JAJI MTULYA ASISITIZA UTAMBUZI MAENEO YA MAHAKAMA

 Na. Francisca Swai – Mahakama, Musoma

Jaji Mfawidhi wa Mahakama ya Tanzania, Kanda ya Musoma, Mhe. Fahamu Mtulya amesisitiza utambuzi wa mipaka ya maeneo ya Mahakama zote ili kulinda maeneo hayo dhidi ya uvamizi wa wananchi na taasisi mbalimbali.

Mhe. Mtulya ametoa kauli hiyo jana tarehe 23 Machi, 2022 akiwa katika siku ya tano ya ziara yake ya ukaguzi wa shughuli za Mahakama katika Kanda ya Musoma.

Alisema historia ya maeneo na mipaka ya Mahakama ipo kwa watumishi wa zamani, kiasi ambacho wasipokuwepo Mahakama inaweza kupoteza utambuzi wa maeneo hayo, jambo litakalopelekea kupoteza sehemu kubwa ya ardhi yenye thamani.

Aidha, Jaji Mfawidhi huyo alimtembelea Mkuu wa Wilaya ya Rorya, Mhe. Juma Chikoka ambapo, pamoja na mambo mengine alitoa rai kwa Mtendaji wa Mahakama, Kanda ya Musoma , Bw. Festo Chonya kushirikiana na viongozi wa Wilaya ili kupata hati miliki za kiserikali mapema za maeneo yote ya Mahakama.

Mhe. Mtulya pia alietembelea na kukagua Mahakama ya Mwanzo Kinesi iliyoanza kutoa huduma Agosti 1, 2020 baada ya Mtendaji wa Mahakama Kanda ya Musoma kufanya ukarabati wa jengo moja lililokuwa chakavu kutokana na uhitaji wa Mahakama eneo hilo. Mahakama hiyo ilifungwa mwaka 2000 kutokana na uchakavu wa majengo.

Naye Mtendaji wa Mahakama Kanda ya Musoma alieleza kuwa kwa sasa kuna mradi unaoendelea wa ujenzi wa jengo jipya la kisasa la Mahakama hiyo unaotekelezwa na Mkandarasi PEK Brothers. Mradi huo ni wa miezi nane na ulianza Februari 24, 2022, hivyo unatarajiwa kukamilika Oktoba 23, 2022.

Hakimu Mkazi Mfawidhi wa Mahakama ya Mwanzo Riagoro, Mhe. Boniphace Shimbe akimuonesha Jaji Mfawidhi wa Mahakama ya Tanzania, Kanda ya Musoma, Mhe. Fahamu Mtulya na viongozi wengine eneo na mipaka ya Mahakama ya Mwanzo Riagoro.

Jaji Mfawidhi wa Mahakama ya Tanzania, Kanda ya Musoma, Mhe. Fahamu Mtulya (wa pili kulia mstari wa mbele) akiwa katika picha ya pamoja na Mkuu wa Wilaya Rorya, Mhe. Juma Chikoka (katikati) pamoja na viongozi wengine wa kamati ya ulinzi na usalama wa Wwilaya ya Rorya.

Watumishi wa Mahakama ya Mwanzo Kinesi wakipokea kwa furaha vitendea kazi kutoka kwa Jaji Mfawidhi wa Mahakama ya Tanzania, Kanda ya Musoma, Mhe. Fahamu Mtulya (katikati). Kulia ni Hakimu Mkazi Mfawidhi wa Mahakama ya Mwanzo Kinesi, Mhe. Deodath Ngowi na kushoto ni Mlinzi wa Mahakama hiyo, Bw. Edwin Elisamehe.

Watumishi wa Mahakama ya Mwanzo Riagoro wakipokea vitendea kazi kutoka kwa Jaji Mfawidhi wa Mahakama ya Tanzania, Kanda ya Musoma, Mhe. Fahamu Mtulya. 

Jaji Mfawidhi wa Mahakama ya Tanzania, Kanda ya Musoma, Mhe. Fahamu Mtulya (wa pili kulia) akimkabidhi vitendea kazi  watumishi wa Mahakama ya Mwanzo Riagoro akiwemo Hakimu Mkazi Mfawidhi Mhe. Ole Shady Marwa (pili kushoto).

Hakimu Mkazi Mfawidhi Mahakama ya Mwanzo Shirati, Mhe. Simon Msangazi akimuonesha Jaji Mfawidhi wa Mahakama ya Tanzania, Kanda ya Musoma, Mhe. Fahamu Mtulya na viongozi wengine maeneo ya Mahakama hiyo.

Jaji Mfawidhi wa Mahakama ya Tanzania, Kanda ya Musoma, Mhe. Fahamu Mtulya akitoa maelekezo kwa watumishi wa Mahakama ya Mwanzo Kinesi.

Watumishi wa Mahakama ya Mwanzo Shirati wakisikiliza kwa makini maelekezo ya Jaji Mfawidhi wa Mahakama ya Tanzania, Kanda ya Musoma, Mhe. Fahamu Mtulya (kushoto).