RAIS AMUAPISHA MTENDAJI MKUU MPYA WA MAHAKAMA: AMPONGEZA KATTANGA

Na Waandishi, Mahakama

Rais wa Jamhuri ya Muungano wa Tanzania Mhe. Dkt. John Pombe Magufuli amempongeza aliyekuwa Mtendaji Mkuu wa Mahakama ya Tanzania, Bw. Hussein Kattanga kwa kazi nzuri aliyofanya katika Mahakama ya Tanzania.

Akimuapisha Mtendaji Mkuu mpya wa Mahakama ya Tanzania, Bw. Mathias Kabunduguru leo Oktoba 20, 2019 Ikulu jijini Dar es Salaam, Rais Magufuli amesema Kattanga ana rekodi nzuri ya utendaji kazi  tangu akiwa RAS, Katibu Mkuu-TAMISEMI na baadaye Mtendaji Mkuu wa Mahakama.

Mhe. Rais aliendelea kusema kuwa Bw. Kattanga amefanya kazi nzuri kwani kuna maboresho mengi yaliyofanyika ndani ya Mahakama kipindi cha uongozi wake chini ya Mhe. Jaji Mkuu.

"Nampongeza sana Kattanga na nimeamua nimtoe Mahakama ili akanisaidie kazi nchi fulani kwani naamini ataniwakilisha ipasavyo, ninakushukuru kwa utendaji wako mzuri", alieleza Rais Magufuli.

Akimzungumzia Mtendaji Mkuu mpya wa Mahakama, Mhe. Rais alimtaka kuendeleza kazi nzuri iliyofanywa na hasa maboresho ya huduma za kimahakama yanayofanywa kupitia mradi wa Benki ya Dunia.

Aidha alimtaka Bw. Kabunduguru kushirikiana na Watendaji wengine wa Mahakama ya Tanzania katika kutekeleza programu ya Benki ya Dunia ambayo inaendelea vizuri hivi Sasa.

"Kazi hii ni utume hivyo basi nendeni mkawatumikie vyema wananchi kwa uaminifu,"  aliongeza Mhe. Rais.

Jana Rais alifanya mabadiliko ndani ya Mhimili wa Mahakama baada ya kumteua Bw. Kabunduguru kuwa Mtendaji Mkuu wa Mahakama akichukua nafasi ya Bw. Hussein Kattanga aliyeteuliwa kuwa Balozi.

Hafla ya kuapishwa kwa Mtendaji Mkuu wa Mahakama pamoja na viongozi wengine ilihudhuriwa na Makamu wa Rais wa Jamhuri ya Muungano wa Tanzania, Mhe. Samia Suluhu Hassan, Jaji Mkuu wa Tanzania Mhe. Prof. Ibrahim Hamis Juma, Jaji Kiongozi wa Mahakama Kuu ya Tanzania, Mhe. Dkt. Eliezer Feleshi, Majaji, Viongozi wa Ulinzi na Usalama pamoja na Watendaji wengine wa Mahakama ya Tanzania.

  Rais wa Jamhuri ya Muungano wa Tanzania, Mhe. Dkt. John Pombe Magufuli akimuapisha Bw.Mathias Bazi Kabunduguru kuwa Mtendaji Mkuu wa Mahakama ya Tanzania katika hafla fupi iliyofanyika Ikulu jijini Dar es Salaam leo Oktoba 20, 2019.

 Viongozi mbalimbali walioapishwa wakila kiapo cha Maadili ya Viongozi wa Umma mara baada ya kuapishwa Ikulu jijini Dar es Salaam. Kutoka kulia ni Mtendaji Mkuu wa Mahakama ya Tanzania, Bw. Mathias Bazi Kabunduguru, Naibu Katibu Mkuu TAMISEMI, Bw. Gerald Godfrey Mweli pamoja na Balozi Ali Sakila Bujiku.

Viongozi mbalimbali walioapishwa wakisaini Hati ya kiapo cha Maadili ya Viongozi wa Umma.

 Rais wa Jamhuri ya Muungano wa Tanzania Mheshimiwa Dkt. John Pombe Magufuli akizungumza mara baada ya kuwaapisha Viongozi mbalimbali Ikulu jijini Dar es Salaam.

Viongozi na Wageni mbalimbali waliohudhuria katika hafla hiyo fupi wakimsikiliza Mhe. Rais alipozungumza mara baada ya kuapisha rasmi.

 Rais wa Jamhuri ya Muungano wa Tanzania, Mhe. Dkt. John Pombe Magufuli akiwa katika picha na Makamu wa Rais Samia Suluhu Hassan, Jaji Mkuu Profesa Ibrahim Juma, Katibu Mkuu Kiongozi Balozi John Kijazi (wa pili kulia), Waziri wa Katiba na Sheria Balozi Augustine Mahiga (wa tatu kulia), Mtendaji Mkuu wa Mahakama ya Tanzania, Bw. Mathias Bazi Kabunduguru (wa pili kushoto), Naibu Katibu Mkuu TAMISEMI Gerald Godfrey Mweli (wa kwanza kushoto) pamoja na Balozi Ali Sakila Bujiku wakwanza (kulia) mara baada ya uapisho Ikulu jijini Dar es Salaam.

(Picha kwa hisani ya Ikulu)