Na Lydia Churi-Mahakama, Kilimanjaro
Jaji Mkuu wa Tanzania Mhe. Prof. Ibrahim Hamis Juma
ambaye pia ni Mwenyekiti wa Tume ya Utumishi wa Mahakama ametoa rai kwa wakuu
wa Mikoa na Wilaya kusimamia suala la upatikanaji wa haki kwenye maeneo yao ya kazi
ili kupunguza idadi ya mashauri yanayofunguliwa mahakamani.
Akifungua mkutano wa Tume ya Utumishi wa Mahakama na wajumbe
wa kamati za Maadili za Mkoa na wilaya katika Mkoa wa Kilimanjaro, Jaji Mkuu
alisema mfumo wa utoaji haki huishia mahakamani lakini haki inaanzia hata
kwenye taasisi za Serikali.
Akitolea mfano wa ukusanyaji wa kodi mbalimbali za
Serikali ambao ni moja ya kazi zinazofanywa na Serikali, Jaji Mkuu alisema
mfano huo unagusa moja kwa moja suala la upatikanaji wa haki kwa wananchi.
Aidha, Jaji Mkuu amewataka viongozi hao wa mikoa na
wilaya nchini kuwabana wapelelezi na waendesha mashtaka wafanye kazi zao kwa
haraka na weledi ili mashauri yamalizike kwa wakati na haki kutendeka.
Alisema msingi wa kesi unajengwa na wapelelezi na kushinda
au kushindwa katika kesi hutokana na waendesha mashitaka na mawakili wa
serikali.
“Sheria zimefanyiwa marekebisho makubwa ili
kurahisisha ukusanyaji wa ushahidi hivyo hakikisheni inawahimiza wapelelezi kutumia
sheria hizo ili kurahisisha suala la upatikanaji” alisisitiza Jaji Mkuu.
Jaji Mkuu alisema, Sheria ya DNA ipo tangu mwaka 2009
lakini haitumiki katika kesi za ubakaji na kuongeza kuwa kosa linapotokea sampuli
hazichukuliwi mapema na wakati huo huo mwathirika anapimwa lakini mtuhumiwa
hapimwi mapema wakati tayari sheria imerahisisha ukusanyaji wa ushahidi kwenye
kesi za aina hiyo.
Alisema kutotumika kwa sheria hiyo pamoja na ile ya matumizi
ya video katika ukusanyaji wa ushahidi wakati mtuhumiwa akihojiwa katika kituo
cha polisi na sheria ya kulinda mashahidi kunasababisha Mahakama kutupiwa
lawama isizostahili.
Jaji Mkuu pia amewaomba wakuu wa mikoa na wilaya ambao
ni wenyeviti wa kamati za maadili ya maafisa wa Mahakama wa mikoa na wilaya kufuatilia
shughuli mbalimbali zinazofanywa na Mahakama ili waweze kuwaelimisha wananchi
masuala yanayohusu mhimili huo.
“Changamoto za Mahakama zinaweza kutafsiriwa na
wananchi kuwa ni masuala ya kinidhamu, endapo wajumbe wa hizi kamati watazifahamu
watakuwa kwenye nafasi nzuri ya kuwaelezea wanannchi”, alisema.
Alisema kamati za maadili za mikoa na wilaya zinaisaidia
Mahakama kuwa huru na kufanya kazi zake kwa haki bila rushwa wala upendeleo. “Jukumu
la kamati hizi ni kutunza nidhamu kwa Majaji na Mahakimu huku mkikumbuka kuwa
watumishi hawa wana haki zao za msingi za kutosingiziwa wala kulaumiwa bila
sababu, alisema.
Prof. Juma alisema madhumuni ya Tume ya Utumishi wa
Mahakama kufanya ziara mkoani humo ni kuona hali halisi ya utekelezaji wa
majukumu ya Mahakama, kukutana na wajumbe na kubadilishana uzoefu, kupokea
maoni mbalimbali na kusikiliza changamoto zilizopo.
Jaji Mkuu alisema Tume hiyo ni ya kikatiba inayoisaidia
nchi katika safari ya kuwa Jamhuri iliyo bora na hivyo mihimili yote ya dola haina
budi kuifikisha nchi kwenye uhuru, haki,
udugu na amani.
Tume ya Utumishi ya Mahakama imeundwa kwa mujibu wa
Katiba ya Jamhuri ya Muungano wa Tanzania Ibara ya 112 kwa lengo la kusimamia
mambo muhimu yanayohusu Mhimili wa Mahakama. Wajumbe wa Tume hiyo ni pamoja na
Jaji Mkuu wa Tanzania (Mwenyekiti), Mwanasheria Mkuu wa Serikali, Jaji moja wa
Mahakma ya Rufani anayeteuliwa na Rais, Jaji Kiongozi wa Mahakama Kuu ya Tanzania,
na wajumbe wengine wawili wanaoteuliwa na Rais.
Baadhi ya kazi
za Tume hiyo ni pamoja na kumshauri Mhe. Rais katika uteuzi wa Majaji wa
Mahakama Kuu, kumshauri Rais kuhusu masuala ya nidhamu, mishahara na maslahi ya
Majaji, na kushauri kuhusu ajira za Mahakimu na kusimamia nidhamu yao.
Tume ya Utumishi wa Mahakama inafanya ziara katika Mikoa
ya Kilimanjaro, Arusha na Manyara kwa lengo la kuitangaza na kutoa elimu kwa
wajumbe wa kamati za Maadili za Mika na Wilaya ambao ni wakuu wa Mikoa na wakuu
wa Wilaya.
Hakuna maoni:
Chapisha Maoni