JOPO LA MAJAJI WA RUFANI LAFANYA KIKAO NA MAOFISA MAHAKAMA MBEYA

Na MUKSINI NAKUVAMBA – Mahakama, Mbeya 

Jopo la Majaji wa Mahakama ya Rufani Tanzania limekutana na Mahakimu wa Mahakama ya Hakimu Mkazi, Wilaya na Mahakama za Mwanzo zilizopo jijini Mbeya kwa ajili kuwajengea na kuimarisha uwezo wao wa kitaaluma na kuwakumbusha umuhimu wa kuzingatia weledi na kulinda maadili wanapotekeleza majukumu yao.

Aidha, Jopo hilo limewasisitiza Mahakimu hao kuzingatia matumizi ya Teknolojia ya Habari na Mawasiliano (TEHAMA) pamoja na kujifunza kwa kuzingatia uzoefu wa wengine katika  usikilizaji wa mashauri, uandaaji wa mienendo ya mashauri na uandishi wa hukumu ili kuboresha ufanisi katika utoaji haki.

Akizungumza katika kikao hicho, Jaji wa Mahakama ya Rufani Tanzania, Mhe. Amour Said Khamis, alisisitiza umuhimu wa Mahakimu kulinda heshima na hadhi ya taaluma ya sheria kwa kuzingatia maadili mema katika maisha yao ya kikazi na kijamii inayowazunguka. Ameongeza kuwa, Mahakimu wana nafasi muhimu katika jamii na hivyo wanapaswa kuwa mfano bora wa uadilifu na mwenendo unaostahili.

“Hakimu anatazamwa na watu wengi wanaomzunguka. Hakimu ni mtu mwenye heshima kubwa katika jamii yetu. Tujitahidi sana kulinda heshima zetu na tujikite sana katika kulinda maadili mema, iwe ndiyo utamaduni wetu,” alisema Mhe. Khamis.

Aidha, Mhe. Khamis aliwataka Mahakimu kujenga utamaduni wa kupendana, kushirikiana na kusaidiana katika utekelezaji wa majukumu yao, akibainisha kuwa ushirikiano ni nyenzo muhimu ya kuongeza maarifa, kutatua changamoto na kuboresha utendaji kazi ndani ya Mahakama.

“Huhitaji kumzungumzia mwenzako vibaya mbele yake au mbele ya jamii. Tupendane na tusaidiane, Mahakama ni familia moja. Pale unapoona kwako kuna mapungufu na mwenzako anajua, jifunze kutoka kwake,” alisisitiza Mhe. Khamis.

Katika hatua nyingine, Jopo hilo liliwahimiza Mahakimu kutumia kikamilifu fursa zinazotokana na matumizi ya TEHAMA, hususani mfumo wa TanzLII, kwa ajili ya kupata na kujifunza kupitia hukumu mbalimbali zilizotolewa na Mahakama za juu na hasa Mahakama ya Rufani ya Tanzania. Ilielezwa kuwa kujisomea hukumu hizo kutawasaidia kupanua uelewa wa kisheria, kuboresha uchambuzi wa masuala ya Sheria na kuimarisha ubora wa hukumu wanazoziandika.

Kwa upande wake, Naibu Msajili wa Mahakama ya Rufani Tanzania, Mhe. Abeesiza Laurean Kalegeya, aliwataka Mahakimu kuwa na ari ya maendeleo ya kitaaluma kwa kujifunza kutoka kwa wenzao wenye uzoefu na maarifa zaidi.

Mhe. Kalegeya alisisitiza pia umuhimu wa kupendana, kuheshimiana na kukosoana kwa ukweli na kwa nia ya kujenga, akieleza kuwa utamaduni huo utasaidia kuongeza ufanisi na kuimarisha mahusiano ya kikazi. 

Mwenyekiti wa Jopo la Majaji hao wa Mahakama ya Rufani Mhe. Zephrine Nyalugenda Galeba aliwashukuru Mahakimu kwa ushiriki wao na kuwataka kuendelea kulinda na kuinua thamani ya taaluma ya sheria kwa kuzingatia uadilifu, nidhamu na mwenendo mwema.

Mhe. Galeba alisisitiza kuwa, Mahakimu wanapaswa kujiepusha na vitendo vya rushwa na kutambua wajibu wao mkubwa katika kulinda haki na kuimarisha imani ya wananchi kwa Mahakama. 

“Taaluma ya Sheria ni taaluma ya umashuhuri na umaarufu. Tunatakiwa kuchunga kila hatua ya maisha yetu, tusimamie haki, tuwe waadilifu na tuwe na tabia njema katika jamii zetu,” alisisitiza Mhe. Galeba.

