MAHAKAMA SPORTS YAINYAMAZISHA SHIMIWI

 ·Timu ya mpira wa miguu wanaume yafanya maajabu ikielekea fainali

·Ulinzi wakiri Mahakama ni Mhimili siyo Idara

Na Faustine Kapama-Mahakama, Tanga

Kinya kimetawala katika viunga vya jiji la Tanga kwenye mashindano ya Shirikisho la Michezo ya Wizara na Idara za Serikali (SHIMIWI) yanayokaribia ukingoni kufuatia Timu ya Mahakama ya Tanzania (Mahakama Sports) kuendelea kufanya maajabu ambayo yamewafanya washiriki pinzani kubaki midomo wazi.

Leo tarehe 13 Octoba, 2022 Timu ya Mahakama Sports Mpira Wanaume imethihirisha dua la Kuku halimpati Mwewe baada ya kuwasambaratisha Ulinzi kwa mabao 5:4 kwa njia ya mikwaju ya matuta katika mchezo wa nusu fainali uliochezwa majira ya saa 10.30 jioni katika Viwanja vya Shule ya Sekondari Galanosi.

Mchezo huo ulighubikwa na matukio kadhaa ya sintofahamu, ikiwemo mchezaji wa Mahakama Sports kupewa kadi nyekundu na waamuzi wa mchezo huo kubadilishwa katika dakika za mwisho. Mchezo huo ulihudhuriwa na takribani viongozi wote wa SHIMIWI wakati katika uwanja wa jirani kulikuwa na mchezo mwingine wa nusu fainali uliowahusisha Ujenzi na Hazina.

Pamoja na figisufigisu hizo za kutaka kuwatoa kwenye mchezo, wachezaji wa Mahakama Sports chini ya Mwalimu wao Spear Mbwembe walibaki kuwa watulivu na kulisakata kabumbu kiroho safi kiasi cha kuwashangaza wengi, ikiwemo Wanafunzi wa Shule ya Sekondari Galanosi.

Mchezo huo ulianza kwa kasi huku timu zote mbili zikishambuliana kwa zamu ambapo mashabiki wa Ulinzi walikuwa wanashangilia kwa nguvu ili kuwapa motisha wachezaji wa timu yao. Hata hivyo, ngebe za mashabiki hao zilikatwa baada ya Mahakama Sports kuanza kutandaza kandanda safi lililowaibua mashabiki wake kuwanyamazisha wale wa timu pinzani.

Kulikuwepo na kosa kosa za hapa na pale za magoli kwa timu zote mbili huku zikishambuliana kwa zamu. Milango ya timu zote mbili ilikuwa imenuna hadi mwamuzi anapuliza kipenga kuashiria mapumziko. Kipindi cha pili kilipoanza, Mahakama Sports ilianza kucheza pasi fupi fupi zilizowachanganya wapinzani wao, hivyo kulisakama lango la wapinzani wao mara kwa mara.

Mahakama Sports ilimiriki mpira mara nyingi na kutawala katika eneo la kiungo, hivyo kuwanyima kabisa wapinzani wao kuupita ukuta uliokuwa umesukwa barabara na wachezaji hao. Katika dakika takribani ya 60 ya mchezo, Mahakama Sports ilipata pigo baada ya Mshambuliaji hatari Martin Mapinduzi alipewa kadi nyekundu katika mazingira ya kutatanisha kwa hisia kuwa alimtukana mmoja wa washika vibendera.

Pamoja na tukio hilo, wachezaji wa Mahakama Sports walibaki kuwa watulivu na kuendelea kumiriki mpira, hatua iliyoifanya Timu ya Ulinzi kubadili aina ya uchezaji na kupiga mipira mirefu kuelekea kwenye lango la wapinzani wao. Hata hivyo, Mahakama Sports ilibadilisha aina ya uchezaji na kuweza kuthibiti hatari zote zilizokuwa zinaelekezwa kwenye lango lao.

Baadaye, walimu wa timu zote mbili walifanya mabadiliko kadhaa ili kuongeza nguvu kwa timu zao. Mabadiliko hayo yalileta faida kwa Mahakama Sports ambao waliendelea kushambulia lango la wapinzani wao.

Katika dakika ya 80, mchezaji wa Ulinzi alimfanyia rafu mbaya mchezaji wa Mahakama Sports katika eneo la 18 la lango lao kwa kumpiga kiwiko tumboni, kitendo kilichomfanya mwamuzi kumzawadia kadi nyekundu kwa vile mchezaji huyo alikuwa na kadi moja ya njano.

