JAJI MKUU UGANDA AANZA ZIARA YA SIKU TATU YA MAHAKAMA TANZANIA

 ·Akutana na kuteta na mwenyeji wake Prof. Juma

Na. Faustine Kapama na Magreth Kinabo-Mahakama

Jaji Mkuu wa Uganda, Mhe. Alfonse Chigamoy Owiny-Dollo leo tarehe 24 Mei 2022 ameanza ziara ya siku tatu kuitembelea Mahakama ya Tanzania kwa lengo la kubadilishana uzoefu ambapo amekutana na Jaji Mkuu wa Tanzania, Mhe. Prof. Ibrahim Hamis Juma ofisini kwake jijini Dar es Salaam.

Wakiwa ofisini hapo, viongozi hao wamefanya mazungumzo mafupi yenye lengo la kujenga ushirikiano katika masuala mbalimbali ya kimahakama na yale yanayohusu vyuo kuiwezesha Mahakama ya Uganda kujifunza jinsi ya kuijengea uwezo Taasisi ya Mafunzo ya Mahakama nchini Uganda (JTI).

Mhe. Owiny-Dollo, ambaye ameambatana na ujumbe wa maafisa 12 kutoka nchini Uganda alisema kuwa wamekuja nchini Tanzania kupata maarifa na wanatumaini kujifunza mengi kutoka katika Chuo cha Uongozi wa Mahakama Lushoto (IJA) na pia kupata uelewa jinsi ya kuijengea uwezo wa Taasisi yao.

Kwa upande wake, Mhe. Prof. Juma alisema kuwa anashukuru kwa ugeni huo kwa  kuja nchini kwa sababu wamekuwa wakikutana Majaji Wakuu katika mikutano yao mbalimbali,  lakini hawajawahi kukutana kujadili kuhusu vyuo vyao vya uongozi na sheria ili kubadilishana uzoefu.

“Hivi karibuni tulikutana nchini Zimbabwe (majaji wakuu) kuzungumzia masuala ya matumizi ya teknolojia na nadhani hili ni eneo jipya tunalotakiwa kwenda nalo,” alisema Mhe. Prof. Juma ambaye aliambatana na Mwenyekiti wa Baraza la Uongozi wa Chuo na pia Jaji wa Mahakama ya Rufani, Mhe. Dkt. Gerald Ndika.

Jaji Mkuu wa Tanzania alibainisha kuwa tayari ameshakiagiza Chuo cha IJA kuandaa kozi za  kuwajengea uwezo maafisa wa Mahakama ili kuendana na kasi ya mabadiliko ya teknolojia.

"Nimekiomba chuo chetu kuangalia jinsi tunavyoweza kwenda kidigitali ili watusaidie katika eneo hili. Mahakama haiwezi kubaki nyuma katika masuala ya Teknolojia ya Habari na Mawasiliano (TEHAMA) kwa kuwa Dunia na Serikali inatumia teknolojia hiyo," alisema.

Jaji Mkuu aliueleza ujumbe kutoka Uganda kuwa Mahakama ya Tanzania imewashirikisha wadau wengine katika mnyororo wa utoaji haki katika safari hiyo ya mabadiliko. Aliwataja baadhi ya wadau hao kama Jeshi la Polisi, Ofisi ya Mwendesha Mashtaka wa Serikali(DPP), Jeshi la Magereza, Mwanasheria Mkuu wa Serikali (AG), Idara ya Uhamiaji, Ofisi ya Mkemia Mkuu wa Serikali, Chama cha Wanasheria Tanganyika(TLS) na wananchi.

Naye Mwenyekiti wa Baraza la Uongozi wa Chuo aliwakaribisha wageni hao Tanzania na katika Chuo cha IJA ambapo aliwaahidi kuwa wakiwa Lushoto watapata fursa ya kutembelea maeneo ya chuo na vivutio mbalimbali vilivyopo katika Wilaya ya Lushoto.

Viongozi wengine waandamizi walioambatana na Jaji Mkuu wa Tanzania katika kuwakaribisha wageni hao ni Mkuu wa Chuo cha IJA na Jaji wa Mahakama ya Rufani, Mhe. Paul Kihwelo, Jaji Kiongozi wa Mahakama Kuu ya Tanzania, Mhe. Mustapher Siyani na Msajili wa Mahakama ya Rufani, Mhe. Kevin Mhina.

Miongoni mwa viongozi walioambatana na Jaji Mkuu wa Uganda ni Jaji Kiongozi wa Mahakama Uganda, Dkt. Flavian Zeija, Msajili Mkuu wa Mahakama ya Uganda, Mwenyekiti wa Baraza la Uongozi wa JTI Uganda, Mkurugenzi Mtendaji wa Taasisi ya JTI Uganda, Msajili wa Taasisi ya JTI Uganda na viongozi wa Shirika la Kimataifa la Maendeleo ya Sheria Uganda (IDLO).

Katika ziara yake, Jaji Mkuu wa Uganda anatarajia pia kutembelea maeneno mbalimbali ya Chuo cha Uongozi wa Mahakama Lushoto (IJA) na vivutio mbalimbali vilivyopo katika Wilaya ya Lushoto.

Wakiwa IJA, wageni hao watapata fursa ya kubadilishana uzoefu na viongozi wa Chuo hicho ikiwemo namna kinavyofanya kazi. Ziara hiyo ni sehemu ya ushirikiano kati ya Mahakama ya Tanzania na Mahakama ya Uganda na ujirani mwema kati ya nchi hizi mbili.