Kikao hicho kilihudhuriwa pia na viongozi wa Mahakama Masjala ya Mbeya wakiwemo Kaimu Jaji Mfawidhi wa Mahakama Kuu, Masjala Ndogo ya Mbeya, Mhe. Angaza Ernest Mwipopo, Jaji wa Mahakama Kuu, Masjala Ndogo ya Mbeya, Mhe. Said Mashaka Kalunde pamoja na Naibu Msajili wa Mahakama Kuu, Masjala Ndogo ya Mbeya, Mhe. Bernard Abel Mpepo.

Jopo la Majaji wa Mahakama ya Rufani Tanzania wakiongozwa na Mwenyekiti wa Jopo hilo, Jaji wa Rufaa ya Tanzania Mhe. Zephrine Nyalugenda Galeba (katikati) akiendesha kikao na Maofisa Mahakama wa jijini Mbeya, kushoto ni Jaji wa Mahakama ya Rufani Mhe. Amour Said Khamis na kulia ni Jaji wa Mahakama ya Rufani Mhe. Rabia Hussein Mohamed.

Naibu Msajili wa Mahakama ya Rufani Mhe. Abeesiza Lurean Kalegeya (aliyesimama) akizungumza katika kikao hicho, Kulia ni Naibu Msajili Mahakama Kuu Masjala Ndogo ya Mbeya Mhe. Benard Abel Mpepo.

Sehemu ya Maofisa Mahakama walioshiriki katika kikao hicho wakifuatilia kwa makini nasaa mbalimbali zilizokuwa zikitolewa wakati wa kikao hicho.

Sehemu ya Maofisa Mahakama walioshiriki katika kikao hicho wakifuatilia kwa makini nasaa mbalimbali zilizokuwa zikitolewa wakati wa kikao hicho.

Jopo la Majaji wa Mahakama ya Rufani Tanzania wakiongozwa na Mwenyekiti Jaji wa Mahakama ya Rufaa Tanzania Mhe. Zephrine Nyalugenda Galeba, (katikati waliosimama mbele), wakiwa kwenye picha ya pamoja na Maofisa Mahakama jiji la Mbeya. Wengine ni Jaji wa Mahakama ya Rufani Mhe. Amour Said Khamis (wa pili kushoto), wa pili kulia ni Jaji wa Mahakama ya Rufani Mhe. Rabia Hussein Mohamed, (wa kwanza kushoto) ni Kaimu Jaji Mfawidhi Mahakama Kuu Masjala Ndogo ya Mbeya Mhe. Angaza Ernest Mwipopo na wa kwanza kulia ni Jaji wa Mahakama Kuu Masjala Ndogo ya Mbeya Mhe. Said Kalunde.

Hakimu Mkazi Mwandamizi Mahakama ya Wilaya Mbeya Mhe. Paul Rupia (aliyesimama) akichangia jambo katika kikao hicho, kulia ni Hakimu Mkazi Mkuu Mahakama ya Hakimu Mkazi Mbeya Mhe. Scout Petter Andrew. 

Kaimu Jaji Mfawidhi Mahakama Kuu Masjala Ndogo ya Mbeya Mhe. Angaza Ernest Mwipopo, (aliyesimama) akizungumza wakati wa kikao hicho cha Maofisa Mahakama na Majaji wa Mahakama ya Rufani.

(Habari Hii Imehaririwa na Innocent Kansha - Mahakama)

 

MAHAKAMA, MABENKI WAKUTANA KUJADILI USIMAMIZI WA FEDHA ZA MIRATHI

Na MWANDISHI WETU, Mahakama-Dar es Salaam 

Mahakama ya Tanzania, Benki Kuu ya Tanzania (BoT) pamoja na Mabenki mengine nchini wamekutana na kufanya majadiliano kuhusu changamoto za Kisheria katika Mirathi, usimamizi wa mali za marehemu na uendeshaji wa akaunti maalum ya mirathi, ijulikanayo kama 'Special Mirathi Account.'

Mkutano huo uliohudhuriwa na washiriki wapatao 150 ulifanyika jana tarehe 27 Oktoba, 2026 kwenye ukumbi wa Benki Kuu ya Tanzania (BoT) na kufunguliwa na Jaji Mfawidhi wa Mahakama Kuu ya Tanzania Kituo Jumuishi cha Masuala ya Familia-Temeke, Mhe. Mwanabaraka Mnyukwa.

