MAHAKAMA YA TANZANIA YASHAURIWA KUANZA KUTOA SHAHADA YA SHERIA KATIKA CHUO CHA UONGOZI WA MAHAKAMA LUSHOTO

Na Lydia Churi-Mahakama ya Tanzania

 Waziri wa Katiba na Sheria Mheshimiwa Dkt. Harrison Mwakyembe ameishauri Mahakama ya Tanzania kufikiria uwezekano wa kukifanyia mabadiliko chuo cha Uongozi wa Mahakama Lushoto kwa kuanza kutoa shahada ya Sheria pasipo kukigeuza chuo hicho kuwa chuo kikuu.

Akihutubia wakati wa sherehe za Mahafali ya 16 ya chuo hicho katika mji Mdogo wa Lushoto leo, Dkt. Mwakyembe amesema kutokana na mabadiliko makubwa ya kisera ni vema chuo hicho kikaanza kutoa Shahada ya Sheria pasipo kuwa chuo kikuu ili kibaki na jukumu lake la msingi la kutoa mafunzo ya kisheria.

Alisema wizara yake imejipanga kushirikiana na Mahakama ya Tanzania kuhakikisha chuo hiki kinafanya kazi yake ya kutoa mafunzo endelevu kwa watumishi na wadau wote wa Mahakama kwa ufanisi mkubwa.

Alisema serikali ina nia ya dhati ya kuhakikisha kuwa chuo hiki kinaendelezwa ili kiweze kutekeleza majukumu yake na kuongeza kuwa ofisi yake iko wazi kwa chuo hiki ili kujadili changamoto mbalimbali zinazokikabili na kuzitatua inapowezekana.

Aidha, katika Mahafali hayo, Waziri Mwakyembe pia amewataka wahitimu wa chuo hicho kutojishirikisha na vitendo vya rushwa pindi watakapopata kazi ili waweze kutenda haki kwa jamii.

Aliwapongeza wahitimu hao kwa hatua waliyofikia na kuwataka pindi watakapoajiriwa kujiepusha na rushwa ili mahakama iwe na mtazamo chanya mbele ya wananchi. “Ikimbieni rushwa siku zote ili muweze kuwa waadilifu na kutenda haki katika kazi zenu pindi mtakapoajiriwa”, alisema Mhe. Mwakyembe.

Waziri Mwakyembe pia aliwataka wahitimu hao kuwa wabunifu na kuendelea kujifunza mambo mapya kila siku ili waende na wakati uliopo sasa na kutokidhalilisha chuo chao kwa kutokuwa wabunifu.

Naye Mkuu wa Chuo cha Uongozi wa Mahakama Lushoto Mheshimiwa Jaji Kihwelo aliitaja baadhi ya mikakati ya kukiendeleza chuo hiki katika kipindi cha mwaka ujao kuwa ni kukifanya chuo hiki kiweze kutoa mafunzo endelevu kwa watumishi wa Mahakama na kuhimiza matumizi ya teknolojia ya Habari na Mawasiliano.

Katika Mahafali hayo, Waziri wa Katiba na Sheria pia alizindua Tovuti ya chuo, nembo ya chuo iliyorekebishwa pamoja na matumizi ya mtandao wa Serikali (Government Mailing System) kwa ajili ya chuo hicho.

Jumla ya wahitimu 343 walitunukiwa vyeti vya Stashahada na Astashahada ya Sheria kwenye mahafali hayo ambapo wahitimu 208 walipata Stashahada ya Sheria na wengine 135 walipata Astashahada ya Sheria.

MATUKIO MBALIMBALI WAKATI WA MAHAFALI YA 16 YA CHUO CHA UONGOZI WA MAHAKAMA LUSHOTO

Waziri wa Katiba na Sheria Mhe. Dkt. Harrison Mwakyembe akisalimiana na Mkuu wa Chuo cha Uongozi wa Mahakama Lushoto Mhe. Jaji Dkt. Paul Kihwelo mara baada ya kuwasili katika chuo hicho kwa ajili ya Mahafali. Waziri Mwakyembe alikuwa Mgeni Rasmi kwenye Mahafali hayo yaliyofanyika jana Lushoto.

Waziri wa Katiba na Sheria Mhe. Dkt. Harrison Mwakyembe akiwa kwenye Maandamano tayari kwa kuanza Mahafali ya 16 ya Chuo cha Uongozi wa Mahakama Lushoto yaliyofanyika jana. Kushoto ni Mwenyekiti wa Baraza la chuo hicho Jaji Mstaafu wa Mahakama ya Rufani Mhe. John Mrosso akifuatiwa na Mkuu wa chuo hicho Mhe. Jaji Dkt. Paul Kihwelo.

Waziri wa Katiba na Sheria Mhe. Dkt. Harrison Mwakyembe akiwa kwenye Maandamano tayari kwa kuanza Mahafali ya 16 ya Chuo cha Uongozi wa Mahakama Lushoto yaliyofanyika jana. Kushoto ni Mwenyekiti wa Baraza la chuo hicho Jaji Mstaafu wa Mahakama ya Rufani Mhe. John Mrosso na katikati ni Katibu Mkuu wa wizara ya Katiba na Sheria Prof. Sifuni Mchome.

Wahitimu wa Stashahada ya Sheria katika Chuo cha Uongozi wa Mahakama Lushoto wakiwa katika Mahafali hayo jana katika mji mdogo wa Lushoto.

Wahitimu wa Astashahada ya Sheria katika Chuo cha Uongozi wa Mahakama Lushoto wakisubiri kutunukiwa katika Mahafali hayo jana katika mji mdogo wa Lushoto

Msajili Mkuu wa Mahakama ya Tanzania Mheshimiwa Katarina Revokati (katikati) akiwa kwenye Mahafali hayo.

Waziri wa Katiba na Sheria Mhe. Dkt. Harrison Mwakyembe ambaye alikuwa ni Mgeni Rasmi kwenye Mahafali hayo akiwatunuku Stashahada na Astashahada wahitimu wa Chuo cha Uongozi wa Mahakama Lushoto (hawapo pichani) jana wakati wa Mahafali hayo.

Waheshimiwa Majaji wafawidhi wa Mahakama Kuu kanda ya Tanga na Moshi, Jaji Imani Abood (kushoto) na Jaji Aishieli Sumari (kulia) wakiwa kwenye Mahafali hayo jana katika mji mdogo wa Lushoto.

Waziri wa Katiba na Sheria Mhe. Dkt. Harrison Mwakyembe (wa tano kutoka kulia waliokaa) ambaye alikuwa ni Mgeni Rasmi kwenye Mahafali hayo akiwa katika picha ya pamoja na wajumbe wa Baraza la chuo mara baada ya Mahafali hayo.

 Waziri wa Katiba na Sheria Mhe. Dkt. Harrison Mwakyembe ambaye alikuwa ni Mgeni Rasmi kwenye Mahafali hayo akiwa katika picha ya pamoja na wahitimu wa Astashahada ya Sheria mara baada ya Mahafali hayo.

Waziri wa Katiba na Sheria Mhe. Dkt. Harrison Mwakyembe ambaye alikuwa ni Mgeni Rasmi kwenye Mahafali hayo akiwa katika picha ya pamoja na wahitimu wa Stashahada ya Sheria mara baada ya Mahafali hayo.