TANGAZO LA NAFASI ZA KAZI.

JAMHURI YA MUUNGANO WA TANZANIA

TUME YA UTUMISHI WA MAHAKAMA

                                                                    

TANGAZO LA NAFASI 58 ZA KAZI. 

1.0     Tume ya Utumishi wa Mahakama ni chombo kilichoundwa kwa mujibu wa aya ya 112(1) ya Katiba ya Jamhuri ya Muungano wa Tanzania ya mwaka 1977. Aidha, kwa mujibu wa  Sheria ya Uendeshaji wa  Mahakama Na. 4/2011, Tume ya Utumishi wa Mahakama mbali na kuwa na majukumu mengine inalo jukumu la kuajiri  watumishi wa kada mbalimbali wa Mahakama.

1.1        Hivyo, Tume ya Utumishi wa Mahakama inawatangazia Watanzania wenye sifa zilizoainishwa hapo chini kwa kila nafasi ya kazi na ambao wako tayari kufanya kazi kwenye kituo chochote Tanzania Bara, katika Ofisi za Mahakama ya Tanzania zilizoko katika Mikoa na Wilaya mbalimbali kuleta maombi yao ya kazi. Nafasi hizo ni Hakimu Mkazi Daraja la II, Mhasibu Daraja la II, Mhasibu Msaidizi, Afisa Utumishi Daraja la II, Afisa Tawala Daraja la II,  Mkaguzi wa Hesabu wa Ndani Daraja la II, Afisa Ugavi Daraja la II, Katibu Mahsusi Daraja la III, Msaidizi wa Kumbukumbu Daraja la II, Msaidizi wa Maktaba, Mpokezi ,  Msaidizi wa Ofisi na Mlinzi.

1.2        Tafadhali soma kwa makini na kuzingatia maelekezo yote yaliyoorodheshwa katika sehemu ya kumi na sita ya tangazo hili.

2.0       Hakimu Mkazi  Daraja la II – TJS 2  - Nafasi  - 20

          2.1     Sifa:-

·       Waombaji  wawe  na shahada ya kwanza ya Sheria “Bachelor of Laws” (LLB) kutoka katika Chuo kikuu kunachotambulika na Serikali pamoja na  cheti cha mafunzo ya Sheria kwa vitendo (Law school Certificate).

          2.2     Kazi za kufanya:-

    (i)        Kuandaa mpango wa kusikiliza mashauri.

   (ii)      Kusikiliza mashauri ya  awali ya Jinai(Criminal  Cases), Madai (Civil Cases), Mirathi (Probate and Administration) na ndoa (Matrimonial Cases).

  (iii)      Kutoa hukumu katika mashauri yote  anayoyasikiliza  ya jinai, madai, mirathi, ndoa na mashauri  mengine, kadri sheria inavyomruhusu.

  (iv)      Kutoa amri mbalimbali za kimahakama anazoruhusiwa kisheria katika Mahakama za Mwanzo.

   (v)      Kusuluhisha mashauri.

  (vi)      Kusikiliza rufani kutoka Mabaraza ya Kata.

3.0.      Afisa Utumishi Daraja la II (TGS D) - Nafasi  - 3.

3.1      Sifa:-

Shahada ya kwanza ya Sayansi ya Jamii au Sanaa kutoka katika Vyuo Vikuu  vinavyotambuliwa na Serikali  ambao wamejiimarisha (major) katika  mojawapo  ya fani zifuatazo:-

·       Menejimenti ya RasilimaliWatu (Human Resource Management)

·       Elimu ya Jamii (Sociology)

·       Utawala  na Uongozi (Public Administration)

·       Mipango ya Watumishi (Manpower Planning)

·       Wawe na ujuzi  wa kutumia kompyuta.

·        

3.2   Kazi za Afisa Utumishi Daraja la II:-

(i)         Kutunza Kumbukumbu  sahihi  za watumishi  wote

(ii)       Kutafsiri na kushughulikia utekelezaji wa miundo ya  utumishi.

(iii)         Kutafiti, kuchanganua, kupanga na kukadiria idadi ya                        watumishi wanaohitaji   mafunzo.

(iv)     Kukusanya, kuchambua na kupanga takwimu na kumbukumbu zote zinazohusu mipango ya watumishi.

(v)       Kushughulikia masuala mbalimbali ya kila siku ya watumishi

(vi)     Kusimamia OPRAS.

