IJA YAWANOA WATUMISHI WA MAHAKAMA USIKILIZAJI MASHAURI YA RUSHWA NA UHUJUMU UCHUMI

Na Evelina Odemba – Mahakama,  Morogoro

Kaimu Jaji Mfawidhi wa Mahakama Kuu ya Tanzania, Kanda ya Morogoro, Mhe. Messe Chaba leo tarehe 23 Mei, 2022 amefungua mafunzo kuhusu usikilizaji wa mashauri yatokanayo na makosa ya rushwa na uhujumu uchumi yanayowaleta pamoja watumishi wa kada ya Kumbukumbu na TEHAMA kutoka katika Mahakama mbalimbali chini Tanzania.

Katika hafla fupi ya ufunguzi huo, Mhe. Chaba ameelezea imani ya Mahakama kuwa wote watakaopatiwa mafunzo hayo yanayoratibiwa na Chuo cha Uongozi wa Mahakama Tanzania (IJA) kwa ufadhili wa Serikali ya Uingeleza watakuwa chachu kwa wengine ili kuleta mabadiriko chanya kwenye utendaji kazi.

“Mtakapomaliza mafunzo haya mkawe chachu kwa wengine ili kuongeza imani ya wananchi juu ya uendeshwaji wa shughuli za Mahakama” alisema. Mafunzo hayo ya siku tatu yanayofanyika katika ukumbi uliopo ndani ya jengo la Kituo Jumuishi cha Utoaji Haki – Morogoro yanatarajiwa kumalizika tarehe 25 Mei, 2022.

Akisoma taarifa fupi kabla ya ufunguzi, Mkurugenzi Msaidizi wa Utawala wa Mahakama ya Tanzania. Bw. Stephen Magoha alisema kuwa mafunzo hayo yanamanufaa makubwa kwani yatawasaidia watumishi  kutumia muda mfupi katika usikilizaji wa mashauri  na kujifunza namna ya urejeshaji mali zinazotokana na makosa ya rushwa.

Aliongeza, “Mbali na kuwaongezea uelewa wa uendeshaji wa mashauri ya rushwa, ni matarajio yetu kuwa nyinyi mtaenda kuwa walimu wazuri kwa maafisa wengine wa Mahakama ambao hawajafanikiwa kupata fursa ya kuhudhuria mafunzo haya.”

 Kaimu Jaji Mfawidhi wa Mahakama Kuu ya Tanzania, Kanda ya Morogoro, Mhe. Messe Chaba akifungua mafunzo kuhusu usikilizaji wa mashauri yatokanayo na makosa ya rushwa na uhujumu uchumi.

Kaimu Jaji Mfawidhi wa Mahakama Kuu ya Tanzania, Kanda ya Morogoro, Mhe Messe Chaba (katikati), Naibu Msajili wa Mahakama Kuu ya Tanzania, Kanda ya Morogoro, Mhe.  Sylvester Kahinda (kushoto) na Mkurugenzi wa Mafunzo  Stephen Magoha (kulia) wakifuatilia wakati wa uzinduzi wa mafunzo hayo. 

Kaimu Jaji Mfawidhi wa Mahakama Kuu ya Tanzania, Kanda ya Morogoro, Mhe Messe Chaba (katikati) akiwa katika picha ya pamoja na wawezeshaji wa mafunzo ( waliosimama nyuma). Wengine waliokaa ni Naibu Msajili wa Mahakama Kuu ya Tanzania, Kanda ya Morogoro, Mhe.  Sylvester Kahinda ( wa pili kushoto) na Dkt Yustin Bangi (kushoto), Mkurugenzi wa Mafunzo  Stephen Magoha (wa pili kulia) akifuatiwa na Mtendaji wa Mahakama Kuu, Kanda ya Morogoro, Bw. Ahmed Ng'eni.

Meza kuu ikiongozwa na Kaimu Jaji Mfawidhi wa Mahakama Kuu ya Tanzania, Kanda ya Morogoro, Mhe Messe Chaba (katikati) ikiwa katika picha ya pamoja na watumishi wa Mahakama waliohudhulia mafunzo( waliosimama nyuma).

Kaimu Jaji Mfawidhi wa Mahakama Kuu ya Tanzania, Kanda ya Morogoro, Mhe Messe Chaba (katikati) pamoja na viongozi wengine wa meza kuu wakiwa katika picha ya pamoja na wajumbe wa sekretarieti wa mafunzo ( waliosimama nyuma). 

Watumishi wa Mahakama (juu na chini) wakifuatilia mada mbalimbali zilizokuwa zikiwasilishwa kwenye mafunzo hayo.