IRINGA KWA MAFANIKIO

Na ELEOTHERIUS PONERA -Mahakama, Iringa

Mahakama ya Rufani ya Tanzania iliyokuwa inaketi katika Masjala Ndogo ya Iringa, imekamilisha jukumu lake kwa ufanisi baada ya kushughulikia jumla ya mashauri 59 kwenye kikao kilichoanza tarehe 5 Oktoba, 2026 na kumalizika tarehe 30 Octoba, 2026.

Mahakama hiyo ilikuwa na Majaji wanne, wakingozwa na Mhe. Jacobs Mwambegele, aliyekuwa Mwenyekiti wa Jopo. Majaji wengine waliokuwepo ni Mhe. Dkt Paul Kihwelo, Mhe. Leila Mgonya na Mhe. Ibrahim Mzee Ibrahim.

Akiwasilisha taarifa ya utekelezaji wa kikao hicho, Naibu Msajili wa Mahakama ya Rufani ya Tanzania, Mhe. Dianes Lymo, alisema kuwa jumla ya mashauri 59 yalipangwa kusikilizwa, ikiwemo rufaa za jinai 24 , rufaa za madai 12, ombi moja la jinai na maombi ya madai 22.

“Kati ya hayo, mashauri 30 yalikuwa ni kesi za mzigo wa nyuma (Backlog) na 29 ni kesi za kuzuia mzigo (Back-stopping). Katika mwenendo wa usikilizaji, mashauri yote 59 yaliyopangwa, yalisikilizwa yote kwa asilimia 100,” alisema.

Mhe. Lyimo alieleza zaidi kuwa kati ya hayo, mashauri 44 yameamuliwa, mashauri nane yanasubiri maamuzi na mashauri saba yameahirishwa kwa sababu mbalimbali.

Mwenyekiti wa Jopo, ambaye ni Jaji wa Mahakama ya Rufani, Mhe. Jacobs Mwambegele (katikati) akizungumza kwenye kikao cha tathmini. Wengine ni Jaji wa Mahakama ya Rufani, Mhe. Dkt. Paul Kihwelo (kushoto) na Naibu Msajili, Mhe.Dianes Lymo.

Majaji wa Mahakama ya Rufani Mhe. Ibrahim Mzee Ibrahimu (kushoto) na Mhe. Leila Mngonya, wakiwa kwenye kikao hicho.

Watumishi wa Mahakama Kuu Iringa wakiongozwa na Naibu Msajili wa Mahakama, Mhe. Bernazitha Maziku, wakiwa kwenye kikao hicho.

Sehemu ya watumishi wa Mahakama na wadau wa Mahakama Iringa ikifuatilia kilichokuwa kinajiri wakati wa hicho.

Habari hii imehaririwa na FAUSTINE KAPAMA-Mahakama, Dodoma.

VIONGOZI WA TEMESA WAKUTANA NA WATUMISHI WA MAHAKAMA KUU IRINGA

Na ELEOTHERIUS PONERA-Mahakama, Iringa

Viongozi wa Wakala wa Ufundi na Umeme (TEMESA) hivi karibuni walikutana na watumishi wa Mahakaa Kuu Iringa na kuelezea majumumu wanayoyatekeleza hapa nchini.

Mkurugenzi wa TEMESA, Mhandisi Bikulamchi Liberatus, aliwaeleza watumishi hao kuwa Wakala hiyo imekuwepo nchini tangu mwaka 2006 na imekuwa ikitekeleza majukumu mbalimbali.

Alieleza baadhi ya majukumu hayo kama kufanya matengenezo ya magari, pikipiki na mitambo ya Serikali katika karakana ambazo zipo kila Mkoa, kufanya matengenezo na usimikaji wa mifumo ya umeme, taa za kuongozea magari (Traffic Signals) na taa za barabarani (Street Lights);

Mengine ni kukodisha magari kwa ajili ya usafiri wa viongozi (VIP Vehicles) yaliyopo katika Kitengo cha GTA (Government Transport Agency, kukodisha mitambo ya kuzalisha kokoto, na mitambo ya kazi za Barabara, uendeshaji wa vivuko vya Serikali na kuutoa ushauri mbalimbali.

“TEMESA imepiga hatuma na kuwa na mabadiliko makubwa kutokana na kasi ya teknolojia. Kwa sasa TEMESA tupo kidigitali tunatumia mifumo ya kisasa, ikiwemo kuwahudumia Majaji sehemu walipo,” alieleza.

 

Mkurugenzi wa TEMESA, Mhandisi Bikulamchi Liberatus akizungumza na watumishi wa Mahakama Kuu Iringa.

Sehemu ya watumishi wa Mahakama Kuu Iringa ikiwa kwenye kikao hicho.

Habari hii imehaririwa na FAUSTINE KAPAMA-Mahakama, Dodoma.

MATUMIZI YA TEHAMA MAHAKAMA GEITA YAANGAZA TANZANIA KUTOKEA KILELE CHA MLIMA KILIMANJARO

Na INNOCENT MWANDOJE-Mahakama, Geita

Kutoka katika shughuli za kila siku za utoaji wa haki hadi kilele cha juu zaidi barani Afrika, Mahakama Kuu ya Tanzania Masjala Ndogo Geita, imeendelea kuonesha kuwa ubunifu hauna mipaka.

Safari ya kupanda Mlima Kilimanjaro imegeuka kuwa jukwaa la kipekee la kuitangaza Mahakama ya Tanzania na kuufikisha ujumbe wa mafanikio ya matumizi ya Teknolojia ya Habari na Mawasiliano (TEHAMA) katika utoaji wa huduma za kimahakama kwa wakati.

