BARAZA LA WAFANYAKAZI MAHAKAMA YA MAKOSA YA RUSHWA NA UHUJUMU UCHUMI LAKUTANA

Na. Faustine Kapama– Mahakama

Jaji Mfawidhi wa Mahakama Kuu ya Tanzania, Divisheni ya Makosa ya Rushwa na Uhujumu Uchumi, Mhe. Elinaza Luvanda jana tarehe 27 Mei, 2022 ameongoza kikao cha Baraza la Wafanyakazi la Mahakama hiyo kupokea na kujadili taarifa za utendaji zilizowasilishwa na viongozi mbalimbali.

Katika kikao hicho, Mtendaji wa Mahakama Kuu ya Tanzania kwenye Divisheni hiyo, Bi. Masalu Kisasila aliwapitisha wajumbe wa Baraza hilo kwenye mpango Mkakati wa Miaka Mitano (2021/2022-2024/2025) wa Mahakama na kuwahimiza watumishi wote kufanya kazi kwa bidii ili kukidhi matarajio yaliyokusudiwa.

Wajumbe wa Baraza hilo pia walitoka na maazimio kadhaa ambayo yatapelekwa kwenye Baraza Kuu la Mahakama Taifa, ikiwemo suala la malimbikizo ya mishahara kwa watumishi na mikopo inayotolewa na hazina. Wajumbe hao walipendekeza kila mgawo unapotolewa upelekwe kwenye vituo au Kanda za Mahakama.

Akiwasilisha taarifa yake ya utendaji kazi kwa kipindi cha mwezi Machi 2021 hadi tarehe 27 Mei, 2022, Naibu Msajili wa Mahakama hiyo, Mhe. Magdalena Ntandu amesema Majaji na watumishi wote wanafanya kazi kwa kujituma, ushirikiano na weledi ili kufanikisha azima yao ya kutoa haki kwa wakati kwa wananchi.

Hata hivyo, Naibu Msajili huyo alielezea changamoto mbalimbali katika uendeshaji wa mashauri wanazokabiliana nazo, ikiwemo kutopatikana kwa mashahidi kwa wakati, baadhi ya mashauri kuwa na idadi kubwa ya makosa kwenye shauri moja, idadi kubwa ya mashahidi na vielelezo, hivyo kuhitaji muda mwingi wa kusikiliza mashauri hayo.

Changamoto nyingine ni mawakili wa Serikali kuchelewa kufika mahakamani na kuchelewa kuandaa mashahidi, maombi ya kuahirisha shauri mara kwa mara na washitakiwa kuchelewa kuletwa mahakamani kutokana na changamoto ya usafiri.

Mhe. Ntandu alilieleza Baraza kuwa pamoja na changamoto hizo, bado Divisheni hiyo ilifanikiwa katika mambo mbalimbali, ikiwemo kupunguza kwa kiasi kikubwa na kuzuia mlundikano wa mashauri, kuendelea kusajili mashauri kwa njia ya mfumo wa pamoja na kusikiliza baadhi ya mashauri kwa njia ya mtandao.

Naye Mhasibu Mwandamizi Joyce Mulugu alieleza katika taarifa yake ya mapato na matumizi ya fedha kuwa katika mwaka wa fedha 2021/2022 zaidi ya millioni 793 za Kitanzania zilitengwa na kupitishwa kwa ajili ya matumizi kulingana na vipaumbele katika Mahakama hiyo.

Bi Mulugu amesema kuwa hadi kufikia Mei 2022 zaidi ya millioni 603 zimeshapokelewa kama fedha za matumizi ya kawaida na zimeshatumika kulingana na mpango kazi, ambapo kiasi hicho ni sawa na aslimia 76 ya bajeti nzima.

Kwa upande wake, Afisa Utumishi Tumaini Mwalyoga ameliambia Baraza alipokuwa akiwasilisha taarifa yake ya utawala na utumishi kuwa hakuna mtumishi mwenye shauri la nidhamu au aliyechukuliwa hatua za kinidhamu kwa kipindi cha mwaka wa fedha unaokaribia kumalizika.

Bi Mwalyoga ameahidi ofisi yake kutoa mafunzo ya ndani kwa watumishi au kuwa na programu za kubadilishana uzoefu pale itakapowezekana na pia watumishi watashiriki kwenye mikutano ya kitaaluma ili kuwajengea uwezo na kupata uzoefu kwenye taasisi zingine za Serikali.

Jaji Mfawidhi wa Mahakama Kuu ya Tanzania, Divisheni ya Makosa ya Rushwa na Uhujumu Uchumi, Mhe. Elinaza Luvanda akifafanua jambo katika kikao cha Baraza la Wafanyakazi la Mahakama hiyo kilichofanyika jana tarehe 27 Mei, 2022. 

Naibu Msajili wa Mahakama hiyo, Mhe. Magdalena Ntandu akiwasilisha taarifa yake.

Mtendaji wa Mahakama Kuu ya Tanzania Divisheni  ya Makosa ya Rushwa na Uhujumu Uchumi, Bi. Masalu Kisasila akielezea Mpango Mkakati wa Miaka Mitano wa Mahakama ya Tanzania.

Katibu wa TUGHE wa Mahakama ya Tanzania, Bw. Michael Masabo akieleza jambo kwenye kikao cha Baraza hilo.

Mtumishi wa Divisheni ya Makosa ya Rushwa na Uhujumu Uchumi ya Mahakama Kuu, Bi Mchawi Mwanansolo akieleza jambo.

Mhasibu Mwandamizi Joyce Mulugu akisisitiza jambo alipokuwa akiwasilisha taarifa yake ya mapato na matumizi ya fedha.

Afisa Utumishi Tumaini Mwalyoga  akiwasilisha taarifa ya ofisi yake kwenye kikao cha Baraza hilo.

Meza kuu ikiongozwa na Jaji Mfawidhi wa Mahakama Kuu ya Tanzania, Divisheni ya Makosa ya Rushwa na Uhujumu Uchumi, Mhe. Elinaza Luvanda ikifuatilia mijadala mbalimbali ya wajumbe wa Baraza. Kulia ni Katibu wa Baraza, Bi. Beatha Komba na kushoto ni Katibu Msaidizi Mbaraka Lukindo. 

Sehemu ya wajumbe wa Baraza la Wafanyakazi wakiwa kwenye kikao. 

Jaji Mfawidhi wa Mahakama Kuu ya Tanzania, Divisheni ya Makosa ya Rushwa na Uhujumu Uchumi, Mhe. Elinaza Luvanda (katikati) akiwa katika picha ya pamoja na wajumbe wa Baraza la Wafanyakazi.