Akifungua mutano huo wa majadiliano, Mhe. Mnyukwa, alisema umuhimu wa fedha za mirathi katika familia nyingi nchini zilisababisha kuanzishwa kwa akaunti maalum ya mirathi inayojulikanayo kwa jina la 'Special Mirathi Account' ambayo imesaidia kuimarisha usimamizi wa fedha za mirathi, kuongeza uwazi na kupunguza migogoro inayoweza kujitokeza wakati wa usimamizi na ugawaji wa mali za marehemu.

"Lengo la akaunti hii ni kupokea na kuhifadhi fedha za marehemu ambazo zipo kwenve benki za biashara," amesema Jaji Mnyukwa.

'Special Mirathi Account' ni akaunti inayofunguliwa kupitia mabenki ya biashara na msimamizi wa mirathi aliyethibitishwa na Mahakama.

Jaji Mfawidhi wa Mahakama Kuu ya Tanzania Kituo Jumuishi cha Masuala ya Familia-Temeke, Mhe. Mwanabaraka Mnyukwa akifungua Mkutano uliohusisha Mahakama ya Tanzania, Benki Kuu ya Tanzania pamoja na Mabenki. Mkutano huo ulifanyika tarehe 27 Oktoba, 2026 kwenye ukumbi wa Benki Kuu ya Tanzania jijini Dar es Salaam.

Washiriki wa Mkutano huo wakifuatilia hotuba ya ufunguzi iliyokuwa ikitolewa na Jaji Mfawidhi wa Kituo Jumuishi cha Masuala ya Familia-Temeke, Mhe. Mwanabaraka Mnyukwa (hayupo katika picha) tarehe 27 Oktoba, 2026 kwenye ukumbi wa Benki Kuu ya Tanzania jijini Dar es Salaam.

Naibu Msajili wa Kituo Jumuishi cha Masuala ya Familia-Temeke, Mhe. Frank Moshi akizungumza jambo wakati wa mkutano huo.

Meza kuu ikiongozwa na Jaji Mfawidhi wa Mahakama Kuu Kituo Jumuishi cha Masuala ya Familia-Temeke, Mhe. Mwanabaraka Mnyukwa (katikati) akiwa katika picha za makundi na Viongozi wa Mahakama hiyo pamoja na Wadau mbalimbali wa Mahakama walioshiriki katika Mkutano wa majadiliano kuhusu changamoto za Kisheria katika Mirathi, usimamizi wa mali za marehemu na uendeshaji wa akaunti maalum ya mirathi, ijulikanayo kama 'Special Mirathi Account.'

(Habari hii imehaririwa na MARY GWERA, Mahakama-Dodoma)

 

 

 

MAHAKAMA KUU YA TANZANIA, MASJALA NDOGO SINGIDA YAENDELEA KUIMARISHA UTOAJI HAKI

• Mahakimu waaswa kulinda viapo vyao
• Mahakimu, madalali na wasambaza nyaraka wa Mahakama wabadilishana uzoefu.

Na EVA LESHANGE & AMIRI BAKARI, Mahakama – Singida

Mahakama Kuu ya Tanzania Masjala Ndogo Singida imeendelea kuimarisha utoaji wa huduma za haki kwa kuwakutanisha Mahakimu, Madalali wa Mahakama na Wasambaza Nyaraka wa Mahakama katika vikao vya kitaaluma vinavyolenga kuongeza weledi, uwajibikaji na uzingatiaji wa sheria katika utendaji wa kazi.

Katika mwendelezo wa juhudi hizo, Jaji Mfawidhi wa Mahakama Kuu ya Tanzania Masjala Ndogo Singida, Mhe. Ayoub Mwenda amewataka Mahakimu mkoani Singida kusimamia ipasavyo viapo vyao vya kazi, kuzingatia maadili ya taaluma na kutekeleza majukumu yao kwa uadilifu wa hali ya juu ili kuendelea kuimarisha imani ya wananchi kwa Mahakama.

Akizungumza na Mahakimu wa Singida wakati wa kikao hicho kilichofanyika tarehe 23 Oktoba, 2026, Mhe. Mwenda alisema kuwa, kila Hakimu anapaswa kuthamini na kulinda kiapo alichopata wakati wa kuapishwa na kuhakikisha kuwa, hakuna mazingira yanayoweza kuathiri misingi ya taaluma, maadili na utoaji haki.

Aidha, amewakumbusha kuwa, yapo mambo yanayoonekana kuwa madogo katika utekelezaji wa majukumu ya kila siku, lakini yanaweza kuathiri taswira ya Mahakama na kupunguza imani ya wananchi kwa mfumo wa utoaji haki. Kutokana na hali hiyo, aliwasisitiza kujiepusha na vitendo vyovyote vinayoweza kuibua shaka kuhusu uadilifu, weledi na kutokuwa na upendeleo katika utendaji wao.

