MAHAKAMA YAAHIDI MAMBO MATANO KUPITIA MPANGO MKAKATI WAKE WA PILI

 Na Lydia Churi-Mahakama, Dodoma

Jaji Mkuu wa Tanzania Mhe. Prof. Ibrahim Hamis Juma amesema Mahakama kupitia Mpango Mkakati wake wa pili wa miaka mitano (2020-2025) imewaahidi wananchi mambo matano ikiwemo maboresha ya miundombinu yake ili kurahisisha upatikanaji wa haki.

Akifungua awamu ya pili ya mafunzo ya namna bora ya uendeshaji wa mashauri ya uchaguzi kwa Majaji wa Mahakama kuu leo jijini Dodoma, Jaji Mkuu ameyataja mambo mengine kuwa ni kukamilisha usimamizi wa mashauri kwa njia za Tehama, kuboresha uwezo wa watumishi kutimiza wajibu wao, kuimarisha shughuli za ukaguzi, usimamizi na malalamiko na kuimarisha ushirikiano na wadau.

“Tutatumia Mpango mkakati wa miaka mitano wa Mahakama kama nyenzo ya kubainisha ahadi kwa maana ya tutafanya nini kwa miaka mitano ijayo”, alisema Jaji Mkuu.

Alisema wakati wa uchaguzi ni wakati wa kila mhimili wa dola kujitathmini na pia kuahidi itafanya nini katika miaka mitano ijayo hivyo amewataka watumishi wa Mahakama kuusoma, kuuelewa na kuutekeleza Mpango Mkakati wa pili ambao utawaongoza kuanzia mwaka 2020 hadi 2025.

Kwa mujibu wa Jaji Mkuu, tathmini ya Mpango Mkakati wa mwaka 2016-2021, iliyofanywa katika maeneo mbalimbali imeonesha kupungua kwa mlundikano wa mashauri kutoka asilimia 12 mwaka 2015 hadi kufikia asilimia tano mwaka 2019.

Alisema ufanisi pia ulipimwa kupitia mafanikio katika kuongezeka kwa matumizi ya TEHAMA na matumizi ya teknolojia katika uendeshaji wa mashauri na ufanisi katika watumishi wa ngazi mbalimbali kupata mafunzo. 

Jaji Mkuu ametoa wito kwa Majaji na watumishi wote wa Mahakama kuhakikisha wanausoma mpango huo ili wafahamu malengo na muelekeo wa mhimili kwa kuwa mafanikio ya mpango mkakati yanategemea namna viongozi na watumishi wote wa Mahakama watakavyokubali kuumiliki mpango huo.

Akizungumzia mashauri yatakayotokana na uchaguzi mkuu ujao, Jaji Mkuu amewataka Majaji kutumia nafasi muhimu ya kusikiliza mashauri hayo kuibua maeneo ya uchaguzi ambayo yanahitaji maboresho.

Alisema Majaji ni viongozi, hivyo maamuzi yao hayana budi kushawishi kuboresha sheria au kubadilisha sera zinazohusu masuala ya sheria na haki.

Awamu ya pili ya Mafunzo ya namna bora ya uendeshaji wa mashauri ya uchaguzi kwa Majaji wa Mahakama kuu imeanza leo jijini Dodoma

Baadhi ya Majaji Wafawidhi kutoka kanda na Divisheni za Mahakama Kuu wakiwa katika picha ya pamoja na Jaji Mkuu wa Tanzania Mhe. Prof. Ibrahim Hamis Juma (katikati-waliokaa) mara baada ya kufungua mafunzo hayo. Waliokaa kulia ni Jaji Kiongozi wa Mahakama Kuu ya Tanzania Mhe. Dkt. Eliezer Feleshi na kushoto ni Jaji Mfawidhi wa Mahakama Kuu kanda ya Dodoma Mhe. Mustapher Siyani.

Baadhi ya Majaji wa Mahakama Kuu kutoka kanda na Divisheni za Mahakama Kuu wakiwa katika picha ya pamoja na Jaji Mkuu wa Tanzania Mhe. Prof. Ibrahim Hamis Juma (katikati-waliokaa) mara baada ya kufungua mafunzo hayo. 

Baadhi ya Majaji wa Mahakama Kuu wakiwa katika picha ya pamoja na Jaji Mkuu wa Tanzania Mhe. Prof. Ibrahim Hamis Juma (katikati-waliokaa) mara baada ya kufungua mafunzo hayo. 

Majaji wa Mahakama Kuu Zanzibar wakiwa katika picha ya pamoja na Jaji Mkuu wa Tanzania Mhe. Prof. Ibrahim Hamis Juma (katikati-waliokaa) mara baada ya kufungua mafunzo hayo.