Katika zama hizi ambazo teknolojia imekuwa nyenzo muhimu katika kuleta mabadiliko katika sekta mbalimbali, Mahakama Kuu ya Tanzania, Kanda ya Geita imeendelea kujipambanua kwa matumizi ya mifumo ya kidigitali katika uendeshaji na usimamizi wa mashauri pamoja na shughuli za kiutawala. Jitihada hizo zimekuwa sehemu muhimu ya kuimarisha ufanisi wa kazi na kurahisisha upatikanaji wa haki kwa wakati.

Hata hivyo, kwa Masjala ya Geita kuitangaza dhamira hiyo ya kidigitali haikubaki katika kuta za mahakama wala kwenye mifumo ya kiteknolojia pekee. Safari ya ujumbe huo ilielekezwa hadi Mlima Kilimanjaro, ambapo wazo la kipekee lilizaliwa na kutekelezwa kwa lengo la kuufikisha ujumbe huu katika kilele cha juu zaidi barani Afrika.

Wazo hilo lilianzishwa na Hakimu Mkazi wa Mahakama ya Mwanzo Kharumwa, Mhe. William Msuya, ambaye akiwa katika likizo yake ya mwaka aliamua kutumia fursa hiyo kufanya utalii wa ndani kwa kupanda Mlima Kilimanjaro.

Mbali na kutimiza azma yake ya kutalii na kujionea uzuri wa rasilimali za nchi, Mhe. Msuya aliona safari hiyo kuwa fursa adhimu ya kuitangaza Mahakama ya Tanzania, hususan Mahakama Kuu Masjla Ndogo Geita, kwa kubeba bango lenye ujumbe maalumu kuhusu mafanikio ya matumizi ya TEHAMA katika utoaji wa huduma za kimahakama.

Kwa mtazamo wake, kufikisha ujumbe huo katika kilele cha Uhuru Peak kungekuwa ishara yenye maana kubwa: kama Mlima Kilimanjaro ulivyo kilele cha Afrika, ndivyo Masjala ya Geita inavyodhamiria kuendelea kupiga hatua katika matumizi ya teknolojia ili kuboresha huduma za kimahakama.

Baada ya kulibuni wazo hilo, Mhe. Msuya alimshirikisha Naibu Msajili wa Mahakama Geita, Mhe. Fredrick Lukuna, ambaye alipongeza ubunifu huo na kuonesha kuunga mkono dhamira ya kuitangaza Taasisi kupitia ujumbe wa maendeleo ya kidigitali.

Mhe. Lukuna alibariki wazo hilo na kuunga mkono maandalizi ya bango maalumu lililolenga kuitangaza Masjala ya Geita pamoja na mafanikio yake katika matumizi ya teknolojia katika usikilizaji wa mashauri na utekelezaji wa shughuli za kiutawala.

Katika kuhakikisha kuwa ujumbe huo unawakilisha ipasavyo taswira na dhamira ya Mahakama Kuu Kanda ya Geita, Mhe. Msuya alishirikiana kwa karibu na Hakimu Mkazi Mfawidhi wa Mahakama ya Mwanzo Nyankumbu, Mhe. Ally Mgomba, katika kujadili na kuandaa maudhui ya bango hilo.

Kwa pamoja, walilenga kuandaa ujumbe mfupi wenye maana pana na unaoonesha dhamira ya Masjala ya Geita katika kuimarisha matumizi ya teknolojia, uadilifu, weledi na uwajibikaji katika utoaji wa haki.

Baada ya kukamilisha maandalizi, ujumbe huo uliwasilishwa kwa Naibu Msajili, Mhe. Lukuna ambaye aliupitisha na kuunga mkono utekelezaji wake.

Akieleza namna maandalizi hayo yalivyofanyika, Mhe. Msuya alisema kuwa ushirikiano huo ulikuwa muhimu katika kuhakikisha kuwa ujumbe uliobebwa unawakilisha vyema mafanikio na mwelekeo wa Kanda ya Geita katika matumizi ya TEHAMA.

Bango hilo lilibeba ujumbe ufuatao: “MAHAKAMA KUU KANDA YA GEITA” “Teknolojia, Uadilifu, Weledi na Uwajibikaji Madhubuti ndiyo msingi mkuu wa kurahisisha upatikanaji wa haki kwa wakati.” “GEITA TUNAFANYA TOFAUTI KIDIGITALI.”

Ujumbe huo ulikuwa na lengo la kuonesha kuwa matumizi ya teknolojia yanakwenda sambamba na misingi ya utawala bora, uwajibikaji na dhamira ya Mahakama ya kutoa huduma bora kwa wananchi.

Hatimaye, tarehe 20 Oktoba, 2026, safari ya kutekeleza dhamira hiyo ilianza chini ya usimamizi wa kampuni ya utalii ya Popote Africa Adventure Ltd. Safari hiyo ilihusisha kupanda Mlima Kilimanjaro kupitia njia maarufu ya Machame, inayotumiwa na watalii wanaotamani kufikia kilele cha mlima huo.

Kwa mujibu wa Mhe. Msuya, safari hiyo ilihusisha siku tano za kupanda mlima, huku akipitia vituo mbalimbali vya mapumziko na malazi kabla ya kuelekea katika kilele cha Uhuru Peak.

Safari hiyo haikuwa tu safari ya kawaida ya utalii. Ilikuwa safari iliyobeba dhamira ya kuitangaza Mahakama Kuu Kanda ya Geita na kuufikisha ujumbe wake katika eneo la kipekee linalotambulika duniani kote.