"Tunapaswa kushirikiana na jamii tunayoihudumia, lakini katika kufanya hivyo ni lazima tuheshimu viapo vyetu vya kazi na kuzingatia maadili ya taaluma ya sheria ili kulinda hadhi ya Mahakama na kuimarisha imani ya wananchi," alisisitiza.

Vilevile, aliwataka Mahakimu hao kuepuka kufanya kazi kwa mazoea na badala yake kuhakikisha kuwa, kila jukumu linatekelezwa kwa kuzingatia sheria, kanuni na taratibu zilizowekwa.

 Alibainisha kwamba, utoaji wa huduma bora kwa watumiaji wa huduma za Mahakama ni nguzo muhimu katika kujenga imani ya wananchi na kuhakikisha upatikanaji haki kwa wote na mapema ipasavyo.

Sambamba na msisitizo huo wa kuzingatia maadili na weledi wa kazi, Mahakama Kuu ya Tanzania, Masjala Ndogo Singida, imeendesha kikao cha kubadilishana uzoefu kuhusu utekelezaji wa hukumu, wajibu wa Madalali wa Mahakama na usambazaji wa nyaraka za Mahakama.

Kikao hicho kiliwakutanisha Mahakimu, Madalali wa Mahakama pamoja na Wasambaza Nyaraka wa Mahakama kwa lengo la kujadili masuala mbalimbali yanayohusu utekelezaji wa hukumu na usambazaji wa nyaraka za Mahakama sambamba na kubadilishana uzoefu kuhusu mbinu bora za utekelezaji wa majukumu hayo.

Akifungua kikao hicho, Naibu Msajili wa Mahakama Kuu ya Tanzania Masjala Ndogo Singida, Mhe. Evodia Kyaruzi alisema kuwa, kubadilishana uzoefu ni fursa muhimu inayowezesha washiriki kujifunza kutoka kwa wenzao, kubaini changamoto zilizopo na kupata suluhisho litakalosaidia kuboresha huduma zinazotolewa kwa wananchi.

Alisisitiza kuwa, utekelezaji wa hukumu ni moja ya hatua muhimu katika mchakato wa utoaji haki na unahitaji umakini mkubwa kwa kuwa una athari ya moja kwa moja katika imani ya wananchi kwa Mahakama.

"Sehemu mojawapo inayotakiwa kufanyika kwa umakini mkubwa ni utekelezaji wa hukumu. Tusipokuwa makini kwenye utekelezaji wa hukumu tunaweza kupoteza imani ya wananchi kwa Mahakama," alisema.

Washiriki wa kikao hicho walijadiliana pia juu ya changamoto mbalimbali zinazojitokeza katika utekelezaji wa hukumu na usambazaji wa nyaraka za Mahakama huku wakishauriana kuhusu namna bora ya kuimarisha ushirikiano kati ya Mahakimu, Madalali wa Mahakama pamoja na Wasambaza Nyaraka ili kuongeza ufanisi katika utekelezaji wa majukumu yao.

Akifunga kikao hicho, Hakimu Mkazi Mfawidhi wa Mahakama ya Wilaya ya Singida, Mhe. Fadhili Luvinga aliwashukuru washiriki wote kwa kujitokeza na kushiriki kikamilifu, huku akieleza kuwa, ushiriki wao umeonesha dhamira ya kujifunza, kujiongezea maarifa na kuboresha utendaji kazi.

"Ushiriki wenu umeonesha kwamba tunapenda kujua na kujifunza zaidi. Ni muhimu kuendelea kuwa na vikao vya aina hii mara kwa mara ili kutukumbusha wajibu wetu na kuongeza uelewa wa masuala mbalimbali," alisema Mhe. Luvinga.

Alisisitiza juu ya umuhimu wa kuendelea kusoma sheria, kanuni na miongozo mbalimbali inayosimamia utekelezaji wa majukumu ya Mahakama ili kuongeza maarifa, kuimarisha utendaji kazi na kuhakikisha utoaji bora wa huduma za haki kwa wananchi.

Kwa ujumla, kikao hicho kimetoa fursa kwa washiriki kubadilishana uzoefu, kujifunza mbinu bora za kazi na kuimarisha uelewa kuhusu wajibu wao katika kuhakikisha hukumu za Mahakama zinatekelezwa kwa usahihi, ufanisi na kwa kuzingatia sheria, hatua ambayo ni muhimu katika kuendelea kujenga na kuimarisha imani ya wananchi kwa Mhimili wa Mahakama.

