JAJI MKUU UGANDA ATEMBELEA CHUO CHA UONGOZI WA MAHAKAMA LUSHOTO

Na. Faustine Kapama-Mahakama, Lushoto

Ziara ya Jaji Mkuu wa Uganda, Mhe. Alfonse Chigamoy Owiny-Dollo imengia siku ya pili ambapo leo tarehe 25 Mei 2022 ametembelea Chuo cha Uongozi wa Mahakama Lushoto (IJA) na kupokelewa na mwenyeji wake, Mkuu wa Chuo na Jaji wa Mahakama ya Rufani, Mhe. Paul Kihwelo.

Akiwa chuoni hapo, Mhe. Owiny-Dollo alipitishwa katika maeneno mbalimbali, ikiwemo ofisi kadhaa, vyumba vya madarasa, Maktaba iliyosheheni vitabu mbalimbali na kwenye mabweni ya wanafunzi. Jaji Mkuu huyo pia alijionea jengo jipya la kisasa ambalo mara litakapokamilika litatumiwa na wavulana.

Katika moja ya vyumba vya madarasa alivyotembelea alikuta wanafunzi wakiendelea na masomo na kuwahimiza kusoma kwa bidii ili waweze kufanikiwa katika mipango yao ambayo wamejiwekea katika maisha.

Baadaye alipanda mti katika moja ya maeneo ya chuo hicho kama kumbukumbu ya ujio wake kabla ya kushiriki kwenye kipindi maalumu kilichokuwa kimeandaliwa kwa lengo la kubadilishana uzoefu wa namna ya kuendesha vyuo vya Mahakama, hatua itakayosaidia kuiwezesha Mahakama ya Uganda kujifunza jinsi ya kuijengea uwezo Taasisi ya Mafunzo ya Mahakama nchini Uganda (JTI).

Mhe. Owiny-Dollo, ambaye ameambatana na ujumbe wa maafisa 12 kutoka nchini Uganda alisema kuwa wamekuja nchini Tanzania kupata maarifa na wanatumaini kujifunza mengi kutoka katika Chuo cha Uongozi wa Mahakama Lushoto (IJA) na pia kupata uelewa jinsi ya kuijengea uwezo wa Taasisi yao.

Akieleza kwa ufupi historia ya chuo hicho, Mhe. Kihwelo alisema kuwa hadi miaka ya 1970, ardhi ilikuwa inamilikiwa na Bw. Ernest Smith na ilitumiwa kwa shughuli za shule za awali za watoto wadogo wa Kiingereza. Baadaye ardhi hiyo iliuzwa kwa Shirika la Wamisionari wa Romani Katoliki, yaani Baraza la Maaskofu Tanzania (TEC) ambao baadaye waliikabidhi kwa Serikali.

Aliwaeleza wageni hao kuwa Serikali ilitumia eneo hilo kama Kituo cha Mafunzo Vijijini hadi 1974 na mwaka huo wa 1974, Serikali ilikabidhi ardhi hiyo kwa chama tawala wakati huo, TANU, ambao waliamua kukitumia kama chuo cha masuala ya itikadi.

Kwa mujibu wa Mhe. Kihwelo, mwaka 1992 mazungumzo yalianza kati ya Serikali na chama tawala juu ya uwezekano wa kuandaa taasisi ya mafunzo ya Mahakama katika majengo ya sasa, ambapo tarehe 30 Desemba, 1992 chama tawala kilisalimisha ardhi hiyo kwa Serikali na kisha kukabidhiwa kwa Mahakama ya Tanzania Februari 1993.

 “Chuo cha IJA kilianzishwa kwa Sheria ya Bunge, Sheria Namba 3 ya 1998. Kilianza kazi yake tarehe 23 Oktoba, 2000 na kilikuwa kinatoa Cheti na Diploma ya Kozi za Sheria. Uzinduzi rasmi ulifanywa na Rais Benjamin Mkapa tarehe 3 Agosti 2001,” alisema.

Mkuu wa Chuo huyo alitaja baadhi ya kazi za IJA kuwa ni kuendelea na elimu ya Mahakama na sheria, masomo ya sheria, utafiti wa kimahakama, ushauri, kutoa mafunzo kwa mawakili wapya walioajiriwa katika sekta za umma na wanaowania Udalali wa Mahakama na Wasambaza Nyaraka.

