MAHAKAMA SPORTS KUSHIRIKI MASHINDANO MEI MOSI 2022

 Na Faustine Kapama-Mahakama, Dodoma

Timu ya Mahakama ya Tanzania, Mahakama Sports) ipo jijini hapa kushiriki katika mashindano ya michezo mbalimbali ya Mei Mosi kwa mwaka huu wa 2022 yanayofanyika katika Uwanja wa Jamhuri.

Mweyekiti wa Mahakama Sports Wilson Dede amesema leo tarehe 18 Aprili 2022 kuwa vijana wake wapo tayari kwa mashindano hayo ambapo kesho tarehe 19 April, 2022 watajitupa kwa mara ya kwanza kwenye mchezo wa kuvuta kamba.

Amesema wanawake watachuana na timu ya Ocean Road, huku Mahakama Sports wanaume wakimenyana na vikali na timu ya TPDC.

“Vijana wote wapo tayari kwa mchezo huo. Tumeingia hapa tangu Ijumaa tarehe 15 Aprili 2022 na kutokana na maandalizi tunayofanya chini ya mwalimu wetu Spia Ngwembe tunauhakika tutaibuka washindi,” Mwenyekiti huyo alisema.

Amebainisha kuwa jumla ya timu 15 za kuvuta kamba kutoka taasisi mbalimbali zinashiriki katika mashindano hayo ambapo timu ya wanaume ya kuvuta kamba ya Mahakama ya Tanzania imepangwa Kundi B lenye timu tatu.

“Timu za kuvutana kamba wanaume zipo 15 na kila kundi linatakiwa kuwa na timu nne, hivyo katika kupanga kwenye vikundi sisi tumeangukia kwenye Kundi B lenye timu tatu linalojumuisha Timu ya Mahakama, TPDC na Tanesco,” amesema.

Dede amesema kuwa katika makundi mengine yenye timu nne watacheza mechi tatu lakini kwa upande wa Mahakama Sports wanaume watacheza mechi mbili.

Kwa upande wa kuvuta kamba wanawake, Mwenyekiti huyo amesema Mahakama Sports wapo katika kundi A lenye timu nne zinazojumuisha pia timu za Ocean Road, Tanesco na Tume ya Taifa ya Uchaguzi na watacheza mechi tatu.

“Baada ya mvutano kwenye makundi tutaingia kwenye mtoano,” amesema. Ametaja michezo mingine wanayoshiriki katika mashindano hayo kama bao wanawake, karata wanaume na wanawake, draft kwa upande wa wanawake na wanaume na pia mbio za wazee.

Jumla ya wachezaji 43 wa Mahakama Sports wanashiriki katika mashindano hayo. Kati ya hao, wachezaji wanawake wapo 20 na wanaume wapo 23. Wachezaji wa Timu ya Mahakama wametoka katika Mikoa mbalimbali ikiwemo Dar es Salaam, Mbeya, Songwe, Morogoro, Shinyanga na Simiyu.

Mwenyekiti Dede amekumbushia kuwa timu ya kuvuta kamba ya Mahakama ya Tanzania ni mabingwa wa mashindano ya Shimiwi kwa mwaka 2021.

Amesema miaka ya nyuma Timu ya Mahakama Sports ilikuwa bingwa, kwa maana kuwa washindi wa kwanza kwa upande wa wanaume na washindi wa kwanza kwa upande wa wanawake kwa mwaka 2014.

“Tangu kipindi hicho tulikuwa hatujashiriki katika mashindano haya kutokana na sababu mbalimbali. Tumeamua kushiriki mwaka huu,” amesema.

Mbali na Mwenyekiti, viongozi wengine ambao wameambatana na timu hiyo ni Makamu Mwenyekiti Fidelis Choka, Katibu Mkuu Robert Tende, Naibu Katibu Mkuu Theodosia Mwangoka, Wajumbe wawili Rajab Mwariko na Mchawi Mwanamsolo, Afisa wa timu Nkuruma na Mwalimu Spia Ngwembe.

Michuano katika michezo hiyo imechelewa kuanza kutokana na Uwanja wa Jamhuri kuzuiliwa kwa vile ulikuwa unatumika kwa ajili ya mechi za Ligi Kuu. Tayari uongozi wa uwanja umeshatoa kibali cha kuanzia  kutumia uwanja huo kesho.

 

Timu ya Mahakama Sports (picha mbili za juu na mbili za chini) ikijifua kabla ya kuingia dimbani kesho kwenye mchezo wao wa kwanza wa kuvuta kamba.

Wachezaji wa Mahakama Sports wakipasha misuri

 Timu ya Mahakama Sports katika picha ya pamoja baada ya mazoezi.