Mahakimu, Madalali na Wasambaza Nyaraka wa Mahakama wakifuatilia mada mbalimbali wakati wa Kikao cha Kubadilishana Uzoefu Kuhusu Utekelezaji wa Hukumu, Wajibu wa Madalali wa Mahakama na usambazaji wa nyaraka za Mahakama kilichofanyika tarehe 23 Oktoba, 2026 katika Kituo Jumuishi cha Utoaji Haki (IJC) Singida.

Jaji Mfawidhi wa Mahakama Kuu ya Tanzania, Masjala Ndogo Singida, Mhe. Jaji Ayoub Mwenda (kushoto), pamoja na Msajili wa Mahakama Kuu ya Tanzania, Masjala Ndogo ya Singida, Mhe. Evodia Kyaruzi (kulia) wakishiriki katika kikao cha kubadilishana uzoefu. Kikao hicho kiliwakutanisha Mahakimu, Madalali wa Mahakama na Wasambaza Nyaraka wa Mahakama wa mkoani Singida.

Naibu Msajili wa Mahakama Kuu ya Tanzania Masjala Ndogo Singida, akichangia mada katika kikao cha kubadilishana uzoefu kuhusu utekelezaji wa hukumu, wajibu wa Madalali wa Mahakama na usambazaji wa nyaraka za Mahakama, kilichofanyika kwenye ukumbi wa Kituo Jumuishi cha Utoaji Haki (IJC) Singida.

Dalali wa Mahakama, Bw.William Mirumbe akichangia mada na kushiriki majadiliano kuhusu utekelezaji wa hukumu, wajibu wa Madalali wa Mahakama na usambazaji wa nyaraka za Mahakama wakati wa kikao cha kubadilishana uzoefu kilichofanyika katika Kituo Jumuishi cha Utoaji Haki (IJC) Singida.

Baadhi ya Washiriki wa Kikao cha Kubadilishana Uzoefu kuhusu Utekelezaji wa Hukumu, Wajibu wa Madalali wa Mahakama na usambazaji wa nyaraka za Mahakama wakiwa katika picha ya pamoja mara baada ya kuhitimika kwa kikao hicho kilichofanyika kwenye moja ya kumbi za Kituo Jumuishi cha Utoaji Haki (IJC) Singida. 

(Habari hii imehaririwa na MARY GWERA, Mahakama-Dodoma)

 

 

 

JAJI MKUU WA TANZANIA AFANYA ZIARA MAHAKAMA KUU KANDA YA DAR ES SALAAM

• Afanya mazungumzo na Watumishi wa Mahakama hiyo

Jaji Mkuu wa Jamhuri ya Muungano wa Tanzania, Mhe. George Masaju leo tarehe 27 Oktoba, 2026 ametembelea Mahakama Kuu ya Tanzania Kanda ya Dar es Salaam kwa ziara ya kikazi. 

Katika ziara hiyo, Mhe. Masaju amefanya mazungumzo  na watumishi wa Mahakama Kuu Kanda ya Dar es Salaam.

Matukio katika picha ya ziara ya Jaji Mkuu wa Jamhuri ya Muungano wa Tanzania, Mhe. George Masaju alipotembelea Mahakama Kuu Kanda ya Dar es Salaam iliyopo Barabara ya Kivukoni jijini Dar es Salaam leo tarehe 27 Oktoba, 2026.

 Jaji Mkuu wa Jamhuri ya Muungano wa Tanzania Mhe. George Masaju akizungumza na Majaji wa Mahakama Kuu ya Tanzania Kanda ya Dar es Salaam ( hawapo katika picha) baada ya kuwasili Ofisi ya Jaji Mfawidhi wa Mahakama Kuu Kanda ya Dar es Salaam leo tarehe 27 Oktoba, 2026 kwa ziara ya kikazi.

Jaji Mfawidhi wa Mahakama Kuu ya Tanzania Kanda ya Dar es Salaam, Mhe. Salma Maghimbi (kulia) akimsikiliza Jaji Mkuu wa Jamhuri ya Muungano wa Tanzania, Mhe. George Masaju (hayupo katika picha), kushoto ni Jaji wa Mahakama Kuu ya Tanzania Kanda ya Dar es Salaam, Mhe. Elizabeth Mkwizu na katikati ni Jaji wa Mahakama Kuu ya Tanzania Kanda ya Dar es Salaam, Mhe. Angela Bahati, (kushoto).

