MAHAKIMU WAKAZI WAFAWIDHI WAPYA WATAKIWA KUZINGATIA UTAWALA BORA

Na Lydia Churi- Mahakama

Jaji Mkuu wa Tanzania Mhe. Prof. Ibrahim Hamis Juma amewataka Mahakimu Wakazi walioteuliwa kuwa Mahakimu Wafawidhi wa Mikoa kuzingatia utawala bora wanapotekeleza majukumu yao ili haki iweze kupatikana kwa wakati.   

  

Akizungumza katika hafla ya kuwapa Mahakimu hao Mamlaka ya kusimamia Mahakama za Mikoa (Instrument) leo jijini Dar es salaam, Jaji Mkuu alisema ili kutekeleza nguzo ya pili ya Mpango Mkakati wa miaka mitano wa Mahakama ya Tanzania, utawala bora na uongozi bora ni muhimu katika kufanikisha upatikanaji wa haki kwa wakati.    

Alisema endapo Mahakimu hao watazingatia utawala bora na uongozi bora, nguzo ya tatu ya Mpango Mkakati wa Mahakama ambayo ni kujenga imani ya jamii kwa Mahakama na ushirikishwaji wa wadau katika shughuli za Mahakaman pia itafanikiwa.

“Uongozi kwangu ni jambo muhimu sana, bila ya kuwa na kiongozi mwenye kuzingatia utawala bora mambo mengine yote hayawezi kuwa vizuri. Unaweza kuwa na sheria nzuri, taratibu nzuri na bajeti ya kutosha lakini usipokuwa na uongozi bora hayo yote hayatawezekana,” alisema.  

Aidha, Jaji Mkuu amewataka Mahakimu hao kutambua kuwa Mahakama inaongozwa kwa Sheria namba 4 ya mwaka 2011 ambayo imetoa mgawanyo wa wazi kati ya shughuli za Mahakama na zile za kiutawala hivyo hakutakuwa na sababu ya kuwepo kwa migongano yeyote kwa kuwa sheria imepambanua kazi za Mahakimu ni zipi na za kiutawala ni zipi.

Aliwataka Mahakimu hao kutokutumia mamlaka waliyopewa kama silaha ya kutokufanya kazi na kugawa kazi kwa wengine, kujenga uhasama miongoni mwa watumishi na kuwagawa watumishi badala yake waheshimu watumishi wote kwa kuwa kila mtumishi ana nafasi yake ndani ya Mhimili wa Mahakama.

Naye Kaimu Jaji Kiongozi wa Mahakama Kuu ya Tanzania Mhe. Dkt. Benhajj Masoud amewataka Mahakimu hao kushughulikia malalamiko ya wananchi kwa kuangalia namna ya kuyapunguza ama kuyaondoa kabisa. 

Mhe. Masoud pia amewashauri Mahakimu hao kuimarisha uhusiano kati ya Mahakama na Taasisi nyingine pasipo kuingilia uhuru wa Mahakama na kuongoza katika matumizi ya Teknolojia ya Habari na Mawasiliano (TEHAMA) ili kurahisisha utendaji kazi wa Mahakama.

Jumla ya Mahakimu wakazi wanne wameteuliwa kuwa Mahakimu Wakazi Wafawidhi wa Mahakama za Mikoa. Mahakimu hao pamoja na Mikoa wanayoenda kwenye mabano ni Mhe. Janet Elias Masesa (Shinyanya), Mhe. Zawadi David Laizer (Mbeya), Mhe. Obadia Festo Bwegoge (Geita) na Mhe. Lugano Rachel Kasebele (Mtwara). 

 Jaji Mkuu wa Tanzania Mhe. Prof. Ibrahim Hamis Juma akisaini hati kabla ya kuwakabidhi Mahakimu Wakazi Wafawidhi wateule ambao leo aliwapa mamlaka ya kusimamia Mahakama za Hakimu Mkazi.

 Jaji Mkuu wa Tanzania Mhe. Prof. Ibrahim Hamis Juma akimkabidhi 'instrument' Hakimu Mkazi Mfawidhi mpya wa Mahakama ya Hakimu Mkazi Shinyanga Mhe. Janet Elias Masesa.

 Jaji Mkuu wa Tanzania Mhe. Prof. Ibrahim Hamis Juma akimkabidhi 'instrument' Hakimu Mkazi Mfawidhi mpya wa Mahakama ya Hakimu Mkazi Mbeya Mhe. Zawadi David Laizer.

 Jaji Mkuu wa Tanzania Mhe. Prof. Ibrahim Hamis Juma akimkabidhi 'instrument' Hakimu Mkazi Mfawidhi mpya wa Mahakama ya Hakimu Mkazi Mtwara Mhe. Lugano Rachel Kasebele.

 Jaji Mkuu wa Tanzania Mhe. Prof. Ibrahim Hamis Juma akimkabidhi 'instrument' Hakimu Mkazi Mfawidhi mpya wa Mahakama ya Hakimu Mkazi Geita Mhe. Obadia Festo Bwegoge.

 Waheshimiwa Mahakimu Wakazi Wafawidhi wapya wakimsikiliza Jaji Mkuu wa Tanzania Mhe. Prof. Ibrahim Hamis Juma alipokuwa akizungumza nao baada ya kuwakabidhi Instrument.Wa kwanza kushoto ni Mhe. Lugano Rachel Kasebele akifuatiwa na Mhe. Zawadi David Laizer, Mhe. Janet Elias Masesa na Mhe. Obadia Festo Bwegoge. 

  Kaimu Jaji Kiongozi wa Mahakama Kuu ya Tanzania Mhe. Dkt. Benhajj Masoud (wa kwanza kulia), Mkurugenzi wa Idara ya Usimamizi wa Mashauri Mhe. Eva Nkya, Mtendaji wa Mahakama Kuu ya Tanzania, Bwn. Samson Mashalla (wa kwanza kushoto) na Mtendaji wa Mahakama Kuu ya Tanzania Bwn. Beatus wakiwa kwenye hafla hiyo iliyofanyika ofisini kwa Mhe. Jaji Mkuu leo.

 Jaji Mkuu wa Tanzania Mhe. Prof. Ibrahim Hamis Juma akiwa katika picha ya pamoja na Mahakimu Wakazi wafawidhi wapya mara baada ya kuwakabidhi instrument.