JAJI KIONGOZI: CORONA ISIWE KIKWAZO HUDUMIENI WANANCHI KWA TAHADHARI

Na Mary Gwera, Mahakama

Jaji Kiongozi Mahakama Kuu ya Tanzania, Mhe. Dkt. Eliezer Mbuki Feleshi amewataka Mahakimu na Watumishi wa Mahakama kwa ujumla kuendelea kuhudumia wananchi licha ya changamoto ya janga la Ugonjwa wa ‘Corona’ unaoendelea kutikisa dunia kwa sasa.

Akizungumza kwa nyakati tofauti alipotembelea Mahakama kadhaa jijini Dar es Salaam, Machi 31, 2020, Mhe. Jaji Dkt. Feleshi alisema kuwa kila Hakimu ajikumbushe wajibu wake kwa kusoma vifungu 107A na B vya Katiba ya Jamhuri ya Muungano wa Tanzania na vilevile wakumbuke kusimamia viapo vyao.

“Kipindi kama hiki hakisimamishi migogoro kutokea kwenye jamii, hivyo ni lazima kazi zifanyike, ni kipindi ambacho kinatukumbusha ni namna gani bora zaidi ya kuboresha huduma ya utoaji haki nchini,” alieleza Mhe. Jaji Kiongozi.

Mhe. Jaji Kiongozi aliongeza kwa kuwataka Watumishi hao kuwa wabunifu katika maeneo yao ya kazi na kutokubweteka kwa kusikiliza idadi chache ya mashauri kwa Mahakama ambazo zina idadi chache ya mashauri na kuwataka Mahakimu kutosita kudai nyongeza ya idadi ya mashauri ya kuyafanyia kazi endapo waliopangiwa na Wafawidhi wao ni machache.

Aidha; Mhe. Jaji Dkt. Feleshi aliwataka Mahakimu Wafawidhi wa Mahakama za Wilaya ya Kigamboni, Temeke na Ilala kuendelea kuboresha ushirikiano na Wadau wa Mahakama katika suala zima la kuhakikisha kuwa haki inatolewa kwa wakati.

Mhe. Jaji Kiongozi amefanya ziara ya ukaguzi wa shughuli za Mahakama katika Mahakama za Wilaya za Kigamboni, Temeke na Ilala, Mahakama za Mwanzo za Temeke, Mbagala, Ukonga, Buguruni na Ilala na amefanya ukaguzi wa ujenzi wa Kituo Jumuishi cha utoaji haki kinachojengwa Chang’ombe wilayani Temeke jijini Dar es Salaam.

Hata hivyo; Mhe. Jaji Kiongozi amewasifu Wafawidhi na Watumishi wote wa Mahakama alizotembelea kwa kuunga mkono jitihada za Viongozi Wakuu wa Mahakama za kuhakikisha kuwa huduma ya haki nchini inatolewa kwa ubora kwa wananchi wote.

Mhe. Jaji Kiongozi aliwataka baadhi ya Watendaji wa Mahakama alioambatana nao kushughulikia changamoto zote zilizoibuliwa katika ziara yake ambazo ni pamoja na uhaba wa watumishi kwa baadhi ya Mahakama hasa Kada za Wasaidizi wa Ofisi, Mlinzi na Makarani, ufinyu wa bajeti na kadhalika.

Msimamizi huyo wa Mahakama Kuu na Mahakama za chini 'surbodinate courts' anatarajia kuendelea na ziara yake ya Kanda ya Dar es Salaam ambapo atatembelea pia Pwani na Morogoro lengo ni kuangalia maendeleo ya utekelezaji wa huduma ya utoaji haki pamoja na kuangalia ni kwa jinsi gani Kanda hii imechukua tahadhari za mapambano dhidi ya janga la ‘Corona’ katika kuhakikisha usalama wa Watumishi na wateja wa Mahakama.

 Jaji Kiongozi Mahakama Kuu ya Tanzania, Mhe. Dkt. Eliezer Mbuki Feleshi (kulia) akizungumza na Watumishi wa Mahakama ya Wilaya Kigamboni alipotembelea Mahakama hiyo mapema Machi 31, 2020.

Hakimu Mkazi Mfawidhi, Mahakama ya Wilaya Kigamboni, Mhe. Agnes Mchome (wa tatu kushoto) akifafanua jambo kwa Mhe. Jaji Kiongozi pindi Mhe. Jaji Kiongozi alipotembelea Mahakama hiyo mapema Machi 31, 2020. Kulia ni Jaji Mfawidhi, Mahakama Kuu-Kanda ya Dar es Salaam, Mhe. Lameck Mlacha.

 Tahadhari dhidi ya Virusi vya ‘Covid-19’: Mhe. Jaji Kiongozi na Mhe. Jaji Mfawidhi wakinawa mikono kabla ya kuendelea na shughuli ya ukaguzi katika Mahakama ya Wilaya ya Kigamboni.

Mhe. Jaji Kiongozi akiwasalimia Watumishi wa Mahakama ya Wilaya ya Temeke mara baada ya kuwasili katika Mahakama hiyo.

 Mhe. Jaji Kiongozi (katikati) akiendelea na ukaguzi katika Mahakama ya Wilaya Temeke, kushoto ni Jaji Mfawidhi, Mahakama Kuu-Kanda ya Dar es Salaam, Mhe. Lameck Mlacha na kulia ni Naibu Msajili, Mahakama Kuu-Kanda ya Dar es Salaam, Mhe. Joseph Fovo.

 Mhe. Jaji Kiongozi akionyeshwa ramani ya jengo la Kituo Jumuishi cha utoaji haki kinachojengwa Wilayani Temeke.

Mhe. Jaji Kiongozi na baadhi ya Maafisa wa Mahakama alioambatana nao wakikagua ‘site’ ya ujenzi wa Kituo Jumuishi cha Utoaji haki kinachojengwa Chang’ombe wilaya ya Temeke jijini Dar es Salaam.

 Mhe. Jaji Kiongozi akiwasili Mahakama ya Mwanzo Mbagala kwa ukaguzi, katikati ni Hakimu Mkazi Mfawidhi, Mahakama ya Wilaya Temeke, Mhe. Susan Kihawa na kulia ni Hakimu Mkazi Mfawidhi, Mahakama ya Mwanzo Mbagala, Mhe. Florence Madelemo.

Ukaguzi Mahakama ya Mwanzo Ukonga.

Ukaguzi Mahakama ya Wilaya Ilala iliyopo Tabata Kinyerezi. Wa kwanza kushoto ni Hakimu Mkazi Mfawidhi, Mahakama Wilaya Ilala, Mhe. Martha Mpaze  na baadhi ya Watendaji wa Mahakama walioambatana na Mhe. Jaji Kiongozi.

 Mhe. Jaji Dkt. Feleshi akisalimiana na sehemu ya Watumishi wa Mahakama ya Mwanzo Buguruni.

 Ukaguzi, Mahakama ya Mwanzo Ilala.

(Picha na Mary Gwera, Mahakama)