Awali, Mwenyekiti wa Baraza la Uongozi wa Chuo na Jaji wa Mahakama ya Rufani, Mhe. Dkt. Gerald Ndika aliwakaribisha wageni hao katika Chuo cha IJA ambapo alielezea furaha yake kwa kupata ugeni huo wa Jaji Mkuu kutoka Uganda ulioambatana na ujumbe mzito. Alisema kuwa kukutana kwao ni fursa muhimu watakayoitumia kujifunza mambo mbalimbali, kubadilishana uzoefu jinsi vyuo vyao vya Mahakama vinavyofanya kazi.

Miongoni mwa viongozi walioambatana na Jaji Mkuu wa Uganda ni Jaji Kiongozi wa Uganda, Dkt. Flavian Zeija, Msajili Mkuu wa Mahakama ya Uganda, Mhe. Sarah Langa Siu, Mkurugenzi Mtendaji wa Taasisi ya JTI Uganda, Mhe. Damilie Lwanga, Msajili wa Taasisi ya JTI Uganda, Mhe. Moses  Angualia na viongozi wa Shirika la Kimataifa la Maendeleo ya Sheria Uganda (IDLO).

Ziara hiyo ni sehemu ya ushirikiano kati ya Mahakama ya Tanzania na Mahakama ya Uganda na ujirani mwema kati ya nchi hizi mbili.

 Jaji Mkuu wa Uganda, Mhe. Alfonse Chigamoy Owiny-Dollo akiwasili katika Chuo cha Uongozi wa Mahakama Lushoto (IJA) leo tarehe 25 Mei 2022. 

Jaji wa Mahakama Kuu ya Tanzania, Kanda ya Tanga, Mhe. Dkt. Ubena Agatho akisalimiana na Jaji Mkuu wa Uganda, Mhe. Alfonse Chigamoy Owiny-Dollo.

Jaji Mkuu wa Uganda, Mhe. Alfonse Chigamoy Owiny-Dollo akizungumza na baadhi ya Mahakimu Wakazi kutoka katika Mahakama ya Wilaya Lushoto walioshiriki katika mapokezi yake.

Jaji Mkuu wa Uganda, Mhe. Alfonse Chigamoy Owiny-Dollo akisaini kitabu cha wageni ofisini kwa Mkuu wa Chuo cha IJA.

Mwenyekiti wa Baraza la Uongozi wa Chuo cha IJA na Jaji wa Mahakama ya Rufani, Mhe. Dkt. Gerald Ndika (kushoto) na Mkuu wa Chuo hicho ambaye pia ni Jaji wa Mahakama ya Rufani, Mhe. Dkt. Paul Kihwelo wakiwaongoza wageni wao kutembelea maeneo mbalimbali. 

Jaji Mkuu wa Uganda, Mhe. Alfonse Chigamoy Owiny-Dollo akiwa ndani ya Maktaba ya chuo.

Jaji Mkuu wa Uganda, Mhe. Alfonse Chigamoy Owiny-Dollo akipanda mti katika moja ya maeneo ya chuo hicho.

Sehemu ya mandhali ya chuo cha IJA (juu na chini). 

Mkuu wa Chuo hicho ambaye pia ni Jaji wa Mahakama ya Rufani, Mhe. Dkt. Paul Kihwelo (aliyenyosha mkono) akielezea namna bweni jipya la wavulana lilivyojengwa. 

Ujumbe kutoka Uganda na viongozi mbalimbali wa Mahakama ya Tanzania wakiangalia bweni linalotumiwa na wasichana katika chuo hicho.

Jaji Mkuu wa Uganda, Mhe. Alfonse Chigamoy Owiny-Dollo (katikati) akiongea na wanafunzi wa chuo cha IJA (hawapo katika picha). Kulia ni Jaji Kiongozi wa Uganda, Dkt. Flavian Zeija na kushoto ni Mwenyekiti wa Baraza la Uongozi wa Chuo cha IJA na Jaji wa Mahakama ya Rufani, Mhe. Dkt. Gerald Ndika.

Jaji Mkuu wa Uganda, Mhe. Alfonse Chigamoy Owiny-Dollo (waliosimama kulia) akiwa katika picha ya pamoja na wanafunzi wa chuo cha IJA. Kushoto ni Mwenyekiti wa Baraza la Uongozi wa Chuo cha IJA na Jaji wa Mahakama ya Rufani, Mhe. Dkt. Gerald Ndika.