Jaji Mkuu wa Uganda, Mhe. Alfonse Chigamoy Owiny-Dollo akipokelewa na mwenyeji wake, Jaji Mkuu wa Tanzania, Mhe. Prof. Ibrahim Hamis Juma alipowasili leo tarehe 24 Mei 2022 kuanza ziara ya siku tatu kuitembelea Mahakama ya Tanzania.

Jaji Mkuu wa Uganda, Mhe. Alfonse Chigamoy Owiny-Dollo akisalimiana na Jaji Kiongozi wa Mahakama Kuu ya Tanzania, Mhe. Mustapher Siyani.

Jaji Mkuu wa Tanzania, Mhe. Prof. Ibrahim Hamis Juma akisalimiana na Jaji Kiongozi wa Mahakama Uganda, Dkt. Flavian Zeija.

 Jaji Kiongozi wa Mahakama Kuu ya Tanzania, Mhe. Mustapher Siyani akisalimiana na Jaji Kiongozi wa Mahakama Uganda, Dkt. Flavian Zeija.

Mkuu wa Chuo cha IJA na Jaji wa Mahakama ya Rufani, Mhe. Paul Kihwelo na Jaji Kiongozi wa Mahakama Kuu ya Tanzania, Mhe. Mustapher Siyani wakiwa katika maongezi walipokuwa wakielekea ofisini kwa Jaji Mkuu wa Tanzania, Mhe. Prof. Ibrahim Hamis Juma.

Sehemu ya viongozi waandamizi wa Mahakama Uganda wakiongozwa na Jaji Mkuu, Mhe. Alfonse Chigamoy Owiny-Dollo (kulia) wakiwa katika ofisi ya Jaji Mkuu wa Tanzania, Mhe. Prof. Ibrahim Hamis Juma.

Sehemu ya viongozi waandamizi wa Mahakama ya Tanzania wakiongozwa na Mwenyekiti wa Baraza la Uongozi wa Chuo na pia Jaji wa Mahakama ya Rufani, Mhe. Dkt. Gerald Ndika (kushoto) wakiwa katika ofisi ya Jaji Mkuu wa Tanzania, Mhe. Prof. Ibrahim Hamis Juma.

Jaji Mkuu wa Uganda, Mhe. Alfonse Chigamoy Owiny-Dollo akisaini kitabu cha wageni.

Msajili Mkuu wa Mahakama ya Uganda, Bi. Sarah Langa Siu akitambulisha ujumbe ulioambatana na Jaji Mkuu wa Uganda katika ziara hiyo.

Mkuu wa Chuo cha IJA na Jaji wa Mahakama ya Rufani, Mhe. Paul Kihwelo akiwatambulisha maafisa wa Mahakama ya Tanzania mbele ya ujumbe ulioambatana na Jaji Mkuu wa Uganda kwenye ziara.

Mwenyekiti wa Baraza la Uongozi wa Chuo na pia Jaji wa Mahakama ya Rufani, Mhe. Dkt. Gerald Ndika akitoa neno la ukaribisho kwa wageni.

Jaji Mkuu wa Uganda, Mhe. Alfonse Chigamoy Owiny-Dollo akisisitiza jambo alipokuwa akitoa salamu kwa viongozi ndani ya ofisi ya Jaji Mkuu wa Tanzania.

Jaji Mkuu wa Tanzania, Mhe. Prof. Ibrahim Hamis Juma akizungumza na wageni wake.

Jaji Mkuu wa Tanzania, Mhe. Prof. Ibrahim Hamis Juma (kulia) akimkabidhi mwenyeji wake zawadi mbalimbali (picha ya juu na chini)

Jaji Mkuu wa Uganda, Mhe. Alfonse Chigamoy Owiny-Dollo (kushoto) alimkabidhi mwenyeji wake picha iliyochorwa (juu) na taarifa ya utendaji ya Jaji Mkuu Uganda (chini) kama zawadi.

Jaji Mkuu wa Uganda, Mhe. Alfonse Chigamoy Owiny-Dollo (kushoto) alimkabidhi mwenyeji wake jarida (juu) na bendera ya Taifa la Uganda (chini) kama zawadi.

Jaji Mkuu wa Tanzania, Mhe. Prof. Ibrahim Hamis Juma (kulia) akipokea zawadi ya fulana kutoka kwa mgeni wake.

Jaji Mkuu wa Uganda, Mhe. Alfonse Chigamoy Owiny-Dollo (kushoto) akiwa katika picha ya pamoja na mwenyeji wake, Jaji Mkuu wa Tanzania, Mhe. Prof. Ibrahim Hamis Juma. 

Jaji Mkuu wa Uganda, Mhe. Alfonse Chigamoy Owiny-Dollo (kushoto) na Jaji Mkuu wa Tanzania, Mhe. Prof. Ibrahim Hamis Juma (kulia) wakiwa katika picha ya pamoja na viongozi waandamizi wa Mahakama ya Tanzania na Uganda. 

Jaji Mkuu wa Uganda, Mhe. Alfonse Chigamoy Owiny-Dollo (kushoto) na Jaji Mkuu wa Tanzania, Mhe. Prof. Ibrahim Hamis Juma (kulia) wakiwa katika picha ya pamoja na viongozi waandamizi na watumishi wengine wa Mahakama ya Tanzania na Uganda.