KONGAMANO LA KIMATAIFA KUHUSU MAHAKAMA NA JINSIA KUFANYIKA WIKI IJAYO JIJINI ARUSHA

Na Lydia Churi

Makamu wa Rais wa Jamhuri ya Muungano wa Tanzania Mhe. Samia Suluhu Hassan anatarajiwa kufungua Kongamano la kimataifa kuhusu Mahakama na Jinsia Barani Afrika litakalofanyika kwa mara ya kwanza nchini na katika Bara la Afrika kuanzia Juni 11 hadi 13 jijini Arusha.

Akizungumza na Waandishi wa Habari leo jijini Dar es salaam, Jaji Kiongozi wa Mahakama Kuu ya Tanzania Mhe. Dkt. Eliezer Feleshi amesema kongamano hilo litahudhuriwa na wajumbe zaidi ya 200 wakiwemo Majaji Wakuu, Majaji, Mahakimu na wadau wengine kutoka nchi 51 barani Afrika.

Jaji Kiongozi amesema pamoja na wajumbe hao, kongamano hilo pia litahudhuriwa na Makamu wa Rais wa Benki ya Dunia Bi. Sandie Okoro ambaye tayari ameshawasili nchini.

Malengo makuu ya Kongamano hilo ni nchi za bara la Afrika kubadilishana uelewa kuhusu changamoto za jinsia na upatikanaji wa haki, kubadilishana uzoefu na mikakati ya kimataifa ya kusukuma mbele ajenda ya jinsia ili kuendeleza sekta ya sheria na kuwapa washiriki nafasi ya kujadili masuala yahusuyo jinsia na upatikanaji wa haki.

Jaji Kiongozi amesema kongamano hilo pia linatarajiwa kujenga ushirikiano baina ya Mataifa katika kuleta usawa wa kijinsia na kuyafanya masuala ya jinsia kuwa sehemu muhimu ya mfumo wa Mahakama.  Aidha, kongamano hilo pia litatoa fursa kwa Majaji Wakuu na wadau wengine muhimu kwenye sekta ya sheria kufahamiana na kubadilishana uzoefu.

Akifafanua, Dkt. Feleshi amesema kongamano hilo litajadili masuala muhimu ya jinsia na upatikanaji wa haki na litajikita katika masuala muhimu ya kijinsia ndani ya Mahakama na sekta ya utoaji haki kwa ujumla, ikiwemo umuhimu wa jinsia katika Mahakama, upatikanaji wa haki kwa wanawake na ukatili wa kijinsia.

Amesema kongamano hilo ni alama muhimu katika historia ya Mahakama ya Tanzania kwa kuwa linatarajiwa kutoa mchango utakaoleta mabadiliko makubwa ya kisera kuhusu jinsia na upatikanaji wa haki barani Afrika kwa kuwa ukatili wa kijinsia ni changamoto ya dunia inayohitaji mikakati ya kimataifa na kikanda ili kukabiliana nayo.

 Kongamano hilo la siku tatu la kihistoria nchini limeandaliwa na Mahakama ya Tanzania kwa kushirikiana na Benki ya Dunia pamoja na wadau wengine ikiwemo Taasisi ya Uongozi wa Mahakama (IJA) na chama cha Majaji Wanawake Tanzania (TAWJA).

Jaji Kiongozi wa Mahakama Kuu  ya Tanzania, Mhe. Eliezer Feleshi(katikati) akizungumzia jambo wakati  na waandishi wa habari  leo Juni 7 ,mwaka huu  kuhusu Mkutano wa  Kimataifa utakaojadili  masuala ya Kijinsia, utakaoanza Juni 11 hadi 13, mwaka huu  mkoani  Arusha.Kulia ni Msajili Mkuu wa Mahakama  ya Tanzania, Mhe. Katarina Revokati na (kushoto) ni  Katibu wa Jaji Kiongozi, Dustan  Ndunguru.

Msajili Mkuu wa Mahakama  ya Tanzania, Mhe. Katarina Revokati(kulia) akifafanua jambo kwa waandishi wa habari leo Juni 7, mwaka huu kuhusu  Mkutano wa  Kimataifa utakaojadili  masuala  Kijinsia,( katikati) ni  Jaji Kiongozi wa Mahakama Kuu  ya Tanzania, Mhe. Eliezer Feleshi na (Kushoto) ni Katibu wa Jaji Kiongozi, Mhe .Dustan  Ndunguru.

Baadhi ya waandishi wa Habari wakimsiliza Jaji Kiongozi wa Mahakama Kuu ya Tanzania (ambaye hayupo  pichani), wakati alipofanya mkutano  na waandishi hao leo Juni  7, mwaka huu.

(Picha na Mary Gwera)