RAIS KIKWETE AWAAPISHA WASAJILI WA MAHAKAMA YA TANZANIA—22.10.2015

Mhe. Dkt. Jakaya Mrisho Kikwete, Rais wa Jamhuri ya Muungano wa Tanzania mapema leo amewaapisha Wasajili wa Mahakama ya Tanzania, Ikulu jijini Dar es Salaam.

Mhe. Rais amemuapisha Mhe. Katarina Revocatti, kuwa Msajili Mkuu wa Mahakama ya Tanzania, Mhe. John Kahyoza naye ameapishwa kuwa, Msajili wa Mahakama ya Rufani (T).

Kabla ya uteuzi wake, Mhe. Revocatti alikuwa, Msajili wa Mahakama ya Rufani (T), naye Mhe. Kahyoza alikuwa Msajili wa Mahakama Kuu ya Tanzania.

Kwa upande, Msajili Mteule wa Mahakama ya Tanzania, Mhe. Revocatti ameahidi kufanya kazi kwa uadilifu na kuendeleza mapambano ya maboresho yanayoendelea kufanyika ndani ya Mahakama ya Tanzania.

“Mahakama ya Tanzania ipo katika mipango mingi ya maboresho ambayo yote inalenga kuboresha huduma ya utoaji haki nchini, hivyo ni jukumu langu kuhakikisha naendeleza mikakati yote ya maboresho iliyopo ndani ya Mahakama,” alisema Mhe. Revocatti.

Aliongeza kuwa changamoto iliyopo kwa upande wa jamii ni uelewa mdogo wa taratibu mbalimbali za Kimahakama hivyo, amewataka wadau mbalimbali wa Mahakama na Sheria kwa ujumla kusaidia katika kuelimisha wananchi juu ya taratibu mbalimbali za Kimahakama.

Aidha, Jaji Kiongozi wa Mahakama ya Tanzania, naye amemuapisha, Mhe. Ilvin Mugeta kuwa Msajili, Mahakama Kuu ya Tanzania ambaye anashika nafasi iliyoachwa wazi na Mhe. John Kahyoza ambaye ameteuliwa kuwa Msajili wa Mahakama ya Rufani (T).

Kabla ya uteuzi wake, Mhe. Mugeta alikuwa Mkurugenzi wa Maadili na Ukaguzi-Mahakama ya Tanzania.