Watumishi wa Mahakama Kuu ya Tanzania Kanda ya Dar es Salaam wakimpokea Jaji Mkuu, Mhe. Masaju (hayupo katika picha) alipokuwa akiingia kwenye ukumbi wa Mahakama kuzungumza na watumishi hao leo tarehe 27 Oktoba, 2026.

Baadhi ya Watumishi wa Mahakama Kuu Kanda ya Dar es Salaam wakimsilikiza Jaji Mkuu wa Tanzania, Mhe. George Masaju (hayupo katika picha) alipokuwa akizungumza na Watumishi hao alipotembelea Kanda hiyo leo tarehe 27 Oktoba, 2026.

Mtendaji wa Mahakama Kuu ya Tanzania Kanda ya Dar es Salaam, Bw. Sumera Manoti akimkaribisha Jaji Mfawidhi wa Mahakama Kuu Kanda ya Dr es Salaam, Mhe. Salma Maghimbi (hayupo katika picha) ili atoe neno na kumkaribisha Jaji Mkuu kuzungumza na watumishi.

Jaji Mkuu wa Jamhuri ya Muungano wa Tanzania, Mhe. George Masaju (katikati) akiwa katika picha ya pamoja na Majaji wa Mahakama Kuu Kanda ya Dar es Salaam. Wa tatu kushoto ni Jaji Mfawidhi wa Mahakama Kuu ya Tanzania Kanda ya Dar es Salaam, Mhe. Salma Maghimbi, wa tatu kulia ni Mhe. Mhe Elizabeth Mkwizu, wa pili kushoto ni Mhe. Angela Bahati, ni Mhe. Hamidu Mwanga, wa pili kulia ni Mhe. Awamu Mbagwa, wa kwanza kushoto ni Mhe. Hamidu Mwanga na wa kwanza kulia ni Mhe Dkt. Cleophace Morris.

Jaji Mkuu wa Jamhuri ya Muungano wa Tanzania, Mhe. George Masaju (katikati) akiwa katika picha ya pamoja na Naibu Wasajili na Watendaji wa Mahakama Kanda ya Dar es Salaam. Walioketi pamoja na Jaji Mkuu (katikati) ni Wa tatu kushoto ni Jaji Mfawidhi wa Mahakama Kuu ya Tanzania Kanda ya Dar es Salaam, Mhe. Salma Maghimbi, wa tatu kulia ni Mhe. Mhe Elizabeth Mkwizu, wa pili kushoto ni Mhe. Angela Bahati, ni Mhe. Hamidu Mwanga, wa pili kulia ni Mhe. Awamu Mbagwa, wa kwanza kushoto ni Mhe. Hamidu Mwanga na wa kwanza kulia ni Mhe Dkt. Cleophace Morris.

 Jaji Mkuu wa Jamhuri ya Muungano wa Tanzania, Mhe. George Masaju (katikati) akiwa katika picha ya pamoja na Mahakimu Wakazi Wafawidhi wa Mahakama za Hakimu Mkazi Dar es salaam na Kivukoni na Mahakimu wakazi wafawidhi wa Mahakama za Wilaya Ilala, Mkuranga, Bagamoyo, Kibiti, Rufuji, Kingamboni, Ubungo,Kisarawe,Temeke, Kibaha na Kinondoni.Walioketi pamoja na Jaji Mkuu (katikati) ni Wa tatu kushoto ni Jaji Mfawidhi wa Mahakama Kuu ya Tanzania Kanda ya Dar es Salaam, Mhe. Salma Maghimbi, wa tatu kulia ni Mhe. Mhe Elizabeth Mkwizu, wa pili kushoto ni Mhe. Angela Bahati, ni Mhe. Hamidu Mwanga, wa pili kulia ni Mhe. Awamu Mbagwa, wa kwanza kushoto ni Mhe. Hamidu Mwanga na wa kwanza kulia ni Mhe Dkt. Cleophace Morris.

 Jaji Mkuu wa Jamhuri ya Muungano wa Tanzania, Mhe. George Masaju (katikati) akiwa katika picha ya pamoja na Mahakimu wa Mahakama za Mwanzo Dar es salaam. Walioketi pamoja na Jaji Mkuu (katikati) ni Wa tatu kushoto ni Jaji Mfawidhi wa Mahakama Kuu ya Tanzania Kanda ya Dar es Salaam, Mhe. Salma Maghimbi, wa tatu kulia ni Mhe. Mhe Elizabeth Mkwizu, wa pili kushoto ni Mhe. Angela Bahati, ni Mhe. Hamidu Mwanga, wa pili kulia ni Mhe. Awamu Mbagwa, wa kwanza kushoto ni Mhe. Hamidu Mwanga na wa kwanza kulia ni Mhe Dkt. Cleophace Morris.

