JAJI MKUU AISHAURI TLS KUFANYA KAZI KWA KUSHIRIKIANA NA SERIKALI

Na INNOCENT KANSHA- Mahakama

Jaji Mkuu wa Tanzania, Mhe. Prof. Ibrahim Hamis Juma ametoa rai kwa Viongozi wa Chama cha Mawakili Tanganyika (TLS) kufanya kazi zao kwa kushirikiana na Serikali kwani ndiyo nguzo kuu ya uwekezaji wa mambo yote makubwa katika shughuli zote za kimaendeleo, ikiwemo sekta ya sheria.

Mhe. Prof. Juma ametoa wito huo leo tarehe 26 Septemba, 2024 jijini Dar es Salaam alipokuwa akizungumza na Kamati Tendaji ya TLS iliyomtembelea ofisini kwake na kuongeza kuwa hata nchi ya Marekani, ingawa inazungumzia umuhimu wa sekta binafsi, ukienda mbali kimtizamo anayetayarisha mazingira ya sekta binafsi ni Serikali.

“Serikali ndiyo inaweka mazingira bora ya uwekezaji ikiwemo sekta ya sheria kwa kuweka miundombinu rafiki ya kutekeleza majukumu yetu, mfano kujenga reli, barabara za kisasa, viwanda vikubwa, bandari na  mifumo imara ya mtandao wa mawasiliano,” amesisitiza Jaji Mkuu.

Jaji Mkuu ameongeza kuwa sekta binafsi, ikiwemo ya sheria haiwezi kuja ikajenga reli, ikaweka miundombinu rafiki ya mtandao wa mawasiliano na miundombinu mingine mingi bora inayosaidia kutoa huduma kwa wananchi. Hivyo, alitoe rai wasiiweke Serikali mbali bali wahakikishe maswali yawe nafasi za ajira ikoje kwa vijana na wanasheria pale uwekezaji wowote unapojitokeza . 

“Ukiangalia kwa kweli Serikali ni mwekezaji mkubwa  ambaye tukimtumia vizuri anaweza kutusaidia, ukitazama miradi mikubwa yote anayefungua njia ni Serikali ili sekta binafsi iingie. Sekta binafsi haiingii sehemu ambayo ina hasara na haya maeneo makubwa yote ya kiuwekezaji yanatokana na sekta binafsi. Mawakili mna nafasi ya kuongeza ujuzi na mafunzo ya kukabiliana na teknolojia mpya ili muweze kuwa bora kitaaluma kwenye hizo nafasi za ajira mpya,” ameongeza Mhe. Prof. Juma.

Aidha, Jaji Mkuu amefafanua kuwa, Kamati hiyo imepewa mamlaka ya kufanya mabadiliko na mageuzi ya kisekta kwenye mambo makubwa na siyo madogo  yatakayodumu muda mrefu katika maisha ya Mawakili.

“Baadhi ya Mawakili wengine ni watoto wetu, changamoto wanazozipata wengi wetu tunaziona nyumbani na tunanyang'anyana nao pesheni. Unakuta ana shahada, amesoma vizuri lakini bado anategemea pesheni ya mzazi, wakati mzazi naye alitegemea aanze kupata ruzuku kutoka kwake,” amesema Jaji Mkuu.

Mhe. Prof. Juma akaongeza kuwa, wanapaswa kutafakari namna bora ya kutengeneza maslahi na kuhakikisha wanafanikiwa kwa sababu milango ipo wazi siku zote na wakiwa na hoja zitapimwa na ushauri utatolewa wa kufikia malengo waliyojiwekea ili kuyafikia.

Jaji Mkuu ameikumbusha Kamati hiyo kuwa, maboresho makubwa yaliyofanywa na yanayoendelea kutekelezwa na Mahakama yanatokana na Mahakama kuisoma Dira ya Maendeleo ya Taifa ya Mwaka 2025 na kuangalia Tanzania kama nchi inaenda wapi. 

“Kwa hivyo tunahakikisha shughuli zetu zote zinaendana na kutekeleza yale malengo ya dira ya taifa na ndiyo maana utakuta tunapata unafuu wa kibajeti kutekeleza majukumu yetu. Mahakama imekuwa ikijielekeza kwamba yenyewe ni sehemu ya utekelezaji wa Dira ya Taifa,” ameongeza Jaji Mkuu.