4.0       Afisa Tawala Daraja la II – TGS D – Nafasi - 1

    4.1     Sifa:-

           Shahada  ya kwanza kutoka  vyuo Vikuu                                         vinavyotambuliwa na serikali  katika fani zifuatazo:-

Utawala, Elimu ya Jamii, Menejimenti ya Umma, Uchumi na wenye ujuzi wa kompyuta

4.2        Kazi za Maafisa Tawala:-

                       (i)               Kuweka kumbukumbu  za matukio muhimu

                        (ii)        Kusimamia utekelzaji wa Sheria, Sera, Kanuni na taratibu mbalimbali

                       (iii)        Kusimamia  kazi za utawala  na uendeshaji

  

5.0 Afisa Ugavi Daraja la II – TGS D – Nafasi – 2

5.1         Sifa:-

Shahada  ya Biashara (B.Com) yenye mchepuo wa ugavi au Stashahada ya Juu ya Ugavi (Advanced Diploma in Materials Management) inayotolewa na vyuo Vikuu vinavyotambuliwa na Bodi ya Taifa ya Usimamaizi wa Vifaa.

5.2        Kazi za Maafisa Ugavi:-

(i) Kukusanya takwimu za kuweza kusaidia kutayarisha makisio ya vifaa vinavyohitajika.

(ii)     Kuandaa mpango wa manunuzi.

(iii)    Kukusanya na utunzaji wa takwimu za utendaji za wazabuni mbalimbali.

(iv)  Kukusanya na utunzaji wa takwimu za upokeaji, utunzaji, na usambazaji wa vifaa.

(v)    Kusimamia utunzaji wa maghala na hati/kumbukumbu ya vifaa vilivyomo ghalani.

(vi)   Kusimamia upokeaji, utunzaji na usambazaji wa vifaa.

(vii)  Kusimamia ukaguzi wa kuhesabu vifaa mara kwa mara.

6.0       Mkaguzi wa Hesabu wa Ndani Daraja la II (Internal Auditor Grade II)  TGS D - Nafasi 1

  6.1   Sifa

   (i)  Wenye ‘Intermediate Certificate’ inayotolewa na NBAA

  (ii)  Wenye Shahada ya Biashara au Sanaa yenye mwelekeo wa                        Uhasibu au Stashahada ya juu ya Uhasibu (ADA) kutoka                             Chuo/Taasisi yoyote inayotambuliwa na serikali.

(iii)    Wenye stashahada ya juu katika Uhasibu wa Serikali

        (Advanced Diploma in Government Accounting) kutoka chuo

        cha Uhasibu Dar es salaam (DSA).

6.2     Kazi za Mkaguzi wa Hesabu wa Ndani Daraja la II

                              (i)        Kufanya Ukaguzi wa hesabu

                             (ii)        Kusahihisha na kuidhinisha ripoti ya Ukaguzi

                            (iii)        Kusahihisha na kuidhinisha hoja za ukaguzi wa ndani

(Internal Audit queries)

                  

  

7.0 Mhasibu Daraja la II TGS D – Nafasi 6

          7.1     Sifa:- 

(i)   ‘Intermediate Certificate’ inayotolewa na NBAA.

(ii)   Shahada ya Biashara/Sanaa yenye mwelekeo wa uhasibu au Stashahada ya juu ya Uhasibu kutoka Chuo Kikuu/ Taasisi yoyote inayotambuliwa na Serikali.

(iii) Stashada ya Juu ya Uhasibu Serikalini (Advanced Diploma in Government Accounting) inayotolewa na Chuo cha Uhasibu kinachotambuliwa na Serikali.

          7.2     Kazi za kufanya:-

(i)      Kuidhinisha hati za malipo.

(ii)   Kuandika taarifa ya mapato na matumizi ya mwezi.

(iii)   Kusimamia Wahasibu Wasaidizi katika kazi zao za kila siku.

(iv)  Kusimamia shughuli za uhasibu kwenye Kitengo cha Idara.

(v)     Kuandika taarifa ya maduhuli.

8.0       Mhasibu Msaidizi TGS C - Nafasi 3

    8.1   Sifa

(i)                    Kuajiriwa wenye cheti cha ufaulu mtihani mgumu wa Uhasibu Serikalini (Higher Standard Government Accountancy Examination) unaotolewa na Tume ya Utumishi wa Umma au

(ii)      Wenye Stashahada ya Kawaida ya Uhasibu kutoka Chuo/Taasisi yoyote inayotambiliwa na Serikali. Aidha mwenye uzoefu usiopungua mwaka mmoja (1) katika fani hiyo atafikiriwa kwanza.

8.2        Kazi za kufanya:-

(i)                  Kupokea na kulipa fedha

(ii)                Kutunza daftari la fedha

(iii)               Kufanya usuluhisho wa hesabu za benki

(iv)               Kukagua hati za malipo

(v)                Kupitisha malipo kulingana na kanuni za fedha

(vi)               Kusimamia kazi za Wasaidizi wa Hesabu.