Jaji Mkuu wa Jamhuri ya Muungano wa Tanzania, Mhe. George Masaju (katikati) akiwa katika picha ya pamoja na Maofisa Utumishi,Tawala,TEHAMA,Hesabu na Mhasibu alipotembelea Mahakama Kuu Kanda ya Dar es Salaam. Walioketi pamoja na Jaji Mkuu (katikati) ni Wa tatu kushoto ni Jaji Mfawidhi wa Mahakama Kuu ya Tanzania Kanda ya Dar es Salaam, Mhe. Salma Maghimbi, wa tatu kulia ni Mhe. Mhe Elizabeth Mkwizu, wa pili kushoto ni Mhe. Angela Bahati, ni Mhe. Hamidu Mwanga, wa pili kulia ni Mhe. Awamu Mbagwa, wa kwanza kushoto ni Mhe. Hamidu Mwanga na wa kwanza kulia ni Mhe Dkt. Cleophace Morris.

Jaji Mkuu wa Jamhuri ya Muungano wa Tanzania, Mhe. George Masaju (katikati) akiwa katika picha ya pamoja na Watumishi wa Mahakama Kuu Kanda ya Dar es Salaam. Walioketi pamoja na Jaji Mkuu (katikati) ni Wa tatu kushoto ni Jaji Mfawidhi wa Mahakama Kuu ya Tanzania Kanda ya Dar es Salaam, Mhe. Salma Maghimbi, wa tatu kulia ni Mhe. Mhe Elizabeth Mkwizu, wa pili kushoto ni Mhe. Angela Bahati, ni Mhe. Hamidu Mwanga, wa pili kulia ni Mhe. Awamu Mbagwa, wa kwanza kushoto ni Mhe. Hamidu Mwanga na wa kwanza kulia ni Mhe Dkt. Cleophace Morris.

 Jaji Mkuu wa Jamhuri ya Muungano wa Tanzania, Mhe. George Masaju akisoma Bango lenye picha za Majaji katika kipindi cha miaka 100 ya Mahakama (100 years Index Platform 1921-2021).

(Picha na BAKARI MTAULLAH)

 

 

KITENGO CHA HABARI MAHAKAMA YA TANZANIA CHAFANYA ZIARA YA MAFUNZO HIFADHI ZA NGORONGORO, SERENGETI

Na SETH KAZIMOTO, Mahakama- Arusha

Watumishi wa Kitengo cha Habari, Elimu na Mawasiliano cha Mahakama ya Tanzania, wakiongozwa na Mkuu wa Kitengo hicho, Bw. Gerard Chami wamefanya ziara ya mafunzo katika Hifadhi za Taifa za Ngorongoro mkoani Arusha na Serengeti mkoani Mara.

Ziara hiyo ilifanyika tarehe 23-25 Oktoba, 2026 ikilenga kuwawezesha watumishi kuelewa kwa kina masuala ya uhifadhi wa wanyamapori, mazingira asilia, utalii na usimamizi wa rasilimali asilia za Taifa.

Akizungumza wakati wa ziara hiyo, Bw. Chami alisema ni muhimu kwa watumishi hao kutembelea maeneo mbalimbali ya kitalii ili kuwasilisha taarifa kwa usahihi.

Alibainisha kuwa, wajibu wa kitengo hicho si kutoa habari za Mahakama pekee, bali pia kuelimisha na kuhamasisha umma kuhusu umuhimu wa kulinda rasilimali za asili kwa mujibu wa Katiba ya Nchi, Sheria, Kanuni, Taratibu na Miongozo yote iliyopo ambayo hutafsiriwa na Mahakama zetu hapa nchini.

"Ziara hii ya mafunzo ni sehemu ya jitihada za kuimarisha uelewa wa watumishi wetu kuhusu sekta ya utalii na uhifadhi. Ingawa kazi yetu ya msingi ni kuhabarisha umma kuhusu shughuli za Mahakama, ni muhimu pia kila mtumishi awe na uzoefu wa moja kwa moja wa kile anachohabarisha na kuelimisha umma, ikiwa ni pamoja na masuala ya uhifadhi ambayo yanagusa maisha ya Watanzania wote," alisema Bw. Chami.