Mhe. Prof. Juma aliendelea kuwakumbusha kuwa Mpango Mkakati wa Mahakama umeweka shabaha kwamba chochote kinachotekelezwa na Mahakama, mathatlani huduma ya utoaji haki, haki za binadamu, utawala bora ni sehemu ya kufikia Dira ya Taifa ya Mwaka 2025. Kwa hiyo, alisema Mahakama inatumia lugha ya kimaendeleo ili kujenga hoja kupata fedha zinazotolewa kwenye shughuli za kiserikali.

"Mageuzi haya yametusaidia  kupata rasilimali fedha za kuweza kufanya maboresho, na mimi naamini chama chenu ni wadau muhimu  wa sheria. Nyinyi ndiyo chimbuko la wanasheria watakaoenda kufanya kazi za ushauri wa matumizi ya sheria, hivyo tukiwapa msingi mzuri na mkiwezeshwa mtaweza kufanya kazi ambayo itaisaidia  jamii,” alisema.

Jaji Mkuu akaongeza kuwa, ukiangalia maneno ya utangulizi ya Rais wa Awamu ya Tatu Benjamin William Mkapa ya kwenye Dira ya Mwaka 2025, yalilenga kuangalia Tanzania ya miaka 25, kwamba itakuwa ni Tanzania ya aina gani, kama unataka kufanikiwa ukiwa mwanasheria au mwandishi ni vitu gani vya kuangalia. Alieleza kuwa utangulizi huo unasema katika robo karne hiyo itatawaliwa na sifa ya ushindani, mfano kwenye ajira na kila kitu.

Alibainisha kuwa hakuna rasilimali zitakazowatosheleza watu wote na lazima kutakuwa na ushindani kupata rasilimali hizo, ikiwa ni karne itakayo tawaliwa na wale wenye uwezo mkubwa wa kutawala maendeleo ya sayansi na teknolojia. Mhe. Prof. Juma aliieleza Kamati hiyo kuwa eneo hilo ni lazima Mawakili wajijenge katika uwezo wa matumizi ya teknolojia na matumizi ya akili mnemba ili waweze kwenda sambamba na mageuzi hayo.

“Tunapozungumzia soko la Mawakili hatuzungumzii soko la mawakili Tanzania tu, tunazungumzia soko linalotokana na utandawazi na soko kutoka nje ambalo lina nafasi zaidi kuliko ndani ya nchi,” ameongeza Jaji Mkuu.

Kwa upande wake Rais wa Chama cha Wanasheria Tanganyika (TLS), Wakili Boniface Mwabukusi amesema Chama kupitia Kamati Tendaji wanaipongeza Mahakama ya Tanzania kwa juhudi kubwa za kuendelea kutoa huduma zake zinazoendana na karne ya 21.

“Miundombinu bora ya kutolea huduma ya haki, matumizi ya Teknolojia ya Habari na Mawasiliano ni kiashiria tosha kwamba wezentu mmepiga hatua kubwa na kutuacha kwa mbali, ubora huu ni wa kipekee,” amesema Rais Mwabukusi.

Rais Mwabukusi, kwa niaba ya Kamati Tendaji ya Chama hicho, akatoa baadhi ya maombi kwa Mahakama ya kurekebisha baadhi ya mambo yatakayowasaidia Mawakili kufanya kazi zao kwa ufanisi.

Moja ya mambo hayo ni kuunganisha mfumo wa Mahakama wa kutambua Mawakili ili usomane na mfumo unatumiwa na Chama hicho ili waweze kubaini baadhi ya Mawakili wasiofanya vizuri katika kutoa ada zao za uwanachama, kwani Chama kinajiendesha kwa kutegemea michango ya Mawakili.

Rais huyo ameiomba Mahakama kupitia kwa Jaji Mkuu kutazama kwa karibu muundo wa mfumo wa sasa wa Kamati ya Maadili ya Mawakili, bila kuathiri mambo mengine, ili uwekewe utaratibu mzuri wa namna bora ya kusimamia nidhamu ya Mawakili. 

Jaji Mkuu wa Tanzania, Mhe. Prof. Ibrahim Hamis Juma (juu na chini) akizungumza na Wajumbe wa Kamati Tendaji ya Chama cha Mawakili Tanganyika (TLS) (hawapo pichani) walipomtembelea ofisini kwake na kufanya mazungumza ya kina ya mambo mbalimbali ya maendeleo ya chama hicho leo tarehe 26 Septemba, 2024 jijini Dar es Salaam

\

Jaji Mkuu wa Tanzania, Mhe. Prof. Ibrahim Hamis Juma (kushoto) akisalimiana na Rais wa Chama cha Mawakili Tanganyika (TLS) Wakili Boniface Mwabukusi alipowasili ofisini kwakejijini Dar es Salaam leo tarehe 26 Septemba, 2024.