                     

9.0       Katibu Mahsusi  Daraja la III TGS B – Nafasi 2

9.1       Sifa:-

Kuajiriwa  wahitimu  wa kidato cha IV  waliohudhuria  Mafunzo ya Uhazili  na kufaulu  mtihani wa Uhazili  Hatua ya Tatu. 

Wawe wamefaulu  somo la Hatimkato  ya Kiswahili na Kiingereza (Shorthand) maneno 80 kwa dakika moja na  wawe wamepata  mafunzo ya Kompyuta  kutoka chuo chochote kinachotambuliwa  na Serikali na kupata cheti katika programu za  Windows, Microsoft Office, Internet, E-mail  na Publisher.

9.2       Kazi za kufanya:-

Katibu Mahsusi  Daraja la III atapangiwa  kufanya kazi Typing pool  au chini  ya Katibu Mahsusi  mwingine mwenye  cheo cha juu  kumzidi  kwenye ofisi  ya Mkuu wa sehemu au kitengo.

(i)       Kuchapa barua, taarifa na nyaraka za kawaida

(ii)      Kusaidia kupokea wageni na kuwasaili shida zao, na kuwaelekeza sehemu wanazoweza kushughulikiwa.

(iii)     Kusaidia  kutunza taarifa, kumbukumbu  za matukio, miadi, wageni, tarehe  za vikao  safari za Mkuu wake  na ratiba  ya kazi  zingine zilizopangwa kutekelezwa katika ofisi anamofanyia  kazi, na kumuarifu Mkuu wake  kwa wakati  unaohitajika.

10 .0 Msaidizi wa Kumbukumbu Daraja la II TGS B – Nafasi 7

  10. 1          Sifa za Kuingilia:-

Kuajiriwa wahitimu wa kidato cha nne au sita wenye cheti/Stashahada ya utunzaji kumbukumbu katika mojawapo ya fani za Afya, Masjala, Mahakama na Ardhi.

10.2        Kazi za kufanya:

(i)   Kutafuta kumbukumbu/nyaraka/mafaili yanayohitajiwa na wasomaji.

(ii) Kudhibiti upokeaji, uandikishaji wa kumbukumbu/nyaraka.

(iii)  Kuweka/kupanga kumbukumbu/nyaraka katika reki (file racks/cabinets) katika masjala/vyumba vya kuhifadhia kumbukumbu.

(iv)  Kufanya kazi nyingine za kiutawala zinazohusu masuala ya kimahakama kama kuwasilisha nyaraka za kisheria Mahakamani na kuangalia muda na siku ya kufanyika kwa kesi husika.

(v) Kufanya kazi nyingine atakayopangiwa.

11 Msaidizi wa Maktaba Daraja la II TGS B - Nafasi 1

11.1   Sifa za Kuingilia:-

Kuajiriwa wenye cheti cha Mtihani wa kitaifa wa  kidato cha IV ambao wamefaulu mafunzo ya Wasaidizi wa Maktaba (National Library Assistants Certificate Course) yatolewayo na Bodi ya Huduma za Maktaba Tanzania au wenye cheti kinacholingana na hicho.

11.2   Kazi za kufanya:-

(i)       Kuandikisha wasomaji

(ii)      Kupanga vitabu katika rafu (Shelves)

(iii)     Kuazimisha na kupokea vitabu  vinavyoazimwa

(iv)     Kukarabati vitabu  vilivyochakaa

(v)      Kazi nyingine atakazopangiwa na mkuu wa kituo.

12. 0 Mpokezi TGS A – Nafasi – 1

12.1    Sifa:-

Kuajiriwa wahitimu wa kidato cha IV waliofaulu masomo ya Kiingereza, Kiswahili na Hisabati na Kufuzu mafunzo ya mapokezi na upokeaji simu kutoka vyuo vinavyotambuliwa na Serikali.

12.2   Kazi za kufanya:-

             (i)         Kupokea wageni na kuwasilisha shida zao

            (ii)         Kutunza na kudumisha usafi wa “ Switchboard” na Ofisi yake,

          (iii)         Kupokea simu kutoka nje na kuzisambaza kwa maafisa mbalimbali Ofisini.

          (iv)         Kupokea simu kutoka “Extension” za ndani na kupiga nje ya ofisi,

            (v)         Kutunza rejesta ya simu zinazopokelewa kutoka nje ya ofisi na zinazopigwa nje ya ofisi.

13.0 Msaidizi wa Ofisi TGOS A – Nafasi  - 5

13.1 Sifa:-

Kuajiriwa wahitimu wa kidato cha nne waliofaulu vizuri katika masomo ya  Kiingereza, Kiswahili na Hisabati.

