MAHAKAMA MOROGORO YATOA ELIMU USIKILIZAJI MASHAURI KWA NJIA YA MTANDAO

 Na Evelina Odemba – Mahakama, Morogoro

Mahakama ya Tanzania, Mkoa wa Morogoro leo tarehe 27 Julai, 2022 imeendelea na mpango wake wa kutoa elimu kwa wananchi katika masuala mbalimbali ya kisheria, ikiwemo kusikiliza mashauri kwa njia ya mtandao.  

Akitoa elimu hiyo kwa wananchi waliofika katika Kituo Jumuishi cha Utoaji Haki mkoani hapa, Afisa Tekinolojia Habari na Mawasiliano (TEHAMA), Bw. Tamimu Husein alisema njia ya usikizaji wa mashauri kwa mtandao ni rahisi ambayo mtu huweza kuitumia akiwa sehemu yeyote na akapata huduma ya kimahakama.

Akijibu swali la Mwananchi William Makunganya aliyetaka kujua namna ambavyo Mahakama imejipanga endapo mshatakiwa akitiwa hatiani baada ya hukumu yake kusomwa kwa njia hiyo akiwa nje kwa dhamana, Msaidizi wa Sheria wa Jaji, Mhe. Lameck Mwamkoa alisema kazi ya Mahakam ni kutafsiri sheria.

“Vyombo husika vitafanya kazi yake ya kumkamata mshtakiwa na kumpeleka sehemu husika ili akapatiwe haki yake endapo kama itakapotokea changamoto kama hiyo,” alisema.

Hatua hiyo ya elimu iliyotolewa na Mahakama imepokelewa vizuri na wateja ambao wengi wameonesha shauku ya kutaka kujua zaidi ili iwe rahisi kwao kufuatilia mashauri yao wakiwa katika maeneo tofauti tofauti.

Mkazi mmoja aliyejulikana kama Sudi Mindu alitoa pongezi zake kwa Mahakama na kusema kuwa sasa wamerahisishiwa huduma na kupunguziwa gharama za kusafiri ili kufuata huduma mahakamani.

Usikilizwaji wa mashauri kwa njia ya mtandao sasa unapatikana kwa wateja wote wenye simu janja na hata wasio kuwa nazo wanaweza kufika katika Mahakama iliyo karibu nao li waweze kuunganishwa na kusikiliza kesi wakuwa huko huko waliko. Hii ni hatua nyingine kubwa ambayo Mahakama imepiga ili kuendana na mapinduzi makubwa yaliyoko katika tekinolojia.

Afisa Tekinolojia Habari na Mawasiliano (TEHAMA), Bw. Tamimu Husein akitoa elimu kwa wananchi namna wanavyoweza kusikiliza mashauri kwa njia ya mtandao bila kufika mahakamani.

Msaidizi wa Sheria wa Jaji, Mhe. Lameck Mwamkoa akifafanua jambo wakati wa utoaji wa elimu kwa wananchi.

Sehemu ya wananchi (juu na chini) waliofurika katika tukio hilo la utoaji wa elimu wakisikiliza kwa makini. 

Mwananchi William Makunganya akiuliza swali kwa njia ya mtandao.