IJA KUWAPIKA WASHIRIKI 36 JUU YA HAKI ZA MTOTO

 Na Rosena Suka - Lushoto

Chuo cha Uongozi wa Mahakama Lushoto (IJA) kinaendesha mafunzo kwa wawezeshaji 36 kutoka sehemu mbalimbali nchini Tanzania ili kuwajengea uelewa na ujuzi wa pamoja juu ya uendeshaji bora wa mashauri ya mtoto.

Mafunzo hayo yanayofanyika kwa siku tano katika ukumbi wa St. Gaspar jijini Dodoma yameanza leo tarehe 15 Novemba, 2021 ambapo washiriki ni Majaji kutoka Mahakama ya Rufani ya Tanzania na Mahakama Kuu ya Tanzania, Mahakimu Wakazi wa ngazi mbalimbali, Waendesha Mashtaka na Maafisa Ustawi wa Jamii. 

Mahakama ya Tanzania imeandaa mafunzo kwa kushirikiana na Chuo cha Uongozi wa Mahakama Lushoto chini ya ufadhili wa Shirika linalohudumia Watoto Duniani (UNICEF). Wakati wa mafunzo, washiriki watapitishwa katika mada mbalimbali zitakazowasilishwa na wawezeshaji mahiri na wabobezi ili kuwawezesha kuwa na uelewa na ujuzi mpana juu ya haki za watoto na namna bora ya kushughulikia mashauri yao.

Miongoni mwa wawezeshaji hao mahiri na wabobezi ni Jaji Mstaafu wa Mahakama Kuu ya Tanzania, Mhe. Sophia Wambura na Wakili wa Kujitegemea Mstaafu, Mhe. Matilda Philip.

Akitoa neno la ukaribisho, Mkuu wa Chuo hicho, Mhe. Dkt Paul Kihwelo, ambaye pia ni Jaji wa Mahakama ya Rufani ya Tanzania alisema kuwa wameamua kuandaa mafunzo hayo kwa kundi hilo ili kuwaandaa waweze kupata ujuzi wa kutosha kuhusu masuala ya watoto, jambo litakalowawezesha nma wao kuwafundisha wengine ambao hawakupata nafasi hiyo.

Kwa upande wake, Mwakilishi kutoka UNICEF, Bi. Victoria Mgonela ameushukuru uongozi wa Mahakama na Chuo kwa kulipa uzito wa kipekee suala la uendeshaji wa mashauri ya watoto na kuahidi kuwa shirika lake litaendeleza ushirikiano uliopo.

Mafunzo kama hayo yalishawahi kuendeshwa mwaka 2014 ambayo yalijumuisha majaji sita (6), Mahakimu Wakazi sita (6), maafisa ustawi wa jamii wawili (2) na watumishi watatu (3) kutoka Chuo cha Uongozi wa Mahakama Lushoto.

1 Mkuu wa Chuo cha Uongozi wa Mahakama Lushoto, Mhe. Dkt Paul Kihwelo, ambaye ni Jaji wa Mahakama ya Rufani ya Tanzania akitoa neno la ukaribisho kwenye  mafunzo yanayojumuisha Majaji, Mahakimu na wawezeshaji wengine leo tarehe 15 Novemba, 2021 jijini Dodoma.

Mwakilishi wa shirika la UNICEF nchini Tanzania, Bi. Victoria Mgonela akitoa salamu kwenye mafunzo hayo yanayofanyika katika ukumbi wa St. Gasper jijini Dodoma.

Picha ya pamoja ya Majaji wanaoshiriki katika mafunzo ambao ni Mhe. Rehema Sameji, Jaji wa Mahakama ya Rufani (katikati), Mhe. Paul Kihwelo, Jaji wa Mahakama ya Rufani (wa pili kushoto) na Mhe. Issa Maige, Jaji wa Mahakama ya Rufani (wa pili kulia). Wengine ni Mhe. Devotha Kamuzora, Jaji wa Mahakama Kuu ya Tanzania (wa kwanza kushoto na Mhe. John Chaba, Jaji wa Mahakama Kuu ya Tanzania (wa kwanza kulia). 

Majaji wanaoshiriki katika mafunzo (ambao wamekaa) wakiwa katika picha ya pamoja na washiriki wengine.

1.     Baadhi ya washiriki wa mafunzo wakimsikiliza mwezeshaji katika mafunzo hayo, Jaji Mstaafu wa Mahakama Kuu ya Tanzania, Mhe. Sophia Wambura (hayupo katika picha).