WAZIRI MKUU MGENI RASMI UZINDUZI WA MPANGO MKAKATI WA MAHAKAMA YA TANZANIA

 

     Jaji Mkuu wa Tanzania, Mhe. Mohamed Chande Othman , akionesha   nakala ya          kitabu cha Mpango Mkakati wa miaka mitano (5) wa Mahakama ya Tanzania, alipokuwa katika Mkutano kati yake na Waandishi wa Habari uliofanyika mapema leo katika Ofisi za Mahakama ya Rufani (T), lengo la Mkutano huo lilikuwa ni kutoa taarifa juu ya uzinduzi rasmi wa Mpango huo utakaofanywa na Waziri Mkuu wa Tanzania, Mhe. Kassim M. Majaliwa kwa niaba ya Mhe. Rais, mnamo tarehe 21.09.2016, katika jengo jipya la Mahakama ya Wilaya ya Kibaha mkoani Pwani. Kushoto ni Jaji Kiongozi wa Mahakama Kuu ya Tanzania, Mhe. Ferdinand Wambali, kulia ni Mhe. Katarina Revocati, Msajili Mkuu, Mahakama ya Tanzania.

         Mhe. Jaji Mkuu akiwa na Waandishi wa Habari katika Mkutano huo.

     Baadhi ya Waandishi wa Habari wakiwa katika Mkutano huo ambapo Mhe. Jaji Mkuu wa Tanzania alikuwa akitoa taarifa juu ya uzinduzi wa Mpango Mkakati huo.

    Jaji Mkuu wa Tanzania, Mhe. Mohamed Chande Othman akisisitiza jambo kwa waandishi wa habari walioshiriki katika Mkutano huo, miongoni mwa mambo aliongelea ni pamoja na uzinduzi rasmi wa Mradi wa Maboresho wa huduma utakaotekelezwa kwa kushirikiana na Benki ya Dunia (WB).

        Baadhi ya Waandishi wa Habari wakiwa kazini.

 

JAMHURI YA MUUNGANO WA TANZANIA       

             MAHAKAMA YA TANZANIA

       

                        TAARIFA KWA UMMA    

 

    Waziri Mkuu wa Jamhuri ya Muungano wa Tanzania, Mhe. Kassim M. Majaliwa keshokutwa   Septemba  21, mwaka huu anatarajiwa kuwa mgeni rasmi  katika   Mpango Mkakati wa Miaka Mitano 2015/16- 2019/20  wa Mahakama  ya Tanzania  wenye  lengo la kuboresha huduma zake na kuzisogeza karibu na wananchi ili wazifikie kwa urahisi. 

   Kauli hiyo ilitolewa leo tarehe 19 Septemba, 2016 na Jaji Mkuu wa Tanzania, Mhe.Mohamed  Chande Othman,  wakati akizungumza na waandishi wa habari leo katika Ukumbi wa maktaba ya Mahakama ya Rufani(T), ambapo  amesema Waziri Mkuu huyo atazindua mpango huo, kwa niaba ya  Rais wa Jamhuri ya Muungano wa Tanzania, Mhe. John Pombe Mafuguli. 

    Jaji Mkuu alisema uzinduzi huo utafanyika jengo jipya la Mahakama ya Wilaya ya Kibaha, lililopo barabara ya Magereza jirani na ofisi za halmashauri ya Mji wa Kibaha kuanzia saa 2.00 asubuhi. Mpango Mkakati huu ni matokeo ya tafiti mbalimbali zilizofanywa na Mahakama na wadau wake na kutoa mapendekezo ya kuboresha utoaji wa huduma.

    Mapendekezo hayo ni pamoja na kuimarisha utawala bora, uwajibikaji na usimamizi wa rasilimali, kuwezesha upatikanaji na utoaji wa haki kwa wakati na kurejesha imani ya jamii na ushirikishwaji wa wadau katika shughuli za Mahakama na upatikanaji wa haki kwa makundi maalum ya wahitaji kama vile watoto, walemavu na wanawake.

    Kupitia Mpango Mkakati utakaozinduliwa, Mahakama imejipanga kuendelea kuleta mabadiliko makubwa ya utendaji ndani ya miaka 5 ijayo (2015/16-2019/20) katika utoaji huduma zenye viwango na weledi wa hali ya juu kwa kuongozwa na Dira“Haki sawa kwa wote na kwa wakati”.

 

   Aliongeza kwamba asilimia 47 ya Watanzania bado hawajafikiwa na huduma za Mahakama Kuu nchini. Hivyo asilimia hiyo ni sawa na idadi ya watu milioni 21, katika kuhakikisha wananchi hao wanafikiwa Serikali na Mahakama imewekeza nguvu  ya rasilimali fedha ili kuhakikisha kuwa huduma ya utoaji haki inamfikia kila mwananchi.

Aidha; Mhe.Jaji Mkuu alizungumzia juu ya Mradi wa Maboresho ya Huduma za Mahakama, ambao ni mradi shirikishi baina ya Serikali, Mahakama ya Tanzania pamoja na Benki ya Dunia (WB). 

 

    Mhe. Jaji Mkuu alizungumzia pia kuhusu umuhimu wa mradi huo, ambapo alisema unalenga kuimarisha na kujenga miundombinu ya Mahakama ya Tanzania.

IMETOLEWA NA KITENGO CHA HABARI, ELIMU NA MAWASILIANO