MAHAKAMA SPORTS CLUB MOTO MKALI MASHINDANO SHIMIWI

•        Yaongoza katika Makundi michezo yote

•        Yatinga 16 Bora kibabe SHIMIWI Morogoro

 Na EVELINA ODEMBA – Mahakama Morogoro

Mahakama Sports Club imeendelea kunyanyua mabega juu katika mashindano ya Shirikisho la Michezo ya Wizara na Idara za Serikali (SHIMIWI) inayoendelea mjini Morogoro.

Hii ni baada ya matokeo ya mpira wa miguu tarehe 25 Septemba, 2024 ambapo Mahakama imeicharaza bila huruma timu toka Nishati kwa mabao matano (5) kwa sifuri, mchezo uliochezwa katika Uwanja wa Jamuhuri Morogoro.

 Akizungumza mara baada ya ushindi huo mnono, Mwenyekiti wa Mahakama Sports Willison Dede alisema kuwa hatua hii ni kubwa zaidi kwa Mahakama kwa kuwa mpaka sasa wanaongoza kundi kwa kuwa na point 12.

 “Ni hatua nzuri kwetu, tokea mashindano yaanze katika hatua za makundi tunaongoza katika kila mchezo tulioshiriki, mpaka sasa Mahakama tumecheza mechi tano, kati ya hizo tumeshinda mechi nne na tumepoteza mechi moja, tuna jumla ya magoli 13 na tunaongoza kundi kwa pointi 12,” alifafanua.

 Aidha, katika michezo mingine Mahakama inaongoza kundi upande wa mpira wa pete na imepita kwenda hatua ya 16 bora, upande wa mchezo wa Kamba Wanaume (ME) na Wanawake (KE) Mahakama ni ya kwanza kwenye kundi na hii inaipa mwanya wa kuingia kumi na sita bora bila kipingamizi.

 Sanjari na hilo, Mahakama Sports Club imetoa washiriki katika riadha na michezo ya jadi ikiwemo tufe, bao, karata na drafti ambayo michezo hiyo inatazamiwa kuanza hivi karibuni, wakati wimbo wa washiriki wote ukiendelea kuwa ni “Shukurani kwa Mwajiri ni kumpelekea ushindi”.

Kikosi cha timu ya mpira wa miguu toka Mahakama Sports Club kikiwa katika picha ya pamoja na viongozi wake kabla ya kuanza kwa mechi dhidi ya Nishati.

Timu za Mpira wa Miguu toka Mahakama (waliovaa jezi nyeusi) na Nishati (waliovaa jezi nyeupe) wakiingia uwanjani ili kuanza mashindano.

Wachezaji toka Timu ya Nishati wakisalimiana na wachezaji toka timu ya Mahakama (waliovaa jezi nyekundu) kabla ya kuanza kwa mchezo huo ulioilaza Nishati kwa mabao matano.

Nahodha wa timu ya Mahakama (aliyevaa jezi nyekundu) akiwa katika picha ya pamoja na marefa waliochezesha mechi ya Mahakama dhidi ya Nishati.

Benchi la ufundi toka timu ya Mahakama likifuatilia kwa makini mchezo uliokuwa ukiendelea uwanjani.

Harakati za mchezo uwanjani Mahakama dhidi ya Nishati.

Mwenyekiti wa Mahakama Sports Club Willson Dede akizungumza kwa furaha mara baada ya Mahakama kuibamiza Nishati mabao matano kwa sifuri.

Kamati ya ufundi ikiongozwa na Kocha wa Mahakama Sports Club Spear Mbwembwe wakiwa katika mkao wa ushindi mara baada ya kumalizika kwa mechi ya Mahakama dhidi ya Nishati.

Wachezaji wa timu ya mpira toka Mahakama wakionesha kwa furaha alama ya tano ikiwa ni ishara ya ushindi wa gori tano waliozizawadia kwa Nishati.

(Habari hii imehaririwa na FAUSTINE KAPAMA-Mahakama, Dar es Salaam)