GARI LA HAKIMU MULEBA LACHOMWA MOTO

 ·Mkuu wa Wilaya atangaza msako waliohusika

Na Ahmed Mbilinyi- Mahakama, Bukoba

Mkuu wa Wilaya ya Muleba Mkoa wa Kagera, Mhe. Toba Nguvila ameviagiza vyombo vya ulinzi na usalama katika Wilaya hiyo kuwakamata na kuwachukulia hatua za kisheria wote wanaodaiwa kuchoma moto gari la Hakimu wa Mahakama ya Mwanzo Nyamilanda wilayani humo, Mhe Emmanuel Sheiza nyumbani kwake.

Mhe. Nguvila alitoa agizo hilo jana tarehe 9Mei, 2022 alipotembelea eneo la tukio na baadaye kuongea na wanakijiji wa kitongoji cha Nyamilanda na kuelezea masikitiko yake makubwa. Tukio hilo limetokea usiku wa kuamkia jana ambapo watu wasiofahamika walichoma moto gari la Hakimu huyo.

Mkuu wa Wilaya huyo amesema, “Tayari tukio hili la kusikitisha limesharipotiwa katika vyombo vya ulinzi na usalama na uchunguzi unaendelea ili kuwakamata wahusika wote na hakuna hata mmoja atakayekwepa mkono wa chuma wa sheria.” Hakimu huyo anaishi kwenye nyumba za Mahakama zilizopo jirani na Mahakama ya Mwanzo      Nyamilanda.

Mhe Nguvila amemuhakikishia  Jaji Mfawidhi wa Mahakama Kuu ya Tanzania, Kanda ya Bukoba,  Mhe. Dkt Ntemi Kilekamajenga, ambaye aliambatana na viongozi wengine wa Mahakama kufika katika eneo la tukio ili kumpa pole Mhe Sheiza kwa janga hilo kuwa wote walihusika watapatikana na kuchukukiwa hatua kali.

Viongozi wengine wa Mahakama walioambatana na Mhe. Kilekamajenga walikuwa Msajili wa Mahakama Kuu wa Kanda hiyo, Mhe. Amoro Odira, Hakimu Mfawadhi wa Mahakama ya Hakimu Mkazi Bukoba, Mhe Janeth Massesa, Hakimu Mfawadhi wa Mahakama ya Wilaya Muleba, Mhe Asha Mwetindwa na Mtendaji wa Mahakama Kuu Kanda ya Bukoba, Bw. Lothan Simkoko.

Gari la Hakimu wa Mahakama ya Mwanzo Nyamilanda, Mhe Emmanuel Sheiza likiwa limeteketea kabisa kwa moto baada ya kuchomwa na watu wasiofahamika.

Hakimu wa Mahakama ya Mwanzo Nyamilanda, Mhe Emmanuel Sheiza (mwenye suti ya blue) akimuonyesha Jaji Mfawidhi wa Mahakama Kuu ya Tanzania, Kanda ya Bukoba,  Mhe. Dkt Ntemi Kilekamajenga jinsi tukio lilivyotokea.

Mwenyekiti wa Kamati ya Ulinzi na Usalama ambaye pia ni Mkuu wa Wilaya ya Muleba, Mhe Toba Nguvila (wa tatu kulia) akimpa pole Jaji Mfawidhi wa Mahakama Kuu ya Tanzania, Kanda ya Bukoba, Mhe Ntemi Kilekamajenga (katikati) kwa tukio hilo. Amemuhakikishia kuwa wahusika wote walioshiriki katika tukio hilo watakamatwa na kufikishwa kwenye vyombo vya sheria.

Mwenyekiti wa Kamati ya Ulinzi na Usalama ambaye pia ni Mkuu wa Wilaya ya Muleba, Mhe Toba Nguvila akiongea na wanakijiji wa Kitongoji cha Nyamilanda.