Rais wa Chama cha Mawakili Tanganyika (TLS) Boniface Mwabukusi akisaini kitabu cha wageni alipowasili ofisini kwa Jaji Mkuu jijini Dar es Salaam leo tarehe 26 Septemba, 2024.

Kamati Tendaji ya Chama cha Mawaqkili Tanganyika (TLS) ikimsikiliza Jaji Mkuu wa Tanzania, Mhe. Prof. Ibrahim Hamis Juma (hayupo pichani) wakati wa ziara ya kujitambulisha ofisini kwake jijini Dar es Salaam.

Sehemu ya Viongozi Waandamizi wa Mahakama ya Tanzania wakiongozwa na Jaji Mfawidhi wa Mahakama Kuu ya Tanzania, Kanda ya Dar es Salaam, Mhe. Salma Maghimbi wakimsikiliza Jaji Mkuu wa Tanzania, Mhe. Prof. Ibrahim Hamis Juma (hayupo pichani) wakati wa ziara ya kujitambulisha ya Kamati Tendaji ya Chama cha Mawakili Tanganyika (TLS) jijini Dar es Salaam.

Jaji Mkuu wa Tanzania Mhe. Prof. Ibrahim Hamis Juma (juu na chini) akizungumza na Wajumbe wa Kamati Tendaji ya Chama cha Mawakili Tanganyika (TLS) ilipomtembelea ofisini kwake na kufanya mazungumza ya kina ya mambo mbalimbali ya maendeleo ya chama hicho leo tarehe 26 Septemba, 2024 jijini Dar es Salaam.

Jaji Mkuu wa Tanzania, Mhe. Prof. Ibrahim Hamis Juma akionesha picha ya bango la Maboresho ya Mahakama ya Tanzania lilivyobeba dhana ya Dira ya Taifa ya Maendeleo ya Mwaka 2025

Rais wa Chama cha Mawakili Tanganyika (TLS) Wakili Boniface Mwabukusi akifafanua jambo wakati wa ziara hiyo.

Rais wa Chama cha Wanasheria Tanganyika (TLS) Wakili Boniface Mwabukusi (wa kwanza kushoto) akitoa maelezo mafupi mbele ya Jaji Mkuu wa Tanzania, Mhe. Prof. Ibrahim Hamis Juma wakati wa ziara hiyo.

Msajili Mkuu wa Mahakama ya Tanzania, Mhe. Eva Nkya akifafanua jambo kwa wajumbe wa Kamati Tendaji ya Chama cha Mawakili Tanganyika (TLS) ofisini kwa Jaji Mkuu jijini Dar es Salaam.

Jaji Mkuu wa Tanzania, Mhe. Prof. Ibrahim Hamis Juma (kushoto) akimkabidhi Rais wa Chama cha Mawakili Tanganyika (TLS) Wakili Boniface Mwabukusi (kulia) Kitabu cha Mpango Mkakati wa Mahakama ya Tanzania wakati wa ziara yao ofisini kwa Jaji Mkuu jijini Dar es Salaam.

Jaji Mkuu wa Tanzania, Mhe. Prof. Ibrahim Hamis Juma (kushoto) akimkabidhi Rais wa Chama cha Mawakili Tanganyika (TLS) Wakili Boniface Mwabukusi (kulia) Kitabu cha Taarifa ya Utafiti kuhusu kuridhika kwa watumiaji wa huduma za Mahakama ya mwaka 2023 wakati wa ziara yao ofisini kwa Jaji Mkuu jijini Dar es Salaam.

Jaji Mkuu wa Tanzania Mhe. Prof. Ibrahim Hamis Juma (mwenye tai nyekundu) akiwa kwenye picha ya pamoja na Viongozi Waandamizi wa Mahakama ya Tanzania na Viongozi Waandamizi wa Kamati Tendaji ya Chama cha Mawakili Tanganyika (TLS) walipomtembelea fisini kwake jijini Dar es Salaam.

Wajumbe wa Kamati Tendaji ya Chama cha Wanasheria Tanganyika (TLS) wakiwa kwenye picha ya pamoja wakiongozwa na Rais wa Chama cha Mawakili Tanganyika (TLS) Wakili Boniface Mwabukusi (wa nne kutoka kushoto) mara baada ya ziara yao ya kiofisi kwa Jaji Mkuu jijini Dar es Salaam.

(Picha na Innocent Kansha -Mahakama)