TABIA NA MITAZAMO IENDANE NA UBORA WA MAJENGO: JAJI MKUU

 Na Lydia Churi-Mahakama, Shinyanga

Jaji Mkuu wa Tanzania Mhe. Prof. Ibrahim Hamis Juma amewataka watumishi wa Mahakama kubadili tabia na mitazamo ili iendane na ubora wa majengo mapya na yenye vifaa vya kisasa yanayojengwa na Mahakama ya Tanzania katika maeneo mbalimbali nchini.

Akizindua jengo la Mahakama Kuu Kanda ya Shinyanga leo, Jaji Mkuu amesema   Mahakama haitokani na majengo mazuri peke yake, bali huduma bora kwa wananchi ambapo pia amewataka watumishi wa Mahakama kuacha tabia zisizoendana na maadili mema wanapotekeleza wajibu wao..

“Maboresho makubwa tuliyofanya kupitia Mpango Mkakati, Programu ya Maboresho na uwekezaji mkubwa katika TEHAMA hayataboresha huduma za utoaji haki kama watumishi na viongozi katika ngazi zote za Mahakama hawatakuwa na mitazamo chanya ya kuwaheshimu na kuwathamini wanaofika mahakamani kutafuta haki” alisema Jaji Mkuu. 

Alisema, nguvu na uwezo wa Mahakama kwa kiasi kikubwa unategemea imani ya wananchi kwa Mhimili huo na kuwa dhana ya sasa inayoongoza ujenzi wa majengo ya Mahakama ni kujenga majengo yanayotoa huduma jumuishi (Integrated Justice Centres), yaani kutoa huduma za zaidi ya ngazi moja ya Mahakama na pia wadau wanaotoa huduma mbali mbali kuwa katika jengo moja. 

Jaji Mkuu alisema maboresho yatakuwa endelevu endapo watumishi wote watayaelewa na kutambua Mahakama inaelekea wapi. “Nawaomba watumishi wa Mahakama tutekeleze dhana ya kumiliki maboresho na tutafanikiwa endapo kila mtumishi atafuatilia utekelezaji wake na kuyaelewa na kuwa tayari kuyafafanua kwa wananchi, wadau na hata kwa Mihimili ya Serikali na Bunge” alisisitiza.

Alisema maboresho ya miundombinu ya majengo ya Mahakama yanalenga mambo makuu mawili ambayo ni kuhakikisha wananchi wanapata huduma za utoaji haki katika majengo bora yakiwa na vitendea kazi vya kutosha na kuwapunguzia wananchi umbali mrefu wanapotafuta huduma za Mahakama.

Jaji Mkuu aliwapongeza wananchi wa Mkoa wa Shinyanga kwa kupewa kipaumbele katika kupatiwa huduma za Mahakama Kuu kwani mikoa ya Morogoro, Pwani, Singida, Manyara, Njombe, Geita, Katavi, Lindi, Simiyu na Songwe bado inasubiri kwa hamu kuwa na majengo yao ya kutoa huduma katika ngazi ya Mahakama Kuu.

Pamoja na kusogezewa huduma katika ngazi ya Mahakama Kuu; wananchi wa Mkoa wa Shinyanga, kupitia jengo lililozinduliwa wamesogezewa pia huduma za Mahakama ya Rufani. Kupitia Tangazo la Gazeti la Serikali No. 579 la tarehe 24/7/2020, jengo la Mahakama Kuu Shinyanga, limetangazwa kuwa ni Masjala Ndogo ya Mahakama ya Rufani. 

Alifafanua kuwa tangazo hilo lina maana kuwa, Mahakama ya Rufani itafanya kikao chake cha kwanza Shinyanga kuanzia tarehe Agosti 10 hadi 28, 2020 ili kusikiliza jumla ya mashauri 29. Kila mwaka, Mahakama ya Rufani itakuwa na vikao katika jengo kanda ya Shinyanga.  

Wakati huo huo, Jaji Mkuu Mstaafu wa Tanzania Mhe. Mohamed Chande Othman ameipongeza Mahakama ya Tanzania kwa kubuni na kuendeleza mkakati wa ujenzi wa majengo ya Mahakama yenye ubora zaidi.