Hadi dakika 90 za mchezo zinamalizika, timu zote zilikuwa hazijafungana. Ndipo ilipoamriwa mikwaju ya matuta. Katika mikwaju hiyo, Mahakama Sports iliingia kwenye nyavu mara tano, huku Ulinzi wakiambulia minne baada ya Nahodha wao kuangua embe.

Baada ya mchezo huo, jamaa mmoja kutoka Ulinzi alisikika akisema Mahakama Sports ina timu nzuri na ikijipanga vizuri inaweza kuchukua kombe. "Hawa jamaa wapo vizuri. Wamethihirisha kuwa wao ni Mhimili kweli unaojitegemea. Wakiendelea hivi watafika mbali sana," alisema.

Akizungumza baada ya mchezo huo, Katibu wa Mahakama Sports Robert Tende amewapongeza vijana wake kwa kucheza vizuri na kupambana. Alitumia nafasi hiyo kuwkumbusha ahadi aliyokuwa ametoa hapo awali kuwa safari hii Mahakama Sports inavuna makombe katika mashindano hayo.

“Nadhani sasa wenzetu wameshaelewa, kama walikuwa wanafikiri tunatania basi wataona. Safari hii hatuachi kitu, tunachukua makombe yote kwenye mashindano haya na siri pekee inayotubeba ni nidhamu, bidii na uwajibikaji wa hali ya juu, Najua kulikuwepo na njama za kutaka kutuzuia, lakini tumezibaini. Moto tuliowasha hatutauzima mpaka kieleweke,” alisema.

Kwa upande wake, Mwalimu Spear Mbwembwe alimwomba daktari wa wa Timu kuandaa dozi za kutosha kuwatibu wachezaji wa Mahakama Sports kutokana na mlipuko wa ugonjwa wa majipu kwenye kambi. Alishauri juhudi zifanyike kwa haraka kabla ya wachezaji hawajazidiwa.

“Tumeingia fainali, hatuoni wa kutuzuia kunyanyua makwapa. Nilisema juzi hapa kuwa kuna mtu atakula mvua za kutosha kwenye mashindano haya. Umejionea mwenyewe leo kitu gani kilichofanyika. Natoa onyo kali, namshauli mpinzani anayekuja ajitoe mapema, asilaumu mtu kwa balaa litakalomtokea,” alisema.

Wachezaji wa Mpira wa Miguu walioiwakilisha Mahakama katika mchezo huo walikuwa Fahamu Kibona; Iman Patson; Gisbert Chentro; Akida Mzee; Emmanuel Mwamole; Selemani Magawa; Frank Obadia; Gabriel Tabana; Martin Mpanduzi; Mwinjuma Bwanga, Shamte Seif, Hassan Aufi; Nassoro Mwampamba; Kelvin Rutalemwa; Shabiru Hood; David Mnubi; Beatus Simwanza na Timoth Mwakisambwe.

Viongozi ambao wameambatana na Timu ni Mwenyekiti Wilson Dede, Makamu Mwenyekiti Fidelis Choka, Katibu Mkuu Robert Tende, Katibu Mkuu Msaidizi Theodosia Mwangoka, Mweka Hazina Rajab Ally, Timu Meneja Antony Mfaume, Afisa Michezo Nkrumah Katagile na Mjumbe Mwakilishi wa SHIMIWI Taifa Shaibu Kanyochole.

Mashabiki wa Timu ya Mahakama ya Tanzania (Mahakama Sports) (juu na chini) wakishangilia baada ya timu yao kuingia fainali mpira wa miguu wanaume.

Mlinda Mlango wa Timu ya Ulinzi akilamba nyasi baada ya kushindwa kudaka tuta. 

Mchezaji wa Timu ya Mahakama ya Tanzania (Mahakama Sports) akimthibiti mlinzi wa Timu ya Ulinzi.

Mchezaji wa Timu ya Mahakama ya Tanzania (Mahakama Sports) akimlamba chenga mchezaji wa Timu ya Ulinzi.

Wachezaji wa Timu ya Mahakama ya Tanzania (Mahakama Sports) wakilisakama lango la Timu ya Ulinzi.

Mchezaji wa Timu ya Mahakama ya Tanzania (Mahakama Sports) akimiriki mpira.

Mlinda Mlango wa Timu ya Ulinzi akiokoa moja ya hatari zilizoelekezwa kwenye lango la timu yake.

Mwalimu wa Timu ya Mahakama ya Tanzania (Mahakama Sports) Spear Mbwembwe akiongea na wachezaji wakati wa mapumziko.

Timu ya Ulinzi kabla ya mpambano.

Timu ya Mahakama ya Tanzania (Mahakama Sports) kabla ya mchezo.