JAJI MFAWIDHI MUSOMA ASISITIZA WATUMISHI KUZINGATIA SHERIA, TARATIBU KATIKA UTUMISHI WA UMMA

Na. FRANCISCA SWAI - Mahakama, Musoma.

Jaji Mfawidhi wa Mahakama Kuu ya Tanzania, Masjala Ndogo Musoma, Mhe. Edwin Kakolaki, amepogeza watumishi wa Mahakama Musoma kwa utendaji kazi mzuri wa kuridhisha pamoja na utunzaji mzuri wa mazingira na maeneo ya Mahakama.

Mhe. Kakolaki alitoa pongezi hizo katika kikao cha Menejimenti kilichofanyika hivi karibuni katika ukumbi wa Halmashauri ya Mji wilayani Tarime.

Pamoja na pongezi hizo, Mhe. Kakolaki alisisitiza watumishi kuzingatia sheria, taratibu na kanuni katika utumishi wa umma, zinazotoa miongozo mbalimbali ya namna ya kuenenda na utendaji kazi wa kila siku.

Alisisitiza pia kila Mahakama Musoma kuendelea kuchukua tahadhari muhimu juu ya mvua kubwa za El-nino zinazotarajiwa kunyesha ili kuhakikisha majengo, majalada na mali za Mahakama zinakuwa salama.

Aidha, taarifa mbalimbali za utendaji kazi katika kipindi cha robo ya kwanza ya mwaka 2026/2027 ziliwasilishwa na wajumbe wanaounda kikao hicho kutoka Mahakama Kuu Musoma, Mahakama ya Hakimu Mkazi Musoma na Mahakama za Wilaya za Musoma, Butiama, Bunda, Serengeti, Tarime na Rorya.

Akiongea katika kikao hicho, Naibu Msajili wa Mahakama Musoma, Mhe. Omari Kingwele, alisisitiza watumishi wote kutunza maadili yao ya kazi na kufanya kazi kwa uadilifu na weledi, kwani kwa kufanya hivyo wanajihakikishia usalama wa kazi zake wenyewe.

Pia alisisitiza usikilizaji wa mashauri kwa wakati ili kuepuka mlundikano, pamoja na kuhakikisha Mahakama Musoma inavuka mwaka bila mashauri yanayobaki kwa mwaka husika.

Naye Mtendaji wa Mahakama Musoma, Bw. Leonard Maufi, alielezea hatua mbalimbali zilizofikiwa katika miradi inayoendelea ya ujenzi wa Mahakama za Wilaya Tarime, Serengeti na Mahakama ya Mwanzo Nyaburongo iliyoko wilayani Rorya. Aidha, alisisitiza watumishi kuendelea kuzingatia sheria, taratibu na kanuni za kazi.

Naye Mkaguzi wa Ndani, Bw, Andala Nyakuwa, akiwasilisha taarifa yake katika kikao hicho, alisema kila kazi au malipo yanayofanyika ndani ya Mahakama lazima yaonyeshe matokeo chanya.

Pia alisisitiza umuhimu wa ukaguzi wenye malengo wa Mahakama za chini, utekelezaji wa kanuni mpya katika ushughulikiwaji wa malipo ya mirathi pamoja vikao kazi ndani ya Masjala Ndogo Musoma, kwani ndio vinavyowezesha ufanisi katika kazi.

Pamoja na taarifa hizo za utendaji kazi, zilitolewa taarifa za kijamii zilizohusu Mfuko wa Maafa na taarifa ya utalii wa ndani uliofanyika mwezi Agosti 2026, ambapo watumishi walitembelea Hifadhi ya Taifa Tarangire pamoja na maji moto chemka.

Akihitimisha kikao hicho, Jaji Mfawidhi aliwaasa wajumbe kufanyia kazi yale waliyokubaliana, ikiwa ni pamoja na kuendelea kuchukua tahadhari juu ya mvua kubwa zinazotarajiwa kunyesha za El Nino.

Jaji Mfawidhi wa Mahakama Kuu ya Tanzania, Masjala Ndogo Musoma, Mhe. Edwin Kakolaki, akizungumza wakati anafungua kikao cha Menejimenti.

Naibu Msajili wa Mahakama Musoma, Mhe. Omari Kingwele, akiongea na wajumbe wa kikao cha Menejimenti (hawako pichani).

Mtendaji wa Mahakama Musoma, Bw. Leonard Maufi, akiongea na wajumbe wa kikao hicho.

Mkaguzi wa Ndani Mahakama Kuu Musoma, Bw. Adala Nyakuwa (aliyesimama) akiwasilisha mada wakati wa kikao.

Wajumbe wa kikao cha Menejiment wakifuatilia kwa makini taarifa zinazowasilishwa katika kikao hicho.

Watumishi wa Mahakama Kanda ya Musoma wakiwa katika picha ya pamoja wakati wa ziara ya utalii katika Hifadhi ya Taifa Tarangire iliyoko mkoani Arusha.

Sehemu ya Watumishi wa Mahakama Musoma wakifurahia mandhari nzuri ya ChemkaHot Spring iliyoko mkoani Arusha.

Habari hii imehaririwa na FAUSTINE KAPAMA-Mahakama, Dodoma.