JAJI MKUU AKAGUA MIRADI YA UJENZI WILAYANI NGARA

Na Innocent Kansha – Mahakama, Ngara

Jaji Mkuu wa Tanzania Mhe. Prof. Ibrahim Hamis Juma awataka watumishi kujielimisha katika eneo la teknolojia ili kuendana na kasi ya mageuzi yanayotekelezwa na Mahakama ya uboreshaji wa miundombinu na matumizi ya Teknolojia ya Habari na Mawasiliano (TEHAMA).

Akizungumza wakati wa ziara ya kukagua miradi ya ujenzi wa majengo ya Mahakama ya Wilaya ya Ngara na Mahakama ya Mwanzo Kabanga mkoani Kagera leo Agosti 30, 2021 Jaji Mkuu Prof. Juma alisema Mahakama inatarajia kuachana na utaratibu wa kawaida wa kuendesha mashauri kwa njia ya karatasi ifikapo mwaka 2025.

Aliwataka watumishi kujitayarisha kufanya kazi katika mazingira yanayotegemea teknolojia kwa kuwa Mahakama tayari imewekeza kwa kiasi kikubwa kwenye mifumo hiyo na kuwa matumizi hayo yataifanya huduma ya utoaji haki kuwa karibu zaidi na wanachi, kuongeza uwazi zaidi na kupunguza malalamiko.

“Kutokana na kukua kwa teknolojia na dunia kuingia kwenye karne ya nne ya mapinduzi ya viwanda shughuli zetu nyingi za Mahakama zimeanza kutawaliwa na matumizi ya Tehama, siyo lazima ukae darasani, unaweza kutumia mitandao kujielimisha, mafunzo ya namna hii mengi hutolewa na Chuo chetu cha Uongozi wa Mahakama Lushoto, kwa kuzingatia matumizi ya teknolojia hii yatatufikisha dunia ya kwanza”, alisisitiza Jaji Mkuu.

Kwa upande wa malalamiko, Jaji Mkuu alisema wakati mwingine malalamiko mengi yanayotokana na wananchi kutofahamu taratibu za Mahakama za uendeshaji wa shughuli zake, lakini kwa kutumia teknolojia hii itawafanya wananchi na wadau kujua vizuri taratibu hizo.

Jaji Mkuu alisema Mpango Mkakati wa Mahakama wa kuboresha miundombinu hasa ya majengo ni njia mojawapo ya kurahisisha matumizi ya teknolojia ili kuwafika wananchi wengi zaidi katika utoaji wa haki nchini.

Prof. Juma aliwapongeza watumishi hao kwa kazi nzuri ya kuwahudumia wananchi kwani kazi zao zinaonekana kupitia mifumo ya JSDS II, Usajili wa mashauri kupitia mtandao na akawataka kuongeza juhudi katika utendaji wao wa kazi bila kuchoka ili kurejesha imani ya Mahakama kwa wadau wake. 

"Natambua kuwa bado tun achangamoto ya majengo karibu nchi nzima na mpaka sasa Mahakama imeshajenga takribani theluthi moja hivi ya majengo yake hivyo nawahakikishia watumishi na wadau kuwa ifikapo mwaka 2021/2022 hadi 2025/2025 Mahakama itakuwa imekamilisha miradi mingi na kutatua hiyo kero", alisema Jaji Mkuu.

Aidha, aliwakumbusha wenyeviti wa kamati za maadili ya Maafisa wa Mahakama, kamati za usalama na wadau wa Mahakama wa Wilaya za Ngara, Biharamulo na Muleba kufikiria uwezekano wa kufikisha umeme kwenye maeneo yenye miundombinu ya Mahakama ili kurahisha matumizi ya Tehama na kuondoa changamoto hiyo.

Jaji Mkuu wa Tanzania ataendelea na ziara yake ya kikazi Agosti 31, 2021 katika Wilaya ya Bukoba Vijijini na kisha kuhitimisha kwa kukutana na kuzungumza na watumishi wa Mahakama kanda ya Bukoba.

Jengo la Mahakama ya Wilaya ya Ngara  likiwa katika hatua za kukamilika.

Jaji Mkuu wa Mahakama ya Tanzania, Mhe. Prof. Ibrahim Hamis Juma akisoma ramani ya jengo la Mahakama ya Wilaya ya Ngara alipofika kufanya ukaguzi wa maendeleo ya ujenzi wake.

Jaji Mkuu wa Tanzania Mhe. Prof. Ibrahim Hamis Juma (wa kwanza kushoto) akipokea taarifa fupi ya maendeleo ya ujenzi wa jengo la Mahakama ya Wilaya Ngara  iliyowasilishwa na Mtathmini wa Mahakama ya Tanzania,  Raphael Bandiho wakati wa zoezi la ukaguzi wa Jengo hilo.

Msanifu wa Majengo kutoka Kampuni ya  HY- Projects Consultants Ltd Kevin Joas (aliyenyoosha mkono) akimwongoza Jaji Mkuu wa Tanzania Mhe. Prof. Ibrahim Hamis Juma (wa kwanza kulia) wakati wa ukaguzi wa Jengo la Mahakama ya Wilaya ya Ngara wakati wa zoezi hilo.

Msanifu Majengo kutoka Kampuni ya  HY- Projects Consultants Ltd Kevin Joas (aliyenyoosha mkono) akimwongoza Jaji Mkuu wa Tanzania Mhe. Prof. Ibrahim Hamis Juma (wa kwanza kulia mbele) akiwa ameambatana na Viongozi waandanizi mbalimbali wa Mahakama ya Tanzania wakati wa ukaguzi wa Jengo la Mahakama ya Wilaya ya Ngara wakati wa zoezi hilo.

Msanifu Majengo kutoka Kampuni ya  HY- Projects Consultants Ltd Kevin Joas (aliyenyoosha mkono juu) akimwongoza Jaji Mkuu wa Tanzania Mhe. Prof. Ibrahim Hamis Juma (wa kwanza kulia) wakati wa ukaguzi wa Jengo la Mahakama ya Wilaya ya Ngara wakati wa zoezi hilo.

Jaji Mkuu wa Mahakama ya Tanzania, Mhe. Prof. Ibrahim Hamis Juma akipanda Mti wa Matunda ikiwa ni ishara ya ziara yake ya ukaguzi wa Jengo la Mahakama ya Wilaya Ngara mkoani Kagera.

Baadhi ya watumishi na Viongozi waandamizi wa Mahakama waliofika kwenye jengo la Mahakama ya Wilaya Ngara kushuhudia ukaguzi uliofanywa na Jaji Mkuu wa  Tanzania Mhe. Prof. Ibrahim Hamis Juma (hayupo pichani).

 Jengo la Mahakama ya Mwanzo Kabanga Wilayani Ngara linaloendelea kujengwa ikiwa ni moja ya miradi ya maboresho ya miundombinu ya Mahakama ya Tanzania.

Mtathimini kutoka Mamlaka ya Usimamizi wa Majengo (TBA) Jackson Charles (aliyenyoosha mkono) akimpitisha kwenye michoro ya jengo la Mahakama ya Mwanzo Kabanga Wilayani ngara Jaji Mkuu wa Tanzania Mhe. Prof. Ibrahim Hamis Juma (mwenye kofia ya bluu) alipofika mahali hapo kwa shughuli za ukaguzi wa jengo hilo.

Picha na Innocent Kansha - Mahakama