MAHAKAMA INAYOTEMBEA KUANZA KUFANYA KAZI MWANZA NA DARES SALAAM

Na Magreth Kinabo

Kaimu Jaji Mfawidhi wa Mahakama Kuu Kanda ya Mwanza, Mhe. Mohamed Gwae amesema Mahakama inayotembea itaanza kufanya kazi katika Jiji la  Mwanza na Dar es Salaam ili  kusogeza huduma za kimahakama kwa wananchi na kutoa haki kwa wakati.
Mhe. Gwae alisema hayo jana wakati akifungua mafunzo ya siku mbili Mkoani Mwanza kwa Watumishi wa Mahakama pamoja na wadau kuhusu huduma zitakazotolewa na Mahakama inayotembea. 

    Kaimu Jaji Mfawidhi wa Mahakama Kuu Kanda ya Mwanza, Mhe. Mohamed Gwae, wakati akifungua mafunzo ya siku mbili Mkoani Mwanza kwa Watumishi wa Mahakama pamoja na wadau kuhusu huduma zitakazotolewa na Mahakama inayotembea. Kulia  ni Msajili wa Mahakama ya Rufani, Mhe. John Kahyoza. 

Kaimu Jaji Mfawidhi wa Mahakama Kuu Kanda ya Mwanza, Mhe. Mohamed Gwae ,(waliokaa katikati). Akiwa katika picha ya pamoja na baadhi ya watumishi wa Mahakama ya Tanzania mara baada ya kufungua mafunzo ya siku mbili kuhusu mahakama inayotembea. Kushoto ni Msajili wa Mahakama   Rufani,Mhe. John Kahyoza na kulia ni  Naibu Msajili  Mahakama Kuu Kanda ya Mwanza, Mhe. Mary Moyo.

 Msajili wa Mahakama Mahakama ya Rufani Mhe. John Kahyoza  akitoa  mada ya uzoefu wa nchi mbalimbali kuhusu mahakama inayotembea wakati wa mafunzo hayo.

 Akielezea maana ya Mahakama Inayotembea, alisema kwamba, ni dhana     inayomaanisha mahakama katika ngazi fulani kuhamisha huduma zake na kuzitolea katika sehemu mbalimbali ndani ya mamlaka yake. Mahakama hizi ni gari maaluumu ambalo lina chumba maalumu kilichotengenezwa ndani ya gari kwa ajili ya kusikilizia mashauri na kuyatolea maamuzi. Chumba hicho ni kama ilivyo ofisi au “chamber” ya hakimu kwa sasa.

Alisema kwa sasa Mahakama zinazotembea zimeanzishwa kwa lengo la kusogeza huduma za Mahakama karibu na wananchi hasa sehemu zisizo na mahakama au maeneo yenye watu wengi.

“Kwa Kanda ya Mwanza, maeneo ya Buswelu, Buhongwa na Igoma yamekuwa na watu wengi sana na hivyo kuhitaji huduma ya Mahakama ya Mwanzo,” alisema Mhe. Jaji Gwae.

Aliongeza kwa kusema kusema kwamba, kwa kutumia Mahakama zinazotembea, Mahakama za Mwanzo Mkuyuni, Mwanza Mjini na Ilemela zinaweza kuhamishia shughuli zake katika maeneo yenye watu wengi na yasiyokuwa na huduma ya Mahakama karibu.

Mahakama inayotembea itatumika pia kusikiliza na kutoa maamuzi kwa mashauri yanatokana na makosa ya uvuvi haramu, ambayo mara nyingi yanasikilizwa na Mahakama za Wilaya.

Aidha alitaja matumizi mengine ya Mahakama inayotembea ni kutoa elimu ya sheria, kutoa matangazo mbalimbali ya kimahakama pamoja na huduma nyingine za Kimahakama kama vile kutoa fomu za kufungulia mashauri mbalimbali. Wananchi watanufaika na elimu hiyo hasa kuhusiana na masuala ya mirathi, wosia na migogoro ya ndoa.

Akizungumzia  kuhusu umuhimu wa Mahakama hiyo, Mhe. Jaji alisema kwamba, Mahakama hizi zitawapunguzia wananchi gharama na muda wa kutafuta huduma za Mahakama. 

“Ni dhamira ya Mahakama ya Tanzania kwa kushirikiana na wadau wake katika kuhakikisha huduma za Mahakama zinapatikana kwa wananchi kwa karibu, haraka na wote. Matumaini yangu ni kwamba  mafunzo haya yataleta tija katika kutimiza lengo lililokusudiwa la utoaji haki kwa wakati na kwa gharama nafuu. ” alisisitiza.

Aliwataka  washiriki  wa mafunzo hayo, kuwa walimu wazuri wa kuwaelemisha watumishi wengine, viongozi mbalimbali wa serikali, taasisi binafsi na wananchi  kwa ujumla.

Kwa upande wake Msajili wa Mahakama ya Rufani Tanzania,Mhe. John Kahyoza aliwataka washiriki hao kuzingatia maadili na kuwa wabunifu na weledi wanapotoa huduma hiyo.

Hakimu Mkazi Mwandamizi, Mhe. Victoria  Nongwa, kutoka Kurugenzi ya Menejimenti ya Mashauri, aliwataka washiriki  kuhakikisha wanajifunza  masuala  ya kompyuta hususani  kwenye Teknolojia ya Habari na Mawasiliano(TEHAMA) ilikuboresha utendaji kazi  na kuachana na matumizi ya karatasi.