JAJI MFAWIDHI KANDA YA IRINGA AHIMIZA WATUMISHI KUTUNZA MIUNDOMBINU YA MAHAKAMA

 Na Lusako Mwang’onda-Mahakama, Iringa

Jaji Mfawidhi wa Mahakama Kuu ya Tanzania, Kanda ya Iringa, Mhe. Dkt. John Utamwa amewahimiza watumishi kuyatunza majengo yanayojengwa hapa nchini ili kuunga mkono juhudi za Mahakama na Serikali ya Tanzania kwa ujumla  katika kuboresha miundombinu hiyo.

Mhe. Dkt. Utamwa alitoa wito huo hivi karibuni wakati wa uzinduzi wa jengo jipya la Mahakama ya Mwanzo Lugarawa lililopo katika Wilaya ya Ludewa mkoani Njombe.

Jaji Mfawidhi huyo alibainisha kuwa Serikali inatumia pesa nyingi katika kujenga majengo mbalimbali ya Mahakama, hivyo ni wajibu wa kila mtu na hasa watumiaji ambao kwa kiasi kikubwa ni watumishi wa Mahakama kuhakikisha kuwa yanatunzwa vyema.

 “Litakuwa ni jambo la aibu kuona hili jengo ambalo tunalizindua likiwa safi hivi, halafu baada ya muda tunarudi hapa na kulikuta limechafuliwa kwa namna yoyote. Ni wajibu wetu watumiaji wa majengo haya kuhakikisha kuwa yanabaki kuwa safi na salama,” alisema.

Sherehe za uzinduzi wa Mahakama hiyo zilihudhuliwa na viongozi mbalimbali wa Mahakama ya Tanzania, Kanda ya Iringa, Serikali na wananchi.

Baadhi ya viongozi wa Mahakama waliohudhuria sherehe hizo ni Naibu Msajili wa Mahakama Kuu ya Tanzania, Kanda ya Iringa, Mhe. Maximillian Malewo, Hakimu Mfawidhi Mahakama ya Hakimu Mkazi Njombe, Mhe. Liadi Chamshama, Mtendaji wa Mahakama Kuu ya Tanzania, Kanda ya Iringa, Bi. Melea Mkongwa, Mtendaji wa Mahakama ya Hakimu Mkazi Njombe, Bw. Yusuph Msawanga na Hakimu Mfawidhi wa Mahakama ya Wilaya ya Ludewa, Mhe. Isack Ayengo.

Sherehe hizo pia ilihudhuriwa na viongozi mbalimbali wa vyombo vya Ulinzi na Usalama wa Wilaya ya Ludewa, wakiongozwa na Mkuu wa Wilaya hiyo Mhe. Andrea Tsere.

Jaji Mfawidhi wa Mahakama Kuu ya Tanzania, Kanda ya Iringa, Mhe. Dkt. John Utamwa, akihutubia wakati wa ufunguzi wa Jengo la Mahakama ya Mwanzo Lugarawa hivi karibuni.

Jaji Mfawidhi wa Mhakama Kuu ya Tanzania, Kanda ya Iringa, Mhe. Dkt. John Utamwa akipanda mti nje ya jengo jipya la Mahakama ya Mwanzo Lugarawa.

Jaji Mfawidhi wa Mhakama Kuu ya Tanzania, Kanda ya Iringa, Mhe. Dkt. John Utamwa (mwenye miwani waliokaa) akiwa kwenye picha ya pamoja na viongozi wa Mahakama na Serikali.

Kwaya maalumu ya watumishi wa Mahakama Kanda ya Iringa ikitumbuiza mbele ya mgeni rasmi wakati wa uzinduzi wa jengo la Mahakama ya Mwanzo Lugarawa.

Kikundi cha ngoma za asili (juu) na Kikundi cha Kwaya (chini) kikitumbuiza wakati wa uzinduzi wa jengo la Mahakama ya Mwanzo Lugarawa.

(Picha na Lusako Mwang’onda-Mahakama, Iringa).