Kupanda mlima mrefu kama Kilimanjaro kunahitaji maandalizi, uvumilivu, nidhamu na dhamira thabiti. Kwa Mhe. Msuya, kila hatua aliyopiga kuelekea kileleni ilimsogeza karibu zaidi na kutimiza azma yake ya kufikisha ujumbe wa Mahakama Kuu Masjala Ndogo Geita katika paa la Afrika.

Kwa neema ya Mwenyezi Mungu, pamoja na maandalizi aliyokuwa amefanya, Mhe. Msuya alifanikiwa kufika katika kilele cha Uhuru Peak, sehemu ya juu kabisa ya Mlima Kilimanjaro na barani Afrika. Mafanikio hayo yalithibitishwa kwa kutunukiwa cheti rasmi kinachoonesha kuwa alikamilisha safari ya kupanda mlima huo hadi kileleni.

Kufika kileleni hakukuwa mwisho wa safari yake, bali kulikuwa wakati wa kutimiza lengo kuu lililokuwa nyuma ya safari hiyo.

Akiwa katika kilele cha Uhuru Peak, Mhe. Msuya aliinua na kuonesha bango lililobeba ujumbe wa Mahakama Kuu Geita, akiuweka ujumbe huo katika eneo lenye umuhimu mkubwa wa kijiografia na utambulisho wa Tanzania duniani.

Tukio hilo lilikuwa ishara ya ubunifu, uzalendo na dhamira ya kuitangaza taasisi ya Mahakama kupitia njia zisizo za kawaida. Lilionesha namna watumishi wa umma wanavyoweza kutumia vipaji, mawazo na fursa mbalimbali kuhamasisha maendeleo ya taasisi zao na kuonesha mafanikio yaliyofikiwa katika maeneo yao ya kazi.

Kupitia kaulimbiu ya “Geita Tunafanya Tofauti Kidigitali,” Masjala ya Geita ililenga kuonesha dhamira yake ya kuendelea kuendana na mabadiliko ya teknolojia katika usikilizaji wa mashauri na usimamizi wa shughuli za kiutawala.

Kama vile Mlima Kilimanjaro unavyoendelea kuitangaza Tanzania duniani kwa kuwa mlima mrefu zaidi barani Afrika, ujumbe wa Mahakama Geita nao ulipata fursa ya kuonekana katika kilele hicho maarufu, ukiwasilisha dhamira ya kuboresha utoaji wa huduma za kimahakama kupitia matumizi ya TEHAMA.

Kwa namna hiyo, safari ya Mhe. Msuya iliunganisha mambo mawili yenye umuhimu kwa Taifa: kuitangaza taasisi ya Mahakama na kuhamasisha matumizi ya teknolojia katika kuboresha huduma kwa wananchi.

Mbali na kuitangaza Mahakama Geita, safari hiyo ilikuwa na lengo jingine muhimu la kuhamasisha utalii wa ndani miongoni mwa watumishi wa umma na Watanzania kwa ujumla.

Tanzania imebarikiwa kuwa na vivutio vingi vya utalii vinavyotambulika kimataifa, vikiwemo Mlima Kilimanjaro, ambao huvutia wageni kutoka sehemu mbalimbali duniani. Hata hivyo, kuhamasisha Watanzania wengi zaidi kutembelea na kujionea vivutio hivyo ni njia mojawapo ya kuongeza uelewa kuhusu utajiri wa rasilimali za nchi na kukuza utamaduni wa utalii wa ndani.

Kupitia safari yake, Mhe. Msuya alionesha kuwa watumishi wa umma wanaweza kutumia likizo zao kushiriki shughuli za utalii, kujifunza mambo mapya, kujenga afya ya mwili na akili, pamoja na kuitangaza nchi na taasisi wanazozitumikia.

Safari hiyo inatoa hamasa kwa watumishi wengine na Watanzania kwa ujumla kuthamini vivutio vya ndani na kutumia fursa zilizopo kujionea maajabu ya nchi yao.

Akizungumza kuhusu mafanikio ya safari hiyo, Mhe. Msuya alitoa shukrani kwa Uongozi wa Mahakama Geita kwa kuendelea kujenga mazingira yanayohamasisha ubunifu, uzalendo na jitihada za kuitangaza taasisi ya Mahakama.

Pia alimshukuru Jaji Mfawidhi wa Mahakama Kuu ya Tanzania, Masjala Ndogo Geita Mhe. Projestus Kahyoza, ambaye ni mlezi wa Masjala hiyo, kwa uongozi wake makini na imani aliyompa. Alieleza kuwa Jaji Mfawidhi alimpa baraka zake na kumuombea safari njema na salama tangu mwanzo hadi mwisho wa safari hiyo.

Vilevile, alimshukuru Mhe. Ally Mgomba kwa mawazo yake chanya na mchango wake katika kujadili na kuandaa ujumbe uliobebwa hadi katika kilele cha Mlima Kilimanjaro.

Shukrani hizo zinaonesha umuhimu wa ushirikiano katika kufanikisha mawazo yenye lengo la kuleta matokeo chanya. Wazo lililoanzishwa na mtumishi mmoja liliweza kupata uungwaji mkono wa viongozi na ushirikiano wa watumishi wengine, na hatimaye kutekelezwa katika eneo lililolipa tukio hilo uzito wa kipekee.

Ujumbe wa “Geita Tunafanya Tofauti Kidigitali” ulipofika katika kilele cha Mlima Kilimanjaro, haukuwakilisha tu mafanikio ya safari ya mtu mmoja, bali pia dhamira ya kuendelea kuimarisha matumizi ya TEHAMA katika kuboresha ufanisi wa shughuli za kimahakama na kiutawala.

