WAZIRI KATIBA NA SHERIA AIMIMINIA SIFA MAHAKAMA UBORESHAJI WA HUDUMA UTOAJI HAKI

 ·Awaomba wananchi wasilalamikie kasi usikilizaji mashauri

Na. Faustine Kapama-Mahakama

Waziri wa Katiba na Sheria, Mhe. Dkt. Damas Ndumbaro leo tarehe 23 Mei, 2022 amemtembelea Jaji Mkuu wa Tanzania, Mhe. Prof. Ibrahim Hamis Juma ofisini kwake jijini Dar es Salaam na kufanya naye mazungumzo mafupi ambapo ameipongeza Mahakama ya Tanzania kwa uboreshaji mkubwa wa utoaji huduma za haki kwa  wananchi.

Akiongea na waandishi wa habari baada ya mazungumzo hayo, Mhe. Dkt. Ndumbaro amesema kuwa uboreshaji wa miundombinu ya Mahakama, ikiwemo mifumo mbalimbali na majengo umesaidia kuchochea utoaji wa haki kwa wananchi kwa wakati ambapo ameshuhudia ujenzi wa Vituo Jumuishi vya Utoaji Haki, utunzaji mzuri wa kumbukumbu na nyaraka na pia utoaji wa huduma kwa njia za kidijitali.

“Kwa yule anayeijua Mahakama jinsi ilivyokuwa kabla ya uboreshaji huu atagundua kuna hatua kubwa imefanyika. Walioanzisha uboreshaji huu wanastahili pongezi. Labda niwakumbushe kuwa Katibu Mkuu Kiongozi wa sasa, Balozi Hussein Katanga ndiye aliyekuwa Mtendaji Mkuu wa kwanza wa Mahakama na ndiye aliyeanzisha uboreshaji huu. Amefanya kazi kubwa ambayo imeendelezwa na wale waliomfuatia. Kusema kweli, Mahakama inastahili pongezi,” amesema.

Mhe. Dkt. Ndumbaro amebainisha pia kwa sehemu ya uboreshaji wa miundombinu ya Mahakama unaenda sambamba na kuhakikisha mashauri yaliyopo mahakamani yanasikilizwa ndani ya muda mfupi iwezekenavyo. “Kama ambavyo wanasema, haki iliyocheleweshwa ni haki iliyodhurumika. Kwa hiyo, tusicheleweshe haki na Mahakama imeshafanya hivyo na inaendelea kufanya,” amesema.

Kwa mujibu wa Waziri huyo, kwa sasa shauri katika Mahakama ya Mwanzo linatakiwa kuisha ndani ya miezi sita, katika Mahakama ya Wilaya na Hakimu Mkazi shauri lazima liishe ndani ya miezi 12 na katika Mahakama Kuu isizidi miaka miwili, hivyo amesema hata kama mashauri hayo yakiisha ndani ya siku moja hicho ndicho kinachotakiwa.

“Ile habari ya kesi kukaa mahakamani miaka 10 imeisha sasa kwa sababu mtu ambaye anakwenda mahakamani anadai haki, tunapomchelewesha tunachelewesha haki yake. Kwa hiyo, niwaombe wananchi tusilalamike kwamba usikilizaji wa kesi unakwenda haraka sana, tuiunge mkono Mahakama kwa hili ili anayedai haki aipate ndani ya muda mfupi kadri inavyowezekana,” amesema.

Akizungumzia kilichojiri kwenye mazungumzo yao, Mhe. Dkt. Ndumbaro amefurahi kupata fursa ya kuitembelea rasmi Mahakama ya Tanzania akiwa Waziri wa Katiba na Sheria na kukutana na Jaji Mkuu wa Tanzania, ambaye amemweleza jinsi gani Mahakama imefanya kwenye uboreshaji katika utoaji haki, katika kuwafikia wananchi na katika kupata mrejesho kutoka kwa wananchi.

“Amenithibitishia kwamba kasi ya uboreshaji wa huduma za utoaji haki inaendelea kwa kasi kubwa ili kuhakikisha sio tu haki inatendeka lakini pia ionekane inatendeka. Amenihakikishia kuwa Mahakama kama Mhimili ambao upo huru kwa mujibu wa Katiba ya Jamhuri ya Muungano wa Tanzania, utaendelea kutoa ushirikiano  katika mambo ya kisera kwa Wizara ya Katiba na Sheria,” amesema.

Waziri wa Katiba na Sheria, Mhe. Dkt. Damas Ndumbaro akiwasili katika ofisi ya Jaji Mkuu wa Tanzania, Mhe. Prof. Ibrahim Hamis Juma jijini Dar es Salaam alipomtembelea leo tarehe 23 Mei, 2022.

Waziri wa Katiba na Sheria, Mhe. Dkt. Damas Ndumbaro akisubiri kuonana na Jaji Mkuu wa Tanzania, Mhe. Prof. Ibrahim Hamis Juma.

Waziri wa Katiba na Sheria, Mhe. Dkt. Damas Ndumbaro (kushoto) akipokelewa na Jaji Mkuu wa Tanzania, Mhe. Prof. Ibrahim Hamis Juma.

Waziri wa Katiba na Sheria, Mhe. Dkt. Damas Ndumbaro (kushoto) akisaini kitabu cha wageni huku Jaji Mkuu wa Tanzania, Mhe. Prof. Ibrahim Hamis Juma akishuhudia tukio hilo.

Waziri wa Katiba na Sheria, Mhe. Dkt. Damas Ndumbaro (kulia) akifurahia jambo na mwenyeji wake.

Waziri wa Katiba na Sheria, Mhe. Dkt. Damas Ndumbaro (kulia) akiwa katika picha ya pamoja na mwenyeji wake baada ya mazungumzo.