MAHAKAMA YASHIRIKI SHEREHE ZA MEI MOSI

 Na Faustine Kapama-Mahakama, Dodoma

Mahakama ya Tanzania leo tarehe 1 Mei, 2022 imeungana na Watanzania kote nchini kusherekea siku ya wafanyakazi duniani, maarufu kama Mei Mosi.

Sherehe hizo ambazo zimefanyika kitaifa jijini Dodoma ambayo ni Makao Makuu ya Tanzania zimehudhuriwa na viongozi mbalimbali, hususani Rais wa Jamhuri ya Muungano wa Tanzania, Mhe. Samia Suluhu Hassan ambaye alikuwa mgeni rasmi.

Viongozi wengine wa kitaifa waliohudhuria sherehe hizo ni Makamu wa Rais wa Jamhuri ya Muungano wa Tanzania, Mhe. Philip Mpango na Waziri Mkuu wa Jamhuri ya Muungano wa Tanzania, Mhe Kassim Majaliwa.

Kwenye orodha hiyo alikuwepo pia Spika wa Bunge la Jamhuri ya Muungano wa Tanzania, Mhe. Dkt. Tulia Ackson, ambapo Jaji Mkuu wa Tanzania, Mhe. Prof. Ibrahim Hamis Juma aliwakilishwa na Jaji wa Mahakama Kuu ya Tanzania, Kanda ya Dodoma, Mhe Dkt Adam Mambi.

Akihutubia maelfu ya wananchi waliofurika katika Uwanja wa Jamhuri jijini hapa, Rais Samia ameahidi kuimarisha  maslahi ya wafanyakazi nchini.

Amesema kwa kuwa alishatoa ahadi mwaka jana kuhusu suala hilo ameagiza kufanyika kwa majadiliano ya kuimarisha maslahi ya wafanyakazi kati ya Shirikisho la Wafanyakazi (TUCTA) na Serikali ili kujua kiwango kinachohitajika.

“Ninakubaliana nanyi kabisa kwamba viwango vya sasa vya mshahara havikidhi mahitaji ya mfanyakazi pamoja na familia yake, hususani nyakati kama hizi ambapo gharama za maisha zimepanda,” alisema Mhe. Samia.

Aidha, Rais Samia amebainisha kuwa Serikali imeshaunda bodi za kima cha chini cha mshahara kwa sekta zote na tayari zimeanza kufanya tathmini ili kufanya uboreshaji wa kima cha chini cha mshahara kilichopo sasa, hivyo ameziagiza Wizara zinazohusika kuhakikisha bodi zinawezeshwa ili kufanikisha jambo hilo.

Watumishi wa Mahakama ya Tanzania wakianza kuandamana.

Rais wa Jamhuri ya Muungano wa Tanzania, Mhe. Samia Suluhu Hassan akiwa jukwaani na meza kuu wakati wa sherehe za Mei Mosi.

Watumishi wa Mahakama ya Tanzania (juu na chini) wakiandamana.

Watumishi wa Mahakama ya Tanzania (juu na chini) wakiwa katika Uwanja wa Jamhuri baada ya maandamano.

Sehemu ya Watumishi wa Mahakama ya Tanzania (juu na chini) wakijiandaa kuandamana.