JAJI NDUNGURU AKUMBUSHIA KIWANJA CHA UJENZI WA JENGO LA MAHAKAMA KUU IRINGA

Na LUSAKO MWANG’ONDA-Mahakama Iringa.

Katika kuadhimisha Siku ya Sheria nchini, Jaji Mfawidhi wa Mahakama Kuu ya Tanzania, Kanda ya Iringa, Mhe. Dustan Beda Ndunguru amekumbushia ahadi ya Ofisi ya Mkuu wa Mkoa wa Iringa ya kutoa kiwanja kwa Mahakama ya Tanzania kwa ajili ya kujenga jengo jipya la Makahama Kuu.

Jaji Ndunguru alikumbushia ahadi hiyo jana tarehe 3 Februari, 2025 wakati akiongea na umati wa watu uliohudhuria maadhimisho hayo ambapo Mkuu wa Mkoa wa Iringa, Mhe. Peter Serukamba alialikwa kama mgeni maalumu.

“Mhe. Mkuu wa Mkoa, ofisi yako mwaka jana ilituahidi kutupatia kiwanja kwa ajili ya ujenzi wa jengo la Mahakama Kuu Iringa. Naomba nitumie fursa hii ya uwepo wako hapo kukumbushia utekelezaji wa ahadi hii, ambayo sisi Mahakama Iringa tunaisubiri kwa hamu sana,” alieleza.

Kuhusu jambo hilo, Mkuu wa Mkoa wa Iringa amesema ofisi yake italishughulikia na kuhakikisha linatekelezwa mapema kwa kadri iwezekanavyo.

Katika hatua nyingine, Jaji Ndunguru amewashukuru Wadau wote wa Mahakama Kanda ya Iringa kwa ushiriano waliounesha tangu ufunguzi wa Wiki ya Sheria, ambapo wameshiriki kwa mambo mbalimbali, ikiwemo kutoa elimu ya sheria.

Kadhalika, Wadau hao walishirikiana na Mahakama katika kufanikisha matendo ya huruma kwa kutembelea na kupeleka mahitaji mbalimbali katika vituo mbalimbali vya watoto yatima vilivyopo Manispaa ya Iringa.

Wadau mbalimbali walioshirikikiana na Mahakama kuanzia kwenye Wiki ya Sheria mpaka kwenye Maadhimisho ya Siku ya Sheria walitunikiwa vyeti maalumu kama alama ya shukrani na pongezi kwa ushiriki wao.

Maadhimisho ya Siku ya Sheria kimkoa yamefanyika katika Viwanja vya Mahakama Kuu Iringa na kuhudhuriwa na Wadau na Wananchi mbalimbali, huku burudani kadhaa zikianikusha tukio hilo.

Jaji Mfawidhi wa Mahakama Kuu ya Tanzania, Kanda ya Iringa, Mhe. Dunstan Ndunguru (aliyesimama juu), ambaye alikuwa mgeni rasmi kwenye Maadhimisho ya Siku ya Sheria akijiandaa kukagua gwaride maalumu liliandaliwa na Jeshi la Polisi.

 Jaji Mfawidhi wa Mahakama Kuu ya Tanzania, Kanda ya Iringa, Mhe. Dustan Ndunguru akikagua gwaride maalumu liliandaliwa na Jeshi la Polisi kwa ajili ya Maadhimisho ya Wiki ya Sheria.

 

Mkuu wa Mkoa wa Iringa, Mhe. Peter Serukamba akizungumza katika maadhimisho hayo.

 

Naibu Msajili wa Mahakama Kuu Kanda ya Iringa, Mhe. Bernazitha Maziku akizungumza jambo katika maadhimisho ya Siku ya Sheria nchini.

 

Mtendaji wa Mahakama Kuu Kanda ya Iringa, Bi. Richard Mkongwa akizungumza jambo katika maadhimisho ya Siku ya Sheria nchini.

 

Sehemu ya umati wa Wananchi wahudhuriaji maadhimisho hayo wakifuatilia hotuba ya Jaji Mfawidhi wa Mahakama Kuu ya Tanzania, Kanda ya Iringa Mhe. Dustan Beda Ndunguru (hayupo pichani).

 

Kikundi cha Bendi ya Watumishi wa Mahakama Kuu Ka,nda ya Iringa, maarufu kama “Mahakama Band” kikitoa burudani kwa kuimba wimbo maalumu wa madhimisho ya Siku ya Sheria nchini.

(Habari hii imehaririwa na FAUSTINE KAPAMA-Mahakama, Dodoma)