Kwa hakika, kilele cha Mlima Kilimanjaro kimekuwa jukwaa la kipekee la kuufikisha ujumbe wa Mahakama Geita kwa Watanzania na dunia kwa ujumla: Geita inafanya tofauti kidigitali, ikidhamiria kuendelea kutumia teknolojia kama nyenzo ya kuboresha huduma za kimahakama na kurahisisha upatikanaji wa haki kwa wakati.

Hakimu Mkazi, Mhe. Kharumwa Msuya, akiwa Machame Gate, eneo la kuanzia kupanda mlima Kilimanjaro.

Mhe. Kharumwa Msuya pamoja na kampuni ya utalii ya Popote Africa Adventure Ltd wakiwa katika kituo cha Machame Camp, mahali ambapo walilala kwa usiku mmoja na kuendelea na safari asubuhi iliyofuata.

Mhe. Kharumwa Msuya pamoja na kampuni ya utalii ya Popote Africa Adventure Ltd wakiwa katika kituo cha Shira Cave Camp.

Lava Tower Camp, kituo hiki si cha kulala bali Mhe. Msuya alikula na kupumnzika tu kisha akaendelea na safari.

Mhe. Kharumwa Msuya alifika Baranco Camp siku ya tatu ya safari, hiki ni kituo cha nne katika kupanda mlima Kilimanjaro.

Karanga Camp, siku ya nne kwenye safari ya kupanda mlima Kilimanjaro Mhe. Msuya alilala katika kituo hiki.

Siku ya tano Mhe. Kharumwa Msuya pamoja na kampuni ya utalii ya Popote Africa Adventure Ltd walilala Barafu Camp, hapa ni kituo cha mwisho cha kulala kabla ya kufika kwenye kilele cha mlima Kilimanjaro.

Hapa ni Kituo cha Stella Point ambacho unapita kabla ya kufika Uhuru Peak au Kilimanjaro Summit. Hii ni siku sita asubuhi.

Bango lililobeba ujumbe wa “Geita Tunafanya Tofauti Kidigitali” likipepea katika kilele cha Mlima Kilimanjaro (Uhuru Peak).

Mhe. Kharumwa Msuya akipeperusha bango lenye ujumbe kutoka Mahakama Kuu ya Tanzania, Kanda ya Geita kwenye kilele cha mlima Kilimanjaro.

Mhe. Kharumwa Msuya akiwa Mweka Gate, kituo ambacho vyeti hutolewa kwa wote waliofanikiwa kufika kwenye kilele cha mlima Kilimanjaro.

 Picha ya Cheti rasmi alichopatiwa Mhe. Msuya baada ya kufanikiwa kufika kilele cha mlima Kilimanjaro.

Makala hii imehaririwa na FAUSTINE KAPAMA-Mahakama, Dodoma.

 

MASJALA NDOGO SABA ZA MAHAKAMA KUU ZAKUTANA MANYARA KWENYE BONANZA LA KIHISTORIA

Na CHRISTOPHER MSAGATI - Mahakama, Manyara.

Mahakama Kuu ya Tanzania, Masjala Ndogo ya Manyara, imeandaa Bonanza la michezo lililowakutanisha watumishi kutoka Masjala Ndogo saba za Mahakama Kuu pamoja na wadau mbalimbali, katika tukio lililoelezwa kuwa la kwanza kufanyika kwa ukubwa huo katika historia ya Mahakama nchini.

Bonanza hilo lilifanyika tarehe 31 Oktoba 2026, katika Uwanja wa Tanzanite Kwaraa, wilayani Babati, na kushirikisha Masjala Ndogo za Manyara, Arusha, Moshi, Dodoma, Singida, Shinyanga na Tabora. Wadau wengine walioshiriki ni Jeshi la Polisi, Jeshi la Magereza, Ofisi ya Taifa ya Mashtaka (NPS), Mawakili wa Kujitegemea na Kampuni ya Mati Superbrands ya mkoani Manyara.

Akizungumza wakati wa bonanza hilo, Jaji Mfawidhi wa Mahakama Kuu, Masjala Ndogo ya Manyara, Mhe. Dkt. Adam Mambi, alisema lengo la kuandaa tukio hilo ni kuimarisha mahusiano baina ya watumishi wa Mahakama, kuwajengea fursa ya kufahamiana na kukuza afya zao kupitia michezo.

Alieleza kuwa mikusanyiko ya aina hiyo ni muhimu kwa watumishi kwa kuwa inawawezesha kujenga mshikamano na kudumisha afya bora, jambo linaloweza kuwasaidia katika kutekeleza majukumu yao ya kila siku.

Kwa upande wake, Mkuu wa Wilaya ya Mbulu, Mhe. Mbwana Kambangwa, aliyemwakilisha Mkuu wa Mkoa wa Manyara, Mhe. Martin Shigela, alisema Mahakama ina nafasi muhimu katika jamii, hivyo shughuli za kimichezo ni njia mojawapo ya kuimarisha mahusiano na ushirikiano miongoni mwa watumishi wake.

Aidha, aliipongeza Mahakama kwa kuandaa bonanza hilo na kueleza kuwa Serikali itaendelea kushirikiana na Mahakama katika shughuli zinazolenga kuboresha ufanisi na kuimarisha ushirikiano kati ya mihimili hiyo miwili.

