DIVISHENI YA KAZI YAJITATHMINI KIUTENDAJI SIKU YA KUMBUKIZI YA MWALIMU NYERERE

Na Mwandishi wetu, Mahakama Kuu- Divisheni ya Kazi.

Jaji Mfawidhi wa Mahakama Kuu-Divisheni ya Kazi, Mhe. Salma Maghimbi amepongeza Watumishi kwa kufanyakazi kwa ushirikiano ambao umefanikisha utekelezaji wa mpango kazi mwa mwaka 2021-2022.

Akizungumza na Watumishi hao juzi tarehe 14 Oktoba, 2022 alipokuwa akifungua kikao hicho kwenye Ukumbi mdogo uliopo katika Hifadhi ya Taifa ya Saadani, aliwaeleza watumishi kuwa dhumuni la kikao hicho ni kutathmini utendaji wa kazi na kupanga mikakati ya kufunga mwaka wa kimahakama kwa upande wa  Mahakama Kuu-Divisheni hiyo. Pia alisema dhumuni kikao hicho ni pamoja na kutathmini hali ya utekelezaji wa mpango kazi wa Mahakama wa 2021-2025 ili kuona walipotoka na walipo sasa kwenye utoaji wa huduma kwa wananchi.

“Lakini kwa kuwa sisi ni Mahakama Kuu Divisheni ya Kazi lengo letu ni kuimarisha na kurudisha mantiki na dhumuni la kuanzishwa Divisheni hii na kuwekea mikakati kwa ajili ya mwaka kesho kabla hatujaanza likizo ya Kimahakama,” alisema. 

Alisema walichagua kikao hicho kifanyike siku ya tarehe 14 hadi 15 Oktoba ili kuenzi miaka 100 tangia kuzaliwa kwa Mwalimu Julius Kambarage Nyerere kwa ajili ya kukumbushana yale ambayo aliyoyasisitiza na kuyapigania na kuona jinsi gani kwa upande watumishi wa Divisheni ya Kazi watayatekeleza kwa ajili ya  maendeleo ya taifa kupitia utatuzi wa migogoro ya kazi. 

“Mwl Nyerere aliwahi kusema kuwa “kila mtu anataka maendeleo, lakini si kila mtu anaelewa na kukubali mahitaji ya msingi kwa ajili ya maendeleo. Jambo la kubwa ni kufanya kazi kwa juhudi.” Ndugu zangu, watumishi wenzangu, tufanye kazi kwa juhudi. Mwalimu pia alisisitiza sana kuwa Tanzania itajengwa na wenye moyo thabiti.  Hapa tujiangalie je tunao moyo thabiti wa kulitekeleza hili? Mimi kama Jaji Mfawidhi wenu nathubutu kusema Watumishi wa Divisheni ya Kazi mnao moyo thabiti kabisa kwani nikipima hata idadi ya malalamiko kuanzia Januari mwaka huu mpaka 30 Septemba,2022 yamepungua sana. Hii inaonyesha juhudi ya kufanya kazi kwa moyo thabiti hivyo kutoa huduma kwa wadau wetu kama tunavypaswa.” alisema.

Katika hatua nyingine Jaji Mfawidhi huyo aliwataka wasimamizi wa Tovuti ya Divisheni ya Kazi kuhakikisha tovuti iliyoanzishwa  inakuwa hai na ina taarifa za wakati ili wananchi wengi waweze kunufaika na huduma hiyo. Aidha, kunatokana na uhitaji mkubwa wa matumizi ya Teknolojia ya Habari na Mawasiliano kwenye matumizi ya shughuli za Mahakama hiyo na Mahakama kwa ujumla, alimwagiza Mtendaji wa Mahakama hiyo kuongeza nguvu kazi katika Kitengo cha TEHAMA ili kuweza kutangaza na kurahisisha utendaji kazi wa Divisheni ya Kazi.

Wakati huo huo, Mhe Maghimbi alieleza kuwa kwa upande wa Waheshimiwa Majaji na Wasajili wameweka mkakati wa kuhakikisha kwa pamoja wanaamaliza mashauri yao kwa wakati kabla ya muda wa kwenda kwenye likizo ya kimahakama, ili yasiwepo mashauri ya mlundikano mara mwaka mpya wa Mahakama utakapoanza.

Naye Jaji wa Mahakama Kuu- Divisheni ya Kazi, Mhe. Biswalo Mganga aliwahimiza watumishi kufanyakazi kwa kuzingatia maadili na kushirikiana  ili waweze kutoa huduma bora  kwa wateja wa ndani na nje. Mhe Jaji Mganga aliongeza kuwa wanapotoa huduma kwa wadau ni vyema wakafanya hivyo bila kuangalia muonekano wa Mteja kwa kuwa hawawezi kujua wanayemhudumia ametoka wapi ili wadau wajione kuwa ni sehemu ya maendeleo na wana mchango katika kutekeleza mpango mkakati wa Mahakama.