Naye Mkuu wa Mkoa wa Shinyanga Bi. Zainab Telack aliipongeza Mahakama ya Tanzania kwa kusogeza karibu na wananchi. Alisema kazi ya Mhimili wa Mahakama pamoja na Serikali ni kutoa huduma bora kwa wananchi ili wawe na furaha na amani.  

Jaji Kiongozi wa Mahakama Kuu ya Tanzania Mhe. Dkt. Eliezer Feleshi amesema Mahakama ya Tanzania imejipanga kama mihimili mingine ilivyojipanga katika suala la uchaguzi Mkuu unaotarajiwa kufanyika Octoba mwaka huu. “Mahakama itasimama kwenye nafasi yake katika uchaguzi Mkuu”alisisitiza Jaji Kiongozi.

Msajili Mkuu wa Mahakama ya Tanzania Mhe. Wilbert Chuma amewataka watumishi wa Mahakama pamoja na wadau kuyalinda, kuyaenzi na kuyaishi maboresho ya Mahakama ikiwemo majengo pamoja na matumizi ya Tehama. Aliwataka watumishi kutenda haki na kutekeleza majukumu yao kwa uaminifu na uadilifu.

Mtendaji Mkuu wa Mahakama ya Tanzania Bw. Mathias Kabunduguru alipongeza watangulizi wake Mahakama kwa ubunifu na usimamizi mzuri wa miradi ya ujenzi wa majengo ya Mahakama likiwemo jengo la kanda ya Shinyanga lililozinduliwa.

Akizungumzia gharama za ujenzi wa jengo hilo, Mtendaji wa Mahakama Kuu ya Tanzania Bw. Leonard Magacha amesema kuwa ujenzi wa jengo hilo umegharimu zaidi ya shilingi bilioni 3.9 ambazo ni fedha za ndani.

Jaji Mkuu wa Tanzania Mhe. Prof. Ibrahim Hamis Juma(Katikati) akiwa na Jaji Mkuu Mstaafu Mhe. Mohamed Chande Othman wakati wa hafla ya uzinduzi wa jengo la Mahakama Kuu ya Tanzania kanda ya Shinyanga. Kushoto ni Mkuu wa Mkoa wa Shinyanga Mhe. Zainab Telack

Jengo la Mahakama Kuu ya Tanzania kanda ya Shinyanga

Jaji Mkuu wa Tanzania Mhe. Prof. Ibrahim Hamis Juma akiwasili kwenye viwanja vya Mahakama Kuu ya Tanzania kanda ya Shinyanga. 

Jaji Mkuu Mstaafu Mhe. Mohamed Chande Othman akiwa ameongozana na Jaji Kiongozi wa Mahakama Kuu ya Tanzania Mhe. Dkt. Eliezer Feleshi wakiwasili kwenye viwanja vya Mahakama Kuu ya Tanzania kanda ya Shinyanga. 

Viongozi mbalimbali wa Mahakama ya Tanzania.

Watumishi wa Mahakama Kuu ya Tanzania kanda Shinyanga.

Jaji Mkuu wa Tanzania Mhe. Prof. Ibrahim Hamis Juma, Jaji Mkuu Mstaafu Mhe. Mohamed Chande Othman, Jaji Kiongozi wa Mahakama Kuu ya Tanzania Mhe. Dkt. Eliezer Feleshi na Mkuu wa Mkoa wa Shinyanga Mhe. Zainab Telack wakikata utepe kuzindua jengo la Mahakama Kuu kanda ya Shinyanga.

Jaji Mkuu wa Tanzania Mhe. Prof. Ibrahim Hamis Juma, Jaji Mkuu Mstaafu Mhe. Mohamed Chande Othman na Mkuu wa Mkoa wa Shinyanga Mhe. Zainab Telack wakifungua pazia kuashiria kuzindua jengo la Mahakama Kuu kanda ya Shinyanga.

Jaji Mkuu wa Tanzania Mhe. Prof. Ibrahim Hamis Juma na viongozi wengine wakipatiwa maelezo ya jengo lililozinduliwa na Naibu Msajili wa kanda ya Shinyanga Mhe. Romuli Mbuya.

Jaji Mkuu wa Tanzania Mhe. Prof. Ibrahim Hamis Juma na viongozi wenzake wakipatiwa maelezo ya jengo lililozinduliwa na Naibu Msajili wa kanda ya Shinyanga Mhe. Romuli Mbuya.