Washiriki walishindana katika michezo mbalimbali, ikiwemo mpira wa miguu, mpira wa pete, riadha, kuvuta kamba, kukimbiza kuku, kukimbia na yai kwa kutumia kijiko, mbio za magunia, kucheza muziki, kutambua ladha za soda, pool table na drafti. Washindi walikabidhiwa makombe na medali baada ya kukamilika kwa mashindano.

Katika matokeo ya mashindano hayo, Masjala Ndogo ya Shinyanga ilishinda mchezo wa mpira wa miguu, huku Dodoma ikiibuka mshindi wa mpira wa pete. Masjala Ndogo ya Moshi ilipata ushindi katika mchezo wa kuvuta kamba kwa wanawake na wanaume, pamoja na pool table.

Masjala Ndogo ya Manyara, ambayo ilikuwa mwenyeji, ilifanya vizuri katika michezo mbalimbali, ikiwemo kukimbia na yai kwa kutumia kijiko, mbio za magunia, kukimbiza kuku, riadha ya mita 1,500, drafti na bao.

Katika ushindani wa mchezo wa kukimbiza kuku kwa Majaji wa Kike, Jaji wa Mahakama Kuu, Masjala Ndogo ya Manyara, Mhe. Devotha Kamuzora, aliibuka mshindi. Kwa upande Majaji wa Kiume Jaji Mfawidhi wa Mahakama Kuu, Masjala Ndogo ya Arusha, Mhe. Frank Mahimbali, aliibuka mshindi mchezo wa kukimbiza kuku na mchezo wa mbio fupi.

Kutokana na kufanya vizuri katika michezo mbalimbali, Masjala Ndogo ya Manyara ilikabidhiwa kombe la mshindi wa jumla baada ya kupata ushindi katika michezo mingi zaidi ikilinganishwa na Masjala nyingine zilizoshiriki.

Akizungumzia mipango ya baadae, Mahakama Kuu, Masjala Ndogo ya Manyara, ilieleza kuwa ina mpango wa kuandaa bonanza jingine litakalokuwa kubwa zaidi na kushirikisha idadi kubwa ya Masjala za Mahakama pamoja na wadau wengine. Bonanza hilo limeweka msisitizo katika umuhimu wa michezo kama nyenzo ya kuimarisha afya, mshikamano na ushirikiano miongoni mwa watumishi wa Mahakama na wadau wake.

Jaji Mfawidhi wa Mahakama Kuu, Masjala Ndogo ya Manyara, Mhe Dkt. Adam Mambi akitoa neno la ufunguzi katika Bonanza la michezo lililokutanisha Masjala Ndogo saba za Mahakama Kuu.

Wachezaji wa mchezo wa mpira wa pete kutoka Mahakama Kuu Masjala Ndogo ya Manyara wenye nguo za rangi ya kijani wakichuana vikali na timu ya Mahakama Kuu, masjala Ndogo ya Tabora.

Nahodha wa timu ya kuvuta Kamba kwa upande wa Wanaume kutoka Mahakama Kuu, Masjala Ndogo ya Moshi akikabidhiwa Kombe baada ya timu yake kushinda

Wachezaji wa mchezo wa Pool table kutoka Mahakama Kuu Masjala Ndogo ya Shinyanga wakichuana vikali na wenzao kutoka Mahakama Kuu Masjala Ndogo ya Dodoma

Timu za mpira wa miguu ya Mahakama Kuu, Masjala Ndogo ya Manyara na Tabora zikikaguliwa na mgeni rasmi kabla ya kuanza kwa mechi.

Jaji wa Mahakama Kuu, Masjala Ndogo ya Manyara Mhe. Devotha Kamuzora akimuonesha kwa furaha kuku wake aliyefanikiwa kushinda katika mbio za kukimbiza kuku upande wa Majaji Wanawake.

Timu ya mchezo wa kuvuta Kamba kwa upande wa wanawake kutoka Mahakama Kuu Masjala ndogo ya Moshi wakichuana vikali na wenzao wa Mahakama Kuu, Masjala ndogo ya Shinyanga hawapo pichani.

Sehemu ya watumishi wa Mahakama Kuu kutoka Masjala Ndogo Saba wakifanya mazoezi ya viungo katika viwanja vya Tanzanite Kwaraa kabla ya kuanza kwa Michezo kwenye Bonanza.

Sehemu ya watumishi wa Mahakama Kuu kutoka Masjala Ndogo mbalimbali, wakiwa jukwaani wakifuatilia michezo ikiendelea uwanjani.

(Habari Hii Imehaririwa na Innocent kansha & James Busanya - Mahakama)

JAJI MKUU ASHIRIKI HAFLA YA UZINDUA WA MJI WA SERIKALI MTUMBA

Na INNOCENT KANSHA - MAHAKAMA

Jaji Mkuu wa Jamhuri ya Muungano wa Tanzania, Mhe. George M. Masaju amewaongoza Viongozi Waandamizi wa Mahakama ya Tanzania na Watumishi kushiriki katika Hafla ya Uzinduzi wa Majengo ya Ofisi, Wizara, Taasisi za Serikali na Barabara za Lami zenye urefu wa kilomita 57.1 zinazozunguka katika Mji wa Serikali Mtumba jijini Dodoma leo tarehe 30 Oktoba, 2026.

Aidha, Hafla hiyo ya uzinduzi wa Mji wa Serikali Mtumba iliyofanywa na Mgeni Rasmi Rais wa Jamhuri ya Muungano wa Tanzania, Mhe. Dkt. Samia Suluhu Hassan akiambatana na Mgeni wake Maalum Rais wa Jamhuri ya Angola, Mhe. João Manuel Gonçalves Lourenço iliangazia maeneo kadhaa ikiwemo Kuzindua Barabara za Lami zenye urefu wa kilomita 57.1, Kufanya ziara fupi ya Mji wa Serikali, Kupanda mti, Kuzindua Majengo ya Ofisi, Wizara na Taasisi za Serikali.

