MAJAJI SONGEA WAHIMIZA USHIRIKIANO

 Na Brian Haule-Mahakama, Songea.

Aliyekuwa Jaji Mfawidhi wa Mahakama Kuu ya Tanzania, Kanda ya Songea, Mhe. Sekela Moshi amewaasa watumishi kuendeleza ushirikiano baina yao na viongozi wanapotekeleza majukumu mbalimbali ya kimahakama ili kufikia azma ya Mahakama ya kutoa haki kwa wananchi kwa wakati.

Kauli kama hiyo ilitolewa na Jaji Mfawidhi mpya wa Kanda hiyo, Mhe. Yose Mlyambina katika hafla fupi ya makabidhiano ya ofisi iliyofanyika jana tarehe 28 Machi, 2022 mbele ya watumishi wa Mahakama Kanda ya Songea mara baada ya Mhe. Moshi kuhamishiwa Mahakama Kuu ya Tanzania, Masjala Kuu jijini Dar es Salaam.

“Napenda kuwajulisha imempendeza Jaji Mkuu nihamishiwe Mahakama Kuu (Masjala Kuu) Dar es Salaam. Nawashukuru kwa ushirikiano mkubwa mlionionyesha kwa kipindi chote nilichokuwepo hapa. Tumeishi vizuri na naomba ushirikiano mlionipa mimi mumpatie pia Mhe. Mlyambina,” amesema Mhe. Moshi

Kwa upande wake, Jaji Mfawidhi huyo mpya alianza kwa kumshukuru Mungu kwa kuwezesha jambo hilo kufanyika kwani kupitia yeye imempendeza Jaji Mkuu amhamishe kutoka Iringa hadi Songea. Amemshukuru pia Mhe. Moshi kwa ushirikiano aliomwonyesha tangu siku ya kwanza alipofika Songea.

Alitumia nafasi hiyo kuwaomba watumishi wote kumpa ushirikiano kwa kuzingatia yeye peke yake hatoweza kutimiza malengo ya Mahakama yanayokusudiwa, hivyo ni muhimu kupata mchango wa utendaji kazi kwa kila mmoja wao.

Mhe. Mlyambina pia aliwakumbusha watumishi hao kuzingatia nidhamu katika kazi na kuwahudumia wateja wanaofika mahakamani kutafuta haki kwa upendo. Amewasihi  watumishi hao kupenda kujiendeleza, huku akiahidi kuwaunga mkono wale watakaohitaji kufanya hivyo ili kujiongezea maarifa katika kazi.

Kadhalika, Mhe. Mlyambina amehimiza matumizi endelevu ya Teknolojia ya Habari na Mawasiliaon (TEHAMA) katika shughuli zote za kimahakama, akiamini Songea itaongoza kwa Mahakama Mtandao, kama ilivyokuwa Tanga kipindi fulani alipokuwa akihudumu katika Mahakama hiyo. “Naomba Afisa Tehama uwafundishe watu wetu kama hawana mafunzo ya Mahakama Mtandao. Tutaandaa utaratibu wa kuwafundisha hata wadau na wateja wetu ili wote twende pamoja, hatutaki mtu abaki nyuma,” alisisitiza.

Akiongea kwa niaba ya watumishi, Hakimu Mkazi, Mhe. Asifiwe Jembe amemshukuru Mhe. Moshi kwa malezi yake kama kiongozi na kumkaribisha Mhe. Mlyambina kama kiongozi mpya katika Kanda hiyo.

Kwa upande wao, Naibu Msajili wa Mahakama Kuu, Kanda ya Songea, Mhe. Sylvester Ngh’umbu na Mtendaji wa Mahakama katika Kanda hiyo, Bw. Geofrey Mashafi waliwaasa watumishi wa Mahakama kuzingatia maelekezo yote yaliyotolewa na Jaji Mfawidhi mpya.

Aliyekuwa Jaji Mfawidhi wa Mahakama ya Tanzania, Kanda ya Songea, Mhe. Sekela Moshi (katikati) akiongea na watumishi katika hafla ya makabidhiano ya ofisi jana tarehe 29 Machi, 2022. Kushoto Jaji Mfawidhi mpya, Mhe. Yose Mlyambina na kulia ni Jaji wa Mahakama Kuu Songea, Mhe. Upendo Madeha.

Jaji Mfawidhi mpya wa Mahakama Kuu ya Tanzania, Kanda ya Songea, Mhe. Yose Mlyambina (aliyesimama) akiongea na watumishi katika hafla hiyo. Katikati ni aliyekuwa Jaji Mfawidhi katika Kanda hiyo, Mhe. Sekela Moshi akifuatiwa na Jaji wa Mahakama Kuu Songea, Mhe. Upendo Madeha.

Baadhi ya Watumishi wa Mahakama wakiwa kwenye hafla hiyo.