KESI ZA UCHAGUZI KUMALIZIKA NDANI YA MIEZI MINNE

 Na Lydia Churi-Mahakama, Dodoma

Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi amewataka Majaji wa Mahakama Kuu kuwa tayari kusikiliza mashauri yatakayofunguliwa kutokana na uchaguzi Mkuu unaotarajiwa kufanyika mwezi Oktoba mwaka huu.

Akifunga awamu ya kwanza ya mafunzo ya namna bora ya uendeshaji wa mashauri ya uchaguzi kwa baadhi ya waheshimiwa Majaji wa Mahakama Kuu ya Tanzania, Jaji Kiongozi amesema Mahakama itampangia Jaji yeyote kusikiliza mashauri ya uchaguzi hivyo kila Jaji anapaswa kuwa na hali ya utayari na kujiandaa kutekeleza wajibu huo muhimu.

“Mafunzo mliyopata yana lengo la kuweka mazingira sahihi ili Jaji yeyote atakapopangiwa kusikiliza mashauri yatokanayo na uchaguzi Mkuu awe tayari wakati wote”, alisisitiza Jaji Kiongozi.

Alisema Mahakama imepanga kumaliza mashauri yatakayotokana na uchaguzi Mkuu wa mwaka huu ndani ya miezi minne (4) kwa kuwa tayari imeshaonesha mwelekeo wa kuyashughulikia. Aliongeza kuwa katika Uchaguzi Mkuu wa mwaka 2015 mashauri ya aiona hiyo yalisikilizwa na kumalizika ndani ya miezi sita (6) tangu kufunguliwa kwake.

Jaji Feleshi amewataka Majaji Wafawidhi kujiandaa na pia kuhakikisha wanawaandaa Naibu Wasajili pamoja na Mahakimu ili wawe tayari kusikiliza mashauri hayo. Kiongozi huyo pia ameagiza mashauri mengine yaliyopo na yanayoendelea kufunguliwa mahakamani yaendelee kusikilizwa na kumalizika kwa wakati licha ya kuwepo kwa mashauri yatakayotokana na uchaguzi Mkuu.

Aidha, ametoa wito kwa Majaji wote kuendeleza ushirikiano uliopo baina yao, kujaliana na kupendana wakati wote kwa kuwa mahakama ni familia.

Mafunzo hayo yaliyoandaliwa na Mahakama ya Tanzania kwa kushirikiana na Chuo cha Uongozi wa Mahakama Lushoto (IJA) yamesaidia kuwajengea uwezo Maafisa wa Mahakama na kuwaandaa kutoa haki kwenye mashauri ya Uchaguzi Mkuu ujao wa Rais, Wabunge na Madiwani.

Mafunzo yaliyomalizika leo yaliwahusisha baadhi ya Waheshimiwa Majaji wa Mahakama Kuu ya Tanzania. Awamu inayofuata pia itawahusisha Majaji wengine wa Mahakama Kuu ya Tanzania na Jumatatu Agosti 24 yataanza mafunzo hayo kwa Wasajili, Naibu Wasajili na Mahakimu Wakazi Wafawidhi wa Mahakama za Hakimu Mkazi.

Mafunzo haya pia yatatolewa kwa waheshimiwa Majaji wa Mahakama ya Rufani kuanzia Septemba 2-4, 2020 mkoani Morogoro. Mahakimu Wakazi Wafawidhi wa Mahakama za Wilaya nao watapatiwa mafunzo hayo baadaye katika Chuo cha Uongozi wa Mahakama Lushoto-Tanga.

Wawezeshaji wa mafunzo hayo ni baadhi ya Majaji wa Mahakama ya Rufani na Mahakama Kuu waliopo na wastaafu, Naibu wasajili, Mahakimu pamoja na wawezeshaji kutoka Tume ya Taifa ya Uchaguzi, Taasisi ya Kuzuia na Kupambana na Rushwa, Ofisi ya Msajili wa Vyama vya Siasa na Tume ya Kurekebisha Sheria ambao ni wadau muhumu katika masuala ya Uchaguzi.

Baadhi ya Majaji wa Mahakama Kuu ya Tanzania wakimsikiliza Jaji Kiongozi wa Mahakama Kuu ya Tanzania Mhe. Dkt. Eliezer Feleshi (hayupo pichani) alipokuwa akifunga awamu ya kwanza ya mafunzo ya namna bora ya uendeshaji wa mashauri ya uchaguzi leo, jijini Dodoma.  

Baadhi ya Majaji wa Mahakama Kuu ya Tanzania wakimsikiliza Jaji Kiongozi wa Mahakama Kuu ya Tanzania Mhe. Dkt. Eliezer Feleshi (hayupo pichani) alipokuwa akifunga awamu ya kwanza ya mafunzo ya namna bora ya uendeshaji wa mashauri ya uchaguzi leo,  jijini Dodoma.  

Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi akifunga awamu ya kwanza ya mafunzo ya namna bora ya uendeshaji wa mashauri ya uchaguzi leo, jijini Dodoma.  

Jaji Mfawidhi wa Mahakama Kuu ya Tanzania Divisheni ya Kazi Mhe. Sophia Wambura akitoa neno la shukrani kwa niaba ya Majaji waliohudhuria mafunzo.   

Jaji Mfawidhi wa Mahakama Kuu ya Tanzania Kanda ya Songea Mhe. Sekela Moshi akipokea cheti baada ya kuhudhuria mafunzo yaliyomalizika leo kwa awamu ya kwanza. 

Jaji wa Mahakama Kuu ya Tanzania Kanda ya Tanga Mhe. Edson Mkasimongwa akipokea cheti baada ya kuhudhuria mafunzo yaliyomalizika leo kwa awamu ya kwanza. 

Jaji Mfawidhi wa Mahakama Kuu ya Tanzania Kanda ya Kigoma Mhe. Ilvin Mugeta akipokea cheti baada ya kuhudhuria mafunzo yaliyomalizika leo kwa awamu ya kwanza. 

Jaji Mfawidhi wa Mahakama Kuu ya Tanzania Kanda ya Dodoma Mhe. Mustapher Siyani akipokea cheti baada ya kuhudhuria mafunzo yaliyomalizika leo kwa awamu ya kwanza. 

Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi akipokea cheti kutoka kwa Jaji wa Mahakama Kuu ya Tanzania, Divisheni ya Kazi  Mhe. Imani Aboud mara baada ya kumalizika kwa mafunzo ya namna bora ya uendeshaji wa mashauri ya uchaguzi leo jijini Dodoma.  

Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi akionesha cheti alichopokea baada ya kuhudhuria mafunzo ya namna bora ya uendeshaji wa mashauri ya uchaguzi yaliyomalizika leo, jijini Dodoma.