JAJI MFAWIDHI KIGOMA ATAMANI MATOKEO CHANYA KWA WATUMISHI WALIOPANDA VYEO

Na Festo Sanga-Mahakama, Kigoma

Jaji Mfawidhi wa Mahakama Kuu ya Tanzania, Kanda ya Kigoma, Mhe. Lameck Mlacha amewapongeza watumishi wa kada mbalimbali 20 waliopanda vyeo katika ikama ya mwaka 2021/2022 na kuwataka kutumikia kikamilifu nafasi hizo ili kuleta matokeo chanya katika utoaji wa huduma za haki kwa wananchi.

Mhe. Mlacha alitoa pongezi hizo hivi karibuni katika hafla fupi ya kuwapongeza watumishi hao iliyoambatana na kikao cha Kamati ya Uongozi wa Mahakama Kanda ya Kigoma kwa robo ya kwanza kwa mwaka wa fedha 2022/2023.

Taarifa ya Kanda ya Kigoma kuhusu utekelezaji wa Mpango Mkakati wa Mahakama kwa kipindi cha robo ya kwanza ilionesha watumishi waliokuwa na madai ya vyeo katika mwaka husika wote walipandishwa vyeo, ikiwemo Mahakimu Wandamizi wanne waliopandishwa kuwa Mahakimu Wakuu Daraja la Pili, huku Mahakimu saba wa Daraja la Kwanza wamekuwa Mahakimu Waandamizi.

Pia Wapo Wasaidizi wa Kumbukumbu wanne na Walinzi wanne ambao walipanda vyeo mbalimbali. Jaji Mlacha aliishukuru Tume ya Utumishi wa Mahakama kwa hatua hiyo kubwa na kuwapongeza watumishi wote waliopanda vyeo huku akiwataka kuvitumikia kiukamilifu vyeo hivyo ili kuleta matokeo chanya katika utoaji wa huduma za kimahakama.

“Tumepata watumishi wengi ambao wamesogea mbele kwa kupanda vyeo, hii ni hatua kubwa sana kwetu na ya kihistoria kwa watumishi 20 kupanda vyeo wakati mmoja, hivyo wale waliopanda wavitumikie vyeo vyao ipasavyo,” alisema Jaji Mlacha.

Naye Mtendaji wa Mahakama Kuu ya Tanzania Kanda ya Kigoma, Bw. Moses Mashaka aliwafahamisha washiriki wa kikao na hafla hiyo kuwa upandaji wa vyeo sio jambo ambalo hutokea moja kwa moja (automatic) bali ni mchakato unaozingatia sifa mbalimbali.

Alizitaja baadhi ya sifa hizo kama utendaji kazi mzuri unaopimwa kila mwaka kupitia mfumo wa wazi na mapitio ya utendaji kazi (OPRAS na JOPRAS), kutumikia cheo cha zamani katika kipindi kisichopungua miaka minne na mwenendo na maadili mazuri.

Akizungumza kwa niaba ya watumishi waliopanda vyeo, Hakimu Mkazi Mwandamizi kutoka Mahakama Kuu Kigoma, Mhe Victor Kagina alisema vyeo walivyopata haikuwa jitihada zao binafsi bali ni ushirikiano wa wafanyakazi na viongozi, hivyo aliushukuru na kuupongeza uongozi wa Mahakama kwa hatua hiyo.

Jaji Mfawidhi wa Mahakama Kuu ya Tanzania, Kanda ya Kigoma, Mhe. Lameck Mlacha (katikati) akifungua kikao cha uongozi kilichoketi tarehe 21 Oktoba 2022. Kushoto ni Jaji wa Mahakama Kuu kutoka Kanda hiyo, Mhe. Fredrick Manyanda na kulia ni Mtendaji wa Mahakama Kuu Kigoma, Bw. Moses Mashaka.

Muonekano wa keki iliyoandaliwa, upande wa kushoto ni watumishi waliopanda vyeo na upande wa kulia ni wajumbe wa kikao cha Uongozi Kanda ya Kigoma.

Wawakilishi wa Watumishi waliopanda vyeo wakikata keki iliyoandaliwa katika hafla ya kuwapongeza. Kushoto ni Hakimu Mkazi Mkuu wa Mahakama ya Hakimu Mkazi Kigoma, Mhe. Rose Kangwa na kulia ni Hakimu Mkazi Mkuu wa Mahakama ya Wilaya Kibondo, Mhe. Karim Mushi.

Jaji Mfawidhi wa Mahakama Kuu ya Tanzania, Kanda ya Kigoma, Mhe. Lameck Mlacha akimlisha keki Bw. Alex Kenyanya wa Mahakama ya Wilaya Kigoma kama ishara ya kumpongeza baada ya kupanda cheo kuwa Mlinzi Mkuu.

Jaji Mfawidhi wa Mahakama Kuu ya Tanzania, Kanda ya Kigoma, Mhe. Lameck Mlacha akimlisha keki Msadizi wa Kumbukumbu Daraja la Kwanza, Bi Happines Elia.