WATUMISHI WA MAHAKAMA ILALA WAFUNDWA

Na Innocent Kansha - Mahakama

Mwenyekiti wa Kamati ya Mafunzo Mkoa wa Dar es Salaam na Jaji wa Mahakama Kuu ya Tanzania, Kanda ya Dar es Salaam, Mhe. David Patrick Ngunyale amewaasa watumishi kuendelea kuboresha mazingira ya utoaji huduma bora kwa wananchi wanaofika mahakamani kupata huduma mbalimbali ili kuendelea kujenga imani ya wananchi katika huduma zitolewazo na Mahakama kwani ndiyo walengwa wa huduma hizo.

Akifungua mafunzo kwa watumishi wote wa Mahakama wa kada mbalimbali wa Mahakama ya Wilaya Ilala na Mahakama zake za Mwanzo yaliyofanyika Mahakama hapo hivi karibuni, Mhe. Ngunyale aliwakumbusha washiriki wa mafunzo hayo kuwa, huduma na maadili bora huanzia ngazi ya familia, iwapo upendo na amani vitajengwa kutoka ngazi ya familia ni rahisi kuhudumia wateja kwa upendo wawapo eneo la kazi.

Aidha, Mhe. Ngunyale aliwambia washiriki mafunzo hayo ya ndani yana lengo la kuwajengea uwezo katika kuboresha ufanisi wa kazi na kutoa huduma bora zinazoridhisha wateja ili kuendelea kuimarisha imani ya wananchi kwa huduma zinazotolewa na Mahakama.

“Ni rai yangu kwenu washiriki wote wa mafunzo haya tutakayojengewa uwezo kuyaishi mafunzo haya katika kuboresha huduma zaidi kwa wateja na maisha yao binafsi. Vilevile niwashauri kutenga muda wenu kuhudumia familia na kushirikiana na jamii inayowazunguka kwani hamuishi kisiwani,” aliongeza Mhe. Ngunyale

Naye, Afisa TEHAMA kutoka Mahakama Kuu, Kanda ya Dar es salaam Bw. Tumaini Malima akitoa mada juu ya matumizi sahihi ya mifumo ya kuratibu mashauri alisisitiza kwamba, watumiaji wote wa mifumo hiyo wakiwemo Mahakimu na Watunza Kumbukumbu waendelee kuitumia na kuendelea kujifunza ili kuifahamu zaidi inavyofanya kazi.

“Mtaendelea kupokea maboresho mbalimbali yanayohusu mifumo hii ya kuratibu shughuli mbalimbali za kimahakama ili kila mmoja wetu aweze kutoa huduma stahiki na kufikia malengo na matokeo tarajiwa,” alisema Afisa huyo.

Mada zilizowasilishwa katika mafunzo ni pamoja na Huduma kwa Wateja, Maadili ya Watumishi, Afya ya Akili na Matumizi ya Mifumo Mbalimbli ya Mahakama ikiwemo mifumo ya kuratibu mashauri (e-Case Management System) pamoja na Mfumo wa tathmin wa taarifa za watumishi (Ess).

Kwa upande wao, washiriki wa mafunzo hayo walipongeza juhudi za Mahakama na kutoa maoni mbalimbali wakifurahishwa na mafunzo hayo wakisema yamewaongezea uelewa kimaisha kuanzia ngazi ya familia na utoaji huduma bora maeneo ya kazi. Wakaomba mafunzo ya aina hiyo yaendelee kutolewa mara kwa mara ili kuzidi kuboresha utendaji kazi wao.

Naye, Hakimu Mkazi Mfawidhi wa Mahakama ya Wilaya Ilala Mhe. Janeth Boaz Kinyage aliwashukuru wawezeshaji wote kwa kuonyesha upendo na kutenga muda wao kwa ajili ya kutoa mafunzo hayo ambayo yataleta mwamko chanya katika utoaji huduma za kimahakama na mahusiano ya kijamii ndani na nje ya Mahakama.

Mafunzo hayo yaliwashirikisha watumishi wa ngazi mabalimbali wa Mahakama ya Wilaya ya Ilala na Mahakama zake tano (5) za Mwanzo ikiwa ni pamoja na Kariakoo, Ilala, Buguruni, Ukonga na Chanika, na watumishi wa kada mbalimbali wakiwemo Mahakimu, Wahasibu, Wasaidizi wa Kumbukumbu, Waandishi Waendesha Ofisi, Wahudumu wa ofisi na Walinzi.

Mwenyekiti wa Kamati ya Mafunzo Mkoa wa Dar es Salaam na Jaji wa Mahakama Kuu ya Tanzania, Kanda ya Dar es Salaam, Mhe. David Patrick Ngunyale (katikati) akiwa kwenye picha ya pamoja na watumishi wa Mahakama Wilaya ya Ilala na Mahakama zake za Mwanzo mara baada ya kufungua mafunzo kwa watumishi hao. Wengine walioketi ni Hakimu Mkazi Mfawidhi wa Mahakama ya Wilaya Ilala Mhe. Janeth Boaz Kinyage (kulia) na kushoto ni Hakimu Mkazi Mhe. Rehema Lyana.

Mwenyekiti wa Kamati ya Mafunzo Mkoa wa Dar es Salaam na Jaji wa Mahakama Kuu ya Tanzania, Kanda ya Dar es Salaam, Mhe. David Patrick Ngunyale (katikati) akiwa kwenye picha ya pamoja na Mahakimu wa Mahakama ya Wilaya ya Ilala na Mahakama zake za Mwanzo mara baada ya kufungua mafunzo kwa watumishi hao. Wengine walioketi ni Hakimu Mkazi Mfawidhi wa Mahakama ya Wilaya Ilala Mhe. Janeth Boaz Kinyage (kulia) na kushoto ni Hakimu Mkazi Mhe. Rehema Lyana.

Afisa TEHAMA kutoka Mahakama Kuu, Kanda ya Dar es salaam Bw. Tumaini Malima (aliyesimama) akitoa mada juu ya matumizi sahihi ya mifumo ya kuratibu mashauri.

Mwenyekiti wa Kamati ya Mafunzo Mkoa wa Dar es Salaam na Jaji wa Mahakama Kuu ya Tanzania, Kanda ya Dar es Salaam, Mhe. David Patrick Ngunyale (kushoto) akipokea zawadi kutoka kwa Hakimu Mkazi Mfawidhi wa Mahakama ya Wilaya Ilala Mhe. Janeth Boaz Kinyage (kulia).