Vilevile, shughuli nyingine zilizofanyika katika hafla hiyo na Rais wa Jamhuri ya Muungano wa Tanzania Mhe. Dkt. Samia Suluhu Hassan ni kumuonesha Rais wa Jamhuri ya Angola Mhe. João Manuel Gonçalves Lourenço, Kiwanja cha Ubalozi wa Jamhuri ya Angola na pia Eneo la uzinduzi wa Barabara yenye jina la Rais wa kwanza wa Jamhuri ya Angola Mhe. Agostinho Neto.  

Sehemu ya Viongozi waandamizi wa Mahakama ya Tanzania walioshiriki hafla hiyo ya uzinduni wa Mji wa Serikali Mtumba ni Jaji Kiongozi wa Mahakama Kuu ya Tanzania, Mhe. Dkt. Mustapher Mohamed Siyani, Jaji Mfawidhi wa Mahakama Kuu Masjala Ndogo Dodoma, Mhe. Joachim Charles Tiganga na Msajili Mkuu wa Mahakama ya Tanzania, Mhe. Eva Nkya.

Viongozi wengine walioshiriki hafla hiyo ni Naibu Msajili Mwandamizi wa Mahakama Kuu, Masjala Kuu, Mhe. Sundi Fimbo, Naibu Msajili wa Mahakama Kuu na Katibu wa Jaji Mkuu, Mhe. Venance Mlingi, Naibu Msajili wa Mahakama Kuu Masjala Ndogo ya Dodoma, Mhe. Upendo Ngitiri na Naibu Msajili wa Mahakama Kuu na Naibu Katibu wa Jaji Kiongozi, Mhe. Mussa Hamza.

Hafla hiyo ilianza saa 5 na nusu asubuhi na kuhitimishwa saa nane kamili mchana baada ya kukamilisha shughuli zote zilizokuwa zimeandaliwa kufanywa na Rais wa Jamhuri ya Muungano wa Tanzania, Mhe. Dkt. Samia Suluhu Hassan akiambatana na Mgeni wake Maalum Rais wa Jamhuri ya Angola, Mhe. João Manuel Gonçalves Lourenço katika hafla hiyo ya uzindizi wa Mji wa Serikali Mtumba jijini Dodoma.

Jaji Mkuu wa Jamhuri ya Muungano wa Tanzania, Mhe. George M. Masaju akiwa ameketi Meza Kuu wakati wa Hafla ya Unzinduzi wa Majengo ya Ofisi, Wizara, Taasisi za Serikali na Barabara za Lami zenye urefu wa kilomita 57.1 zinazozunguka katika Mji wa Serikali Mtumba jijini Dodoma, kushoto kwake ni Rais Mstaafu wa awamu ya nne wa Jamhuri ya Muungano wa Tanzania, Mhe. Dkt. Mrisho Jakaya Kikwete. 

Jaji Mkuu wa Jamhuri ya Muungano wa Tanzania, Mhe. George M. Masaju akisalimiana na Viongozi mbalimbali wa Serikali mara baada ya kuwasili kwenye Hafla ya Unzinduzi wa Majengo ya Ofisi, Wizara, Taasisi za Serikali na Barabara za Lami zenye urefu wa kilomita 57.1 zinazozunguka katika Mji wa Serikali Mtumba jijini Dodoma leo tarehe 30 Oktoba, 2026.

Jaji Kiongozi wa Mahakama Kuu ya Tanzania, Mhe. Dkt. Mustapher Mohamed Siyani, (wa kwanza kulia) akiteta jambo wakati wa hafla ya uzinduzi wa Mji wa Serikali Mtumba , (katikati) ni Jaji Mfawidhi wa Mahakama Kuu Masjala Ndogo Dodoma, Mhe. Joachim Charles Tiganga na kushoto ni Msajili Mkuu wa Mahakama ya Tanzania, Mhe. Eva Nkya. 

Jaji Kiongozi wa Mahakama Kuu ya Tanzania, Mhe. Dkt. Mustapher Mohamed Siyani akifuatilia shughuli mbalimbali zilizokuwa zikiendelea katika hafla ya uzinduzi wa Mji wa Serikali Mtumba jijini Dodoma.

Msajili Mkuu wa Mahakama ya Tanzania, Mhe. Eva Nkya akifuatilia shughuli mbalimbali zilizokuwa zikiendelea katika hafla ya uzinduzi wa Mji wa Serikali Mtumba jijini Dodoma.

Jaji Kiongozi wa Mahakama Kuu ya Tanzania, Mhe. Dkt. Mustapher Mohamed Siyani, (wa kwanza kulia) akifurahia jambo wakati wa hafla ya uzinduzi wa Mji wa Serikali Mtumba , (katikati) ni Jaji Mfawidhi wa Mahakama Kuu Masjala Ndogo Dodoma, Mhe. Joachim Charles Tiganga na kushoto ni Msajili Mkuu wa Mahakama ya Tanzania, Mhe. Eva Nkya. 

Jaji Kiongozi wa Mahakama Kuu ya Tanzania, Mhe. Dkt. Mustapher Mohamed Siyani, (wa kwanza kulia) akifurahia jambo wakati wa hafla ya uzinduzi wa Mji wa Serikali Mtumba , (katikati) ni Jaji Mfawidhi wa Mahakama Kuu Masjala Ndogo Dodoma, Mhe. Joachim Charles Tiganga na kushoto ni Msajili Mkuu wa Mahakama ya Tanzania, Mhe. Eva Nkya. 

