MTENDAJI MKUU WA MAHAKAMA AWATAKA WATUMISHI KUJIEPUSHA NA RUSHWA

 Lydia Churi na Innocent Kansha-Mahakama

Mtendaji Mkuu wa Mahakama ya Tanzania Prof. Elisante Ole Gabriel amewataka Watumishi wa Mahakama nchini kujiepusha vitendo vya rushwa ili waweze kuwatumikia wananchi kwa uadilifu na kuhakikisha wanapata haki kwa wakati.

“Kazi kubwa ya Mhimili huu ni kutoa haki hivyo watumishi wa Mahakama hawana budi kuvipinga kwa nguvu zote vitendo vya rushwa na ukosefu wa maadili ili Mahakama iendelee kuwa ni sehemu takatifu”, alisema Mtendaji Mkuu.

Akizungumza na Watendaji wote wa Mahakama (Court Administrators) walioko katika mikoa mbalimbali nchini kwa kutumia teknolojia ya Mahakama mtandao maarufu kama ‘Virtual Court’, Prof. Ole Gabriel pia aliwataka Watendaji hao kufanya kazi kwa bidii, kushirikiana na kuzingatia maadili.

Aidha aliwataka watendaji wote kuongeza kasi katika matumizi ya Teknolojia ya Habari na Mawasilianao (TEHAMA) na kuwahimiza watumishi kujielimisha zaidi juu ya matumizi hayo kwa kuwa sasa Mahakama inaelekea kuachana na matumizi ya karatasi katika shughuli zake za kiutendaji.

Alisema matumizi ya Tehama mahakamani yatarahisisha utendaji kazi wa hasa kupunguza idadi ya mashauri pamoja na kukabiliana na changamoto ya upungufu wa watumishi wa kada mbalimbali ndani ya Mhimili huo. Alifafanua kuwa hivi sasa Mahakama ina watumshi 5,835 kwa nchi nzima wakati mahitaji halisi ni watumishi 10,350.

Kuhusu ushirikiano baina ya watumishi, Mtendaji Mkuu ametoa wito kwa viongozi pamoja na watumishi wa aina zote kushirikiana katika kutoa huduma ili wananchi wapate haki kwa wakati.  

“Watumishi wa Mahakama ni kama shilingi yenye pande mbili ambapo ni lazima pande zote mbili zionekane, na ndivyo tunavyotakiwa kufanya kazi zetu kila siku za kutoa haki na kumhudumia mwananchi”, alisisitiza Prof. Ole Gabriel

Prof. Elisante Ole Gabriel ni Mtendaji Mkuu wa tatu wa Mahakama ya Tanzania tangu kuanzishwa kwa nafasi hiyo ndani ya Mhimili huo kwa mujibu wa Sheria ya Uendeshaji wa Mahakama Namba 4 ya mwaka 2011. Mtendaji Mkuu wa Kwanza alikuwa ni Mhe. Balozi Hussein Athuman Kattanga (Sasa Katibu Mkuu Kiongozi) ambaye alifuatiwa na Bw. Mathias Kabunduguru aliyestaafu kwa mujibu wa sheria.

Mtendaji Mkuu wa Mahakama ya Tanzania Prof. Elisante Ole Gabriel akizungumza na Watendaji wa Mahakama (Court Administrators) walioko katika mikoa mbalimbali nchini kwa kutumia Teknolojia ya Mahakama Mtandao (Virtual Court) ofisini kwake jijini Dar es salaam.

Mtendaji Mkuu wa Mahakama ya Tanzania Prof. Elisante Ole Gabriel akisisitiza jambo wakati akizungumza na Watendaji wa Mahakama (Court Administrators) akiwa ofisini kwake jijini Dar es salaam.