13.2 Kazi za kufanya:-

               i.         Kufanya usafi wa ofisi na mazingira ya nje na ndani ikiwa ni pamoja na kufagia, kufuta vumbi, kupiga deki, kukata majani, kupalilia  bustani, kumwagilia maji bustani, kupanda maua na miti na  kusafisha vyoo.

              ii.       Kuchukua na kupeleka majalada na hati nyingine kwa maofisa wanaohusika na kuyarudisha sehemu zinazohusika.

             iii.         Kusambaza barua za Ofisi kama jinsi atakavyoelekezwa.

             iv.         Kutayarisha chai ya ofisi

              v.         Kupeleka mfuko wa  posta na kuchukua barua kutoka Posta.

             vi.         Kuhakikisha kwamba vifaa vya ofisi vinawekwa sehemu zinazostahili.

            vii.         Kufunga Milango na  Madirisha ya Ofisi wakati wa asubuhi na Jioni na kuyafunga baada ya saa za kazi.

          viii.         Kudurufu barua au machapisho.

             ix.         Kuweka katika majalada nakala za barua  zilizochapwa katika  ofisi walizomo.

              x.         Kutunza vifaa vya ofisi na kutoa ripoti kila vinapoharibika.

14.0 Mlinzi TGOS A – Nafasi   - 6

14.1 Sifa:-

Kuajiriwa wahitimu wa kidato cha nne waliofuzu mafunzo ya Mgambo/Polisi/JKT au Mafunzo ya Zimamoto kutoka katika chuo kinachotambuliwa na Serikali.

14.2 Kazi za kufanya:-

(i)      Kuhakikisha kwamba mali yote inayotolewa mlangoni  (nje ya ofisi) ina hati ya idhini.

(ii)    Kuhakikisha kwamba mali yote inayoingizwa langoni inazo hati za uhalali wake.

(iii)    Kulinda usalama wa majengo, ofisi na mali za ofisi mchana na usiku.

(iv)  Kuhakikisha kwamba milango na madirisha yote yamefungwa ipasavyo mwisho wa saa za kazi.

(v)  Kuhakikisha kwamba wageni wote wanaoingia katika eneo la ofisi wana idhini ya kufanya hivyo.

Mwisho wa kupokea barua za maombi hayo ni tarehe 15/06/2016 saa 9:30 Alasiri.

15.0     Barua za maombi ziandikwe kwa mkono wa mwombaji na kuambatisha:-

-      Vivuli vya vyeti vyote vya elimu na mafunzo.

-      Ufupisho wa taarifa za mwombaji (CV).

-      Kivuli cha cheti cha kuzaliwa.

-      Picha mbili (Passport size) zilizopigwa hivi karibuni.

16.0   Aidha, inasisitizwa kwamba:-

16.1   Waombaji wawe na umri kati ya miaka kati ya 18 na 44

16.2   Waombaji wa kazi toka maeneo husika na wenye sifa zilizoainishwa katika tangazo hili, watafikiriwa kwanza na kupangiwa kazi katika maeneo husika.

16.3   Maombi yote yapitishwe kwa Katibu Tawala wa wilaya anayoishi  mwombaji.

16.4   Waombaji walio katika Utumishi wa Umma wapitishe maombi yao   kwa waajiri wao wa sasa.

16.5   Waombaji walioacha kazi katika Utumishi wa Umma waeleze kwamba  waliacha kazi Serikalini na sababu ya kufanya hivyo.

16.6   Waombaji watakao shinda usaili na kuajiriwa watakuwa watumishi wa Mahakama ya Tanzania.

16.7   Waombaji waliosoma nje ya nchi vyeti vyao vithibitishwe na TCU/NACTE wakishindwa kutekeleza hili maombi yao hayatashughulikiwa.

16.8   Waombaji waandike majina yao yote matatu kwa kirefu.

16.9   Waombaji waandike nafasi ya kazi wanayoomba nyuma ya bahasha watakazotumia maombi yao.

16.10 Waombaji waliowahi kufukuzwa kazi wasiombe.

16.11 Waombaji wasio na sifa zilizotajwa na ambao hawatazingatia  masharti yaliyotajwa hapo juu maombi yao hayatashughulikiwa.

16.12 Waombaji watakaotoa taarifa za uongo mfano kuhusu umri   wao, elimu yao au sehemu walizowahi kufanyia kazi na ikagundulika hata kama watakuwa wameshaajiriwa watachukuliwa hatua kali za kisheria.

17.0 Maombi yote yatumwe kwa njia ya posta kwa Katibu, Tume ya Utumishi wa Mahakama ya Tanzania, S.L.P. 8391 , DAR ES SALAAM.

Imetolewa na ;-

                                   

                                    Katibu,

Tume ya Utumishi wa Mahakama,

S.L.P 8391,

DAR ES SALAAM,

TANZANIA.