RAIS CHAMA CHA MAJAJI NA MAHAKIMU TANZANIA ASISITIZA UIMARISHAJI MATAWI

Na Ahmed Mbilinyi – Mahakama, Bukoba

Rais wa Chama cha Majaji na Mahakimu Tanzania (JMAT), Jaji Mfawidhi Mahakama Kuu ya Tanzania, Kanda ya Mwanza, Mhe John Kahyoza amesisitiza kuimarishwa kwa matawi ya chama hicho kote nchini.

Mhe. Kahyoza alitoa wito huo hivi karibuni katika mkutano wa JMAT Tawi la Kagera ambapo alikuwa mgeni rasmi. Akizungumza katika mkutano huo, Mwenyekiti huyo alisisitiza matawi ya JMAT kuwa na utaratibu wa kutembeleana na kubadilishana uzoefu ili kuongeza tija katika utendaji kazi. Kadhalika, aliwakumbusha wanachama umuhimu wa kutoa michango yao ya kila mwezi.

Awali, Jaji Mfawidhi Mahakama Kuu ya Tanzania, Kanda ya Bukoba, Mhe. Dkt. Ntemi Kilekamajenga, ambaye ni mlezi wa JMAT Tawi la Kagera, aliwaeleza wajumbe kuwa uwepo wa chama hicho ni muhimu kwa kuwa hakuna sehemu nyingine ya wao kujisemea. Alimshukuru Mhe. Kahyoza kwa kukubali kuwa mgeni rasmi katika mkutano huo pamoja na kuwa na majukumu mengine muhimu kitaifa.

Katika mkutano huo ulifanyika uchaguzi wa viongozi wapya wa tawi la JMAT Kagera ambao watakuwa na jukumu la kuongoza kwa kipindi cha miaka mitatu (3). Uchaguzi huo ulifanyika kwa mujibu wa takwa la kikatiba kutokana na uhamisho uliotokea kwa baadhi ya viongozi katika tawi hilo kwenda nje ya Mkoa wa Kagera.

Nafasi ya Mwenyekiti ilichukuliwa na Hakimu Mkazi Mfawidhi wa Mahakama ya Mkoa Bukoba, Mhe. Janeth Massesa, Makamu Mwenyekiti aliyechaguliwa alikuwa Hakimu wa Mahakama ya Mwanzo Biharamulo Mjini, Mhe Edward Samara.

Nafasi ya Katibu ilichukuliwa na Hakimu wa Mahakama ya Mwazo Bukoba Mjini, Mhe. Zakaria Nyahende, Mweka Hazina akachaguliwa Hakimu wa Mahakama ya Mwazo Nyaishozi, Mhe. Erasto Joseph, huku nafasi ya Mwakilishi wa JMAT Taifa ikichukuliwa na Hakimu Mkazi Mfawidhi Mahakama ya Wilaya Biharamulo, Mhe. Flora Ndale.

Rais wa Chama cha Majaji na Mahakimu Tanzania (JMAT), Jaji Mfawidhi Mahakama Kuu ya Tanzania, Kanda ya Mwanza, Mhe John Kahyoza (aliyesimama) akizungumza katika mkutano wa JMAT Tawi la Kagera ambapo alikuwa mgeni rasmi.

Jaji Mfawidhi Mahakama Kuu ya Tanzania Kanda ya Bukoba, ambaye pia ni mlezi wa JMAT Tawi la Kagera, Mhe. Dkt. Ntemi Kilekamajenga (aliyesimama) akitoa salamu fupi kabla ya kumkaribisha Rais wa Chama cha Majaji na Mahakimu Tanzania (JMAT), Jaji Mfawidhi Mahakama Kuu ya Tanzania, Kanda ya Mwanza, Mhe John Kahyoza (wa pili kushoto) kuzungumza na wajumbe wa mkutano wa JMAT Tawi la Kagera. Mhe. Kahyoza alikuwa mgeni rasmi kwenye mkutano huo.

Hakimu Mkazi Mfawidhi Mahakama ya Mkoa Bukoba, Mhe Janeth Massesa (aliyesimama) akitoa salamu za shukrani mara baada ya kuchanguliwa kuwa Mwenyekiti wa JMAT Tawi la Kagera.

Rais wa Chama cha Majaji na Mahakimu Tanzania (JMAT), Jaji Mfawidhi Mahakama Kuu ya Tanzania, Kanda ya Mwanza, Mhe John Kahyoza (katikati wakiokaa) akiwa katika picha ya pamoja na wajumbe wa mkutano pamoja na viongozi wengine wa Mahakama akiwemo Jaji wa Mahakama Kuu Kanda ya Bukoba, Mhe. Emmanuel Ngigwana (wa kushoto), Jaji Mfawidhi wa Mahakama Kuu, Kanda ya Bukoba, Mhe. Dkt. Ntemi Kilekamajenga (wa pili kushoto), Jaji wa Mahakama Kuu Kanda ya Bukoba, Mhe. Ayub Mwenda (wa kulia) na Jaji wa Mahakama Kuu Kanda ya Bukoba, Mhe Angaza Mwipopo (wa pili kulia).

Sehemu ya wajumbe wa Mkutano wakifuatilia yaliyokuwa yanajiri.