MAHAKAMA SINGIDA YATOA ELIMU YA MADHARA YA MILA POTOFU, KUJICHUKULIA SHERIA MKONONI

Na EVA LESHANGE & AMIRI BAKARI, Mahakama – Singida

Mahakama Kuu ya Tanzania Masjala Ndogo Singida imeendelea kutoa elimu ya sheria kwa umma kwa lengo la kuongeza uelewa wa wananchi kuhusu sheria, haki zao za msingi, wajibu wao katika jamii, madhara ya mila na desturi zinazokiuka haki za binadamu pamoja na hatari za kujichukulia sheria mkononi.

Elimu hiyo ilitolewa na Jaji Mfawidhi wa Mahakama Kuu ya Tanzania, Kanda ya Singida Mhe. Ayoub Mwenda akishirikiana na Watumishi wengine wa Mahakama, tarehe 24, Oktoba 2026 katika eneo la Mnada wa Njiapanda ya Arusha, Manispaa ya Singida.

Akizungumza wakati wa kutoa elimu hiyo, Mhe. Mwenda aliwataka wananchi kuachana na mila na desturi zilizopitwa na wakati ambazo zinakiuka sheria za nchi, misingi ya haki za binadamu na utu wa kila mtu.

Alieleza kuwa, mila na desturi zilizopitwa na wakati zimekuwa zikichangia migogoro katika jamii, kukinzana na sheria za nchi, ukiukwaji wa haki za binadamu na vitendo vinavyoathiri ustawi wa wananchi, huku akasisitiza umuhimu wa jamii kuzingatia sheria, kuheshimu utu, usawa na  haki za kila mmoja.

"Jamii inapaswa kutambua kuwa maendeleo ya taifa yanategemea kuheshimu sheria, haki na utu wa kila mtu. Mila na desturi zinazochochea migogoro, ubaguzi au kukiuka haki za watu hazina nafasi katika Tanzania ya sasa” alisema Mhe. Mwenda.

Aidha, Jaji Mwenda aliwakumbusha wananchi kuepuka kujichukulia sheria mikononi na badala yake kutumia vyombo vya dola na Taasisi za utoaji haki kutatua migogoro na kudai haki zao kwa mujibu wa sheria.

Alifafanua kuwa, kujichukulia sheria mikononi ni kitendo kinachoweza kusababisha uvunjifu wa amani, kusababisha majeraha, uharibifu wa mali na hata kupoteza maisha, huku akisisitiza kuwa wananchi wanapaswa kuwasilisha malalamiko yao katika mamlaka husika ili hatua stahiki zichukuliwe kwa mujibu wa sheria za nchi.

“Vilevile, tunawasihi Wananchi kuepuka kujichukulia sheria mikononi na badala yake kutumia vyombo vya dola na Mahakama kutafuta haki kwa mujibu wa sheria," alisisitiza Mhe. Mwenda.

Katika hatua nyingine, wananchi walipata fursa ya kuuliza maswali mbalimbali yanayohusu masuala ya kisheria na kupata ufafanuzi kutoka kwa Watumishi wa Mahakama. Fursa ambayo iliwawezesha kuongeza uelewa kuhusu haki zao, wajibu wao na taratibu za kisheria zinazopaswa kufuatwa katika kutatua changamoto mbalimbali zinazowakabili.

Zoezi hilo la kutoa elimu, ni sehemu ya juhudi za Mahakama Kuu ya Tanzania, Kanda ya Singida, katika kusogeza huduma za elimu ya Sheria karibu na Wananchi, kuimarisha uelewa wa sheria na kuhamasisha matumizi ya njia halali katika kutafuta haki.

Jaji Mfawidhi wa Mahakama Kuu ya Tanzania Masjala Ndogo Singida, Mhe. Ayoub Mwenda (katikati) akizungumza hivi karibuni na Wananchi wakati wa utoaji wa elimu ya sheria katika mnada wa Njiapanda ya Arusha mjini Singida.

Mhe. Fadhili Luvinga (wa kwanza kushoto), Mhe. Aloyce Masua (katikati) na Mhe. Ferdinand Njau (kulia) wakitoa elimu ya sheria kwa Wananchi na Wafanyabiashara walioko eneo la Mnada wa Njiapanda ya Arusha, Manispaa ya Singida

Wakili Laurent Mbuya (kushoto), Lawi Joas (katikati) na Doris Busanji (kulia) wakizungumza na Wananchi wa mnada wa Njiapanda ya Arusha mjini Singida wakati wa utoaji wa elimu ya sheria uliofanyika hivi karibuni.

Mhe. Modesta Mshana (wa kwanza kushoto) na Mhe. Said Said (aliyavaa T-shirt ya bluu) wakitoa elimu ya sheria kwa Walimu wa Shule ya Sekondari Paloti iliyopo Mnada wa Njiapanda ya Arusha, Manispaa ya Singida.

Zoezi la utoaji elimu ya madhara ya mila potofu na kujichukulia sheria mkononi likiendelea.

 

Watumishi wa Mahakama Kuu ya Tanzania Masjala Ndogo Singida, wakiwa katika picha ya pamoja baada ya zoezi la utoaji wa elimu ya Sheria kwa Wananchi wa eneo la Mnada wa Njiapanda ya Arusha mjini Singida.

