MAHAKAMA YA TANZANIA YAWA MFANO UTEKELEZAJI WA MRADI WA ‘WIPO’

Na Mary Gwera, Mahakama

Shirika la Haki Miliki Duniani (WIPO), limeipongeza Mahakama ya Tanzania kwa mafanikio katika utekelezaji wa Mradi wa Haki Miliki nchini.

Akizungumza katika Mkutano wa Nchi Wanachama uliofanyika kwa njia ya video ‘video conference’, mapema Septemba 01 mwaka huu, Afisa Programu kutoka Shirika hilo, Bi. Alexandra Bhattacharya ameisifu Mahakama kwa utekelezaji mzuri wa Mradi huo na kuahidi kuendelea kufanya kazi kwa ukaribu zaidi.

“Napenda kuipongeza Mahakama ya Tanzania  kwa kujitoa kwa dhati kupigania mradi huu kuwa ajenda ya Mahakama na ya kitaifa kwa ujumla,” alisema Bi. Bhattacharya.

Katika mkutano huo, Mahakama ya Tanzania imetoa uzoefu wake katika utekelezaji wa Mradi wa Haki Miliki kwa nchi Wanachama wa Shirika hilo, ambapo Mhe. Jaji Kiongozi wa Mahakama Kuu ya Tanzania pamoja na Mkuu wa Kitengo cha Maboresho ya Mahakama walishuhudia wasilisho hilo.

Akiwasilisha andiko lake katika Kikao cha WIPO kilichofanyika kwa njia ya video, Mratibu wa Mradi huo kutoka Mahakama ya Tanzania, Mhe. Upendo Ngitiri amewaeleza Wajumbe wa mkutano huo kuwa Mahakama imefanikiwa katika utekelezaji wa Mradi huo kutokana na uongozi madhubuti wa Mhe. Jaji Mkuu.

“Mahakama ya Tanzania imefanikiwa katika utekelezaji wa mradi huu, ikiwa ni pamoja na kutoa mafunzo ya haki miliki kwa Wahe. Majaji na Mahakimu, vilevile programu ya Mafunzo ya Haki Miliki imefanikiwa kuingizwa katika Mpango Mkuu wa Mafunzo wa Mahakama ya Tanzania,” alieleza Mhe. Ngitiri ambaye pia ni Hakimu Mkazi kutoka Kurugenzi ya Usimamizi wa Mashauri-Mahakama.

Kwa mujibu wa Mhe. Ngitiri, alisema Mahakama pia inaendelea na maandalizi ya uandaaji wa majumuisho ya sheria na kesi zinazohusu hati miliki na kuongeza kuwa Mhimili huo pia uko mbioni kusaini hati ya makubaliano (MoU) na WIPO lengo likiwa ni kuimarisha mahusiano na ushirikiano zaidi.

Aidha, Mhe. Ngitiri aliwapa uzoefu wajumbe wa kikao hicho na kuwaeleza  kuwa ili kufanikisha uanzishwaji na utekelezaji  wa Miradi inayohusisha taasisi za kimataifa  ni muhimu kuzingatia sera ya nchi na tasisi wanazotoka, kuzingatia mikataba na sera ya kimataifa,kuangalia mahitaji ya nchi na kujitoa kwa ajili ya nchi yako.

Mahakama ya Tanzania ilianza kutekeleza mradi wa WIPO mwaka 2018, faida za mradi huo ni pamoja na kuwajengea Maafisa wa Mahakama uwezo wa kuamua vyema mashauri yanayotokana na uvunjifu wa haki miliki ikiwemo migogoro inayotokana na wizi wa alama za biashara.

Vilevile, kuwajengea uwezo Maafisa wa Mahakama katika eneo la Usuluhishi (ADR) na kutoa fursa kwa Majaji wa Tanzania kubadilishana uzoefu na Majaji wa nchi mbalimbali katika eneo la utoaji haki kupitia Taasisi ya Uongozi wa Mahakama ya WIPO (WIPO Judicial Institute).

Mkutano huo wa WIPO uliofanyika kwa njia ya Video ulishikisha Viongozi Waandamizi Serikali kutoka nchi mbalimbali ikiwa ni pamoja na Switzerland, Sweden, Malawi, Cambodia, Uganda, Rwanda, Nepal, Ethiopia, Zambia, Msumbiji na nyinginezo.

Mwakilishi na Mratibu wa Mradi wa Haki Miliki Duniani (WIPO) kwa upande wa Mahakama ya Tanzania, Mhe. Upendo Ngitiri  akiwasilisha mada ya mafanikio ya utekelezaji wa Mradi huo kwa Viongozi Waandamizi wa Serikali kutoka nchi mbalimbali.

Mkutano huo ulifanyika kwa njia ya Video 'video conference' mapema Septemba 01, 2020.

Pichani ni Afisa Programu kutoka Shirika la Haki Miliki Duniani (WIPO), Bi. Alexandra Bhattacharya. 

Pichani katika kumpyuta ni Jaji Kiongozi, Mahakama Kuu ya Tanzania, Mhe. Dkt. Eliezer Mbuki Feleshi pamoja na Mkuu wa Kitengo cha Maboresho, Mahakama ya Tanzania wakifuatilia pindi Mwakilishi kutoka Tanzania akiwasilisha mada ya mafanikio ya Mradi wa WIPO kwa Viongozi Wakuu wa Serikali kutoka nchi mbalimbali walioshiriki katika Mkutano wa WIPO uliofanyika kwa mtandao 'Video Conference.'

Baadhi ya Washiriki wa Mkutano huo wakifuatilia Mada ya Mafanikio ya Mradi kutoka Mahakama ya Tanzania.