Akinukuu busara za mwalimu Nyerere aliposema “Watu wanapaswa kuhusishwa, ili kufikia maendeleo ya kweli,” Mhe Jaji Mganga alitoa rai kuwa ni vyema kukafanyika kikao cha Watumishi wa Mahakama Kuu –Divisheni ya Kazi pamoja na wadau wao kabla ya likizo ya Mahakama, ili kutathmini kwa pamoja na kuweza kufahamu kutoka kwao kama utekelezaji wao wa mpango mkakati unaendana na matarajio ya wadau hao. Pia kwa pamoja kikao kiweke mikakati ya mpango kazi wa mwaka ujao wa Mahakama 2023, jinsi ya kuhakikisha changamoto zilizopo zinafanyiwa kazi na kuepelekea umalizwaji wa haraka wa mashauri ya kazi kwa maendeleo ya nchi.

Alisema kikao hicho kitawasaidia kupata maoni juu ya nini kifanyike zaidi ili kuboresha utekelezaji wa mpango mkakati wa Mahakama bila ya kuwaacha wadau wao nyuma.

Kwa upande wao, Watumishi wa Divisheni walitoa shukrani kwa uongozi kwa kuwa wamekuwa wakishirikishwa vyema katika utekelezaji wa mpango mkakati huo. Pia waliomba uongozi kuendelea kusimamia na kudumisha mahusiano mazuri baina ya wafanyakazi na kufanya ushirikishwaji huo uwe endelevu. Kikao hicho kilifanyika katika mbuga za Hifadhi ya Taifa ya Saadani ambapo pia Watumishi waliweza pia kupata fursa ya kuona Wanyama mbalimbali ambao ni hazina yetu pamoja na ikolojia mbalimbali za Bahari nan chi kavu ambazo zinapatikana katika mbuga hizo. Jaji Mfawidhi aliwashukuru uongozi wa Hifadhi ya Saadani pamoja na Mamlaka ya Hifadhi za Taifa (TANAPA) kwa ukaribisho mzuri na miundombinu waliyowawekea kuweza kufanikisha kikao hicho na ziara nzima kwa ujumla.

  Jaji Mfawidhi wa Mahakama Kuu-Divisheni ya Kazi, Mhe. Salma Maghimbi (mwenye gauni ya rangi  kijani na njano ) akiwa katika picha ya pamoja na Watumishi wa Divisheni hiyo juzi kabla ya kuanza safari ya kuelekea katika kikao kazi cha kutathmini utendaji kazi wa mwaka 2022 na kupanga mikakati ya kufunga mwaka wa kimahakama kwa upande wa wa Mahakama Kuu-Divisheni hiyo.

    Jaji Mfawidhi wa Mahakama Kuu-Divisheni ya Kazi, Mhe. Salma Maghimbi (aliyevaa gauni) akibadilishana mawazo na viongozi mbalimbali akiwemo Jaji wa Mahakama Kuu-Divisheni ya Kazi, Mhe. Biswalo Mganga (wa kwanza kushoto) kabla ya kuanza siku ya kwanza ya kikao cha kutathmini ya utendaji wa kazi na kupanga mikakati ya kufunga mwaka wa kimahakama kwa upande wa Mahakama Kuu-Divisheni hiyo.

   Jaji Mfawidhi wa Mahakama Kuu-Divisheni ya Kazi Mhe. Salma Maghimbi akisisitiza jambo wakati wa siku ya pili ya kikao cha kutathmini ya utendaji wa kazi na kupanga mikakati ya kufunga mwaka wa kimahakama kwa upande wa wa Mahakama Kuu-Divisheni hiyo.

    Jaji Mfawidhi wa Mahakama Kuu-Divisheni ya Kazi, Mhe. Salma Maghimbi (mwenye kofia) akiwa katika picha ya pamoja na Watumishi wa Divisheni hiyo juzi kwenye mpaka wa Tanga na Pwani wakati wakiwa kutembelea hifadhi ya Taifa ya Saadani baada ya  kumalizika kikao kazi cha kutathmini utendaji wa kazi na kupanga mikakati ya kufunga mwaka wa kimahakama kwa upande wa wa Mahakama Kuu-Divisheni hiyo.

    Jaji Mfawidhi wa Mahakama Kuu-Divisheni ya Kazi Mhe. Salma Maghimbi (wa nne kulia waliokaa) akiwa katika picha ya pamoja na viongozi na watumishi wa Divisheni ya Kazi  juzi baada ya kumalizika kwa kikao kazi ya kutathmini ya utendaji wa kazi na kupanga mikakati ya kufunga mwaka wa kimahakama kwa upande wa wa Mahakama Kuu-Divisheni hiyo.

  Mhifadhi kutoka Hifadhi ya Taifa ya Saadani akitoa maelezo kwa viongozi wa Mahakama Kuu Divisheni ya Kazi waliongozwa na Jaji Mfawidhi wa Mahakama Kuu-Divisheni ya Kazi, Mhe. Salma Maghimbi (mwenye gauni ya rangi za kijani na njano) kabla ya kuanza kwa  kikao kazi cha kutathmini utendaji kazi wa mwaka 2022 na kupanga mikakati ya kufunga mwaka wa kimahakama kwa upande wa wa Mahakama Kuu-Divisheni hiyo kilichofanyika hivi karibuni.

(Picha na Mahakama Kuu-Divisheni ya Kazi)