JUDICIARY OF TANZANIA: MAHAKAMA SPORTS YAIKUNG'UTA HOSPITALI YA RUFAA MBEYA

Na MUKSINI NAKUVAMBA – Mahakama, Mbeya

Timu ya mpira wa miguu ya Mahakama Sports Mbeya imemaliza vyema mchezo wake kwa kuibuka kidedea kwa ushindi wa mabao 2–1 dhidi ya Timu ya soka ya Hospitali ya Rufaa Kanda ya Mbeya, mchezo huo wa gozi la Ng’ombe ulitandikwa katika Uwanja maarufu wa Kumbukumbu ya Sokoine jijini Mbeya na kuvuta hisia za mashabiki wengi wapenda kandanda.

Mchezo huo uliokuwa na ushindani mkali ulianza kwa kasi, huku kila Timu ukionesha dhamira ya kutawala dimba. Mahakama Sports Mbeya ilifanikiwa kupata bao la kwanza katika kipindi cha kwanza kupitia kwa Mchezaji wake Ally Sandali, aliyefungua ukurasa wa mabao na kuiweka timu yake kifua mbele.

Baada ya mapumziko, timu ya Mahakama Sports Mbeya iliingia uwanjani kwa morali kubwa na mchezo uliendelea kwa kasi huku timu zote zikisukuma mashambulizi kutafuta mabao, ila kutokana na moto mkubwa uliowashwa na Mahakama Sports Mbeya iliongeza bao la pili kupitia mchezaji wake mahiri Pierregety Kalaghe na kuimarisha uongozi kwa timu hiyo kwa goli 2 nunge.

Kufuatia mchezo mzuri Hospitali ya Rufaa ya Kanda ya Mbeya ilifanikiwa kupata bao moja la kufutia machozi ambalo lilifungwa kwa ufundi mkubwa na kufanya ubao usomeke mbili kwa moja, hata hivyo hadi kipyenga cha dakika 90 kinasikika mchezo umalizika kwa Mahakama Sports Mbeya kuibuka kidedea kwa ushindi wa goli mbili kwa moja.

Akizungumza mara baada ya mchezo huo, Jaji Mfawidhi wa Mahakama Kuu Masjala Ndogo ya Mbeya, Mhe. Fahamu Mtulya, ambaye pia alishiriki katika mchezo huo, kama maestro supa sabu, aliwapongeza wachezaji kwa kuonesha kiwango kizuri na kuitetea vyema timu yao.

“Hongera kwa wachezaji ambao wametuheshimisha katika mchezo huu na kuibuka na ushindi mnono wa goli mbili. Kwa hakika mmecheza vizuri na ninawashauri kujibidiisha katika mazoezi,” alisema Mhe. Mtulya.

Aidha, Mhe. Mtulya aliwashukuru watumishi waliojitokeza uwanjani kuipa nguvu timu yao, huku akitumia fursa hiyo kuhamasisha watumishi kuendelea kujumuika katika programu za mazoezi zinazofanyika katika viunga vya Mahakama Kuu Mbeya kila Jumanne na Ijumaa.

Mchezo huo pia ulihudhuriwa na Mtendaji wa Mahakama Kuu Masjala Ndogo ya Mbeya, Bw. Festo Chonya, pamoja na viongozi na watumishi wengine wa Mahakama wa ngazi mbalimbali jijini Mbeya.

Ushindi huo, umeongeza hamasa miongoni mwa watumishi na mashabiki wa Mahakama Sports Mbeya, huku mchezo huo ukiendelea kuonesha umuhimu wa michezo katika kuimarisha afya, mshikamano, ushirikiano na mahusiano mema miongoni mwa watumishi.

Timu ya mpira wa miguu ya Mahakama Sports Mbeya (jezi nyeupe) ikimenyana vikali na Timu ya mpra wa miguu ya Hospitali ya Rufaa Kanda ya Mbeya kutafuta ushindi ndani ya dakika 90 za mchezo katika Uwanja maarufu wa Kumbukumbu ya Sokoine jijini Mbeya.

Jaji Mfawidhi wa Mahakama Kuu Masjala Ndogo ya Mbeya, Mhe. Fahamu Mtulya, a.k.a maestro supa sabu akiwa mchezoni katika dimba la Kumbukumbu ya Sokoine Jijiji Mbeya.

Jaji Mfawidhi wa Mahakama Kuu Masjala Ndogo ya Mbeya, Mhe. Fahamu Mtulya, (aliyevalia soksi za bluu) a. k. a maestro supa sabu wa timu ya mpira wa miguu ya Mahakama sports Mbeya wakiwa kwenye benchi la timu hiyo huku akishushia maji baridi wakati wa mchezo huo ndani ya Uwanja maarufu wa Kumbukumbu ya Sokoine jijini Mbeya.

Sehemu ya mashabiki na wapenzi wa timu ya mpira wa miguu ya Mahakama sports Mbeya wakiwa ndani ya Uwanja maarufu wa Kumbukumbu ya Sokoine jijini Mbeya.

Sehemu ya Wachezaji wa akiba wa timu ya mpira wa miguu ya Mahakama sports Mbeya wakiwa kwenye benchi la timu hiyo.

Sehemu ya mashabiki na wapenzi wa timu ya mpira wa miguu ya Mahakama sports Mbeya wakiwa ndani ya Uwanja maarufu wa Kumbukumbu ya Sokoine jijini Mbeya.

Wachezaji wa Mahakama Sports Mbeya wakisikiliza maelekezo ya Mwalimu Bw. Himili Mwaigombe (aliyenyoosha mikono), wakati wa mapumziko baada ya kipindi cha kwanza kumalizika.

Wachezaji wa timu ya mpira wa miguu ya Mahakama sports Mbeya wakiwa kwenye mazoezi ya Mwisho “Warm up” kabla ya mchezo huo kuanza.

Jaji Mfawidhi wa Mahakama Kuu Masjala Ndogo ya Mbeya, Mhe. Fahamu Mtulya, (kushoto) maestro supa sabu akijiandaa kuingia uwanjani wakati wa mchezo huo. Kulia ni Mtendaji wa Mahakama Kuu Masjala Ndogo ya Mbeya, Bw. Festo Chonya.