(Habari hii imehaririwa na HABIBA MBARUKU, Mahakama-Dodoma)

 

 

 

 

 

 

 

JAJI MKUU AFANYA ZIARA YA KIKAZI KITUO JUMUISHI CHA MASUALA YA FAMILIA-TEMEKE

•  Afanya mazungumzo na Watumishi wa Mahakama hiyo

Jaji Mkuu wa Jamhuri ya Muungano wa Tanzania, Mhe. George Masaju jana tarehe 28 Oktoba, 2026 alitembelea Kituo Jumuishi cha Masuala ya Familia-Temeke Dar es Salaam kwa ziara ya kikazi. 

Katika ziara hiyo, Mhe. Masaju amefanya mazungumzo  na watumishi wa Mahakama hiyo.

Matukio katika picha ya ziara ya Jaji Mkuu wa Jamhuri ya Muungano wa Tanzania, Mhe. George Masaju alipotembelea Kituo Jumuishi cha Masuala ya Familia-Temeke jijini Dar es Salaam tarehe 28 Oktoba, 2026.

Jaji Mkuu wa Jamhuri ya Muungano wa Tanzania, Mhe. George Masaju akisaini Kitabu cha Wageni alipowasili katika Ofisi ya Jaji Mfawidhi wa Kituo Jumuishi cha Masuala ya Familia-Temeke alipotembelea Mahakama hiyo tarehe 28 Oktoba, 2026 kwa ziara ya kikazi.

Jaji Mkuu wa Jamhuri ya Muungano wa Tanzania, Mhe. George Masaju (aliyeketi mbele) akifanya mazungumzo na Majaji na Mtendaji wa Kituo Jumuishi cha Masuala ya Familia-Temeke alipotembelea Mahakama hiyo tarehe 28 Oktoba, 2026 kwa ziara ya kikazi.

Jaji Mkuu wa Jamhuri ya Muungano wa Tanzania, Mhe. George Masaju akizungumza na Watumishi wa Kituo Jumuishi cha Masuala ya Familia-Temeke  (hawapo katika picha) alipotembelea Mahakama hiyo tarehe 28 Oktoba, 2026.

Jaji Mkuu wa Jamhuri ya Muungano wa Tanzania, Mhe. George Masaju (katikati) akiwa pamoja na Majaji wa Kituo Jumuishi cha Masuala ya Familia-Temeke alipokuwa akizungumza na Watumishi wa Mahakama hiyo (hawapo katika picha) tarehe 28 Oktoba, 2026 alipotembelea Mahakama hiyo kwa ziara ya kikazi. Wa pili kushoto ni Jaji Mfawidhi wa Kituo Jumuishi cha Masuala ya Familia-Temeke, Mhe. Mwanabaraka Mnyukwa, wa pili kulia ni Mhe. Gladys Barthy, wa kwanza kushoto ni Mhe. Asina Omari na wa kwanza kulia ni Mhe. Sarah Mwaipopo. 

Makundi ya Watumishi wa Mahakama Kituo Jumuishi cha Masuala ya Familia Temeke wakimsikiliza Jaji Mkuu wa Jamhuri ya Muungano wa Tanzania, Mhe. George Masaju (hayupo katika picha) alipokuwa akizungumza na Watumishi hao alipotembelea Mahakama hiyo tarehe 28 Oktoba, 2026 jijini Dar es Salaam.

Jaji Mfawidhi wa Kituo Jumuishi cha Masuala ya Familia-Temeke, Mhe. Mwanabaraka Mnyukwa akizungumza jambo wakati wa kikao kati ya Jaji Mkuu (hayupo katika picha) na Watumishi wa Mahakama hiyo alipofanya ziara tarehe 28 Oktoba, 2026.

Jaji wa Kituo Jumuishi cha Masuala ya Familia-Temeke, Mhe. Gladys Barthy akizungumza jambo wakati wa kikao kati ya Jaji Mkuu (hayupo katika picha) na Watumishi wa Mahakama hiyo alipofanya ziara tarehe 28 Oktoba, 2026.

Jaji wa Kituo Jumuishi cha Masuala ya Familia-Temeke, Mhe. Gladys Barthy akizungumza jambo. Katikati ni Jaji Mkuu wa Jamhuri ya Muungano wa Tanzania, Mhe. George Masaju na kushoto ni Jaji Mfawidhi wa Kituo Jumuishi cha Masuala ya Familia-Temeke, Mhe. Mwanabaraka Mnyukwa.

Mtendaji wa Mahakama-Kituo Jumuishi cha Masuala ya Familia-Temeke, Bw. Samson Mashalla akizungumza jambo wakati wa Kikao cha Jaji Mkuu na Watumishi wa Kituo hicho.

Mtendaji wa Mahakama-Kituo Jumuishi cha Masuala ya Familia-Temeke, Bw. Samson Mashalla (kulia) akijadili jambo na Naibu Msajili wa Kituo Jumuishi cha Masuala ya Familia-Temeke, Mhe. Frank Moshi.

Jaji Mkuu wa Jamhuri ya Muungano wa Tanzania, Mhe. George Masaju (kushoto) akisalimiana na Majaji wa Kituo Jumuishi cha Masuala ya Familia-Temeke alipotembelea Mahakama hiyo tarehe 28 Oktoba, 2026 kwa ziara ya kikazi.

Jaji Mkuu wa Jamhuri ya Muungano wa Tanzania, Mhe. George Masaju akiwa katika picha ya pamoja na sehemu ya Watumishi wa Kituo Jumuishi cha Masuala ya Familia-Temeke alipotembelea Mahakama hiyo tarehe 28 Oktoba, 2026 kwa ziara ya kikazi.

(Picha na BAKARI MTAULLAH)