Bw. Chami alihimiza watumishi hao kutumia uzoefu walioupata kuboresha kazi zao za kila siku, hasa katika kuandaa taarifa, makala na programu za elimu zinazohusu uhifadhi na utalii. Alisisitiza kuwa elimu ni msingi wa mabadiliko chanya, na kwamba kitengo hicho kina jukumu kubwa la kuhakikisha umma unaelewa na kushiriki katika jitihada za kulinda rasilimali za taifa kwa manufaa ya vizazi vya sasa na vijavyo.

Wakati wa ziara hiyo, watumishi hao walipata fursa ya kujionea vivutio mbalimbali vya kitalii vilivyopo katika hifadhi hizo mbili, ikiwa ni pamoja na wanyamapori, mandhari nzuri na miundombinu ya utalii.

Aidha, walipata maelezo kutoka kwa Wataalam wa Uhifadhi na Utoaji Huduma ya Utalii, Bw. Wilbard Christopher na Bw. Elisante Kivuyo ambao kwa nyakati tofauti walieleza kuhusu mbinu za usimamizi, changamoto zinazowakabili na mikakati inayotumika kulinda rasilimali hizo.

Katika Hifadhi ya Ngorongoro, watumishi walijifunza kuhusu mfumo wa kipekee wa usimamizi wa eneo hilo na umuhimu wa kuhifadhi Kreta, ambayo ni miongoni mwa maeneo ya kipekee duniani yanayovutia watalii wengi. Kwa upande wa Hifadhi ya Taifa ya Serengeti, walijifunza kuhusu uhamaji wa wanyamapori ambao ni moja ya matukio yanayovutia zaidi duniani.

Ziara hiyo ina umuhimu mkubwa kwa kitengo hicho kutokana na majukumu yake ya kutoa habari, kuelimisha na kuwasiliana na umma. Inawawezesha watumishi kuwa na uelewa wa kina wa masuala ya uhifadhi na utalii, jambo ambalo linaboresha ubora wa habari na taarifa wanazozitoa kwa umma. 

Matukio katika picha Ziara ya Watumishi wa Kitengo cha Habari, Elimu na Mawasiliano-Mahakama ya Tanzania walipotembelea Eneo la Hifadhi ya Ngorongoro na Hifadhi ya Taifa ya Serengeti

Watumishi wa Kitengo cha Habari, Elimu na Mawasiliano cha Mahakama ya Tanzania wakiongozwa na Mkuu wa Kitengo hicho, Bw. Gerard Chami (wa pili kushoto) wakiwa katika Eneo la Hifadhi ya Ngorongoro walipotembelea Hifadhi hiyo hivi karibuni kwa ziara ya kujifunza.

Chui akiwa ndani ya Eneo la Hifadhi ya Ngorongoro.

Faru wakiwa ndani ya Eneo la Hifadhi ya Ngorongoro.

Ngiri akiwa ndani ya Hifadhi ya Taifa ya Serengeti.

Moja kati ya aina ya ndege wanaopatikana ndani ya Eneo la Hifadhi ya Ngorongoro.

Kundi la Nyati wakiwa katika Eneo la Hifadhi ya Ngorongoro.

Ndege aina ya 'Flamingo' waliopo ndani ya Eneo la Hifadhi ya Ngorongoro.

Tembo

Simba akipata kitoweo baada ya kufanikiwa kumuwinda na kumkamata Pundamilia.

Familia ya Simba

Duma akiwa ndani ya Hifadhi ya Taifa ya Serengeti.

Twiga akijipatia kitoweo.

Simba akiwa katika pozi tofauti tofauti.

Viboko wakiwa ndani ya maji katika Hifadhi ya Taifa ya Serengeti.

Kiboko akiwa ametoka nje ya maji.

Simba

Twiga akinywa maji.

Tembo

Pundamilia

Sehemu ya Watumishi wa Kitengo cha Habari, Elimu na Mawasiliano cha Mahakama ya Tanzania wakiongozwa na Mkuu wa Kitengo hicho, Bw. Gerard Chami (wa pili kulia) wakiwa katika geti la kuingia ndani ya Hifadhi ya Taifa ya Serengeti walipofanya ziara ya mafunzo katika Hifadhi hiyo hivi karibuni.

Sehemu ya Watumishi wa Kitengo cha Habari, Elimu na Mawasiliano cha Mahakama ya Tanzania wakiwa Kituo Jumuishi cha Utoaji Haki (IJC) Arusha ilipoanzia safari kuelekea Eneo la Hifadhi ya Ngorongoro na Hifadhi ya Taifa ya Serengeti mkoani Mara.

(Habari hii imehaririwa na MARY GWERA, Mahakama-Dodoma)