MTENDAJI MKUU WA MAHAKAMA APONGEZA UTENDAJI KAZI KANDA YA MUSOMA

Na Francisca Swai-Mahakama, Musoma.

Mtendaji Mkuu wa Mahakama ya Tanzania, Prof. Elisante Ole Gabriel jana  tarehe 10 Mei, 2022 alifanya ziara ya kikazi ya siku moja ya Mahakama Kanda ya Musoma na kuwapongeza watumishi kwa utandaji kazi bora katika kutekeleza majukumu mbalimbali.

Katika ziara yake, Prof. Ole Gabriel alikagua miradi ya ujenzi unaoendelea wa Mahakama za Wilaya Rorya na Butiama ambayo ipo chini ya Mkandarasi United Builders Limited na Mshauri HY Projects Consultant Limited na kuhimiza kasi ya utekelezaji wa miradi hiyo pamoja na kupongeza ubora wa kazi inayoendelea.

Mtendaji Mkuu hakuridhishwa na kasi ya ujenzi wa miradi hiyo iliyotakiwa kukamilika tangu tarehe 12 Aprili, 2022, hivyo aliumsisitiza Mkandarasi kuongeza nguvu kazi pamoja na usimamizi ili miradi hiyo iwe imekamilika kufikia mwishoni mwa mwezi Mei 2022.

Baada ya ukaguzi wa miradi hiyo,  Mtendaji Mkuu alipata nafasi ya kukagua jengo la Mahakama Kuu Musoma pamoja na kuongea na viongozi na watumishi wa Mahakama hiyo, Mahakama ya Hakimu Mkazi Musoma, Mahakama ya Wilaya na Mahakama ya Mwanzo Musoma Mjini katika ukumbi wa wazi wa Mahakama Kuu Musoma (Open Court).

Katika kikao na watumishi hao, Prof. Ole Gabriel aliwapongeza watumishi wa Kanda ya Musoma kwa utendaji kazi wao mzuri ambao aliuelezea kuwa ni wa kuigwa pamoja na jitihada wanazofanya kulitunza jengo la Mahakama Kuu na mazingira yake kwa ujumla.

Aidha, Mtendaji Mkuu huyo aliahidi kushughulikia changamoto mbalimbali zilizowasilishwa kwake na uongozi wa Kanda ya Musoma pamoja na watumishi zikiwemo, ujenzi wa uzio wa Mahakama ya Mwanzo Robanda, ujenzi wa Kanteeni kwa ajili ya huduma ya chakula kwa watumishi, wadau na wateja wa Mahakama Kuu Musoma na upatikanaji wa gari la ziada kwa ajili ya shughuli za kiofisi pamoja na basi la watumishi.

Prof. Ole Gabriel aliwaasa watumishi kupendana na kuzipenda kazi zao, kujiendeleza kitaaluma ikiwezekana kupanua wigo nje ya taaluma zao za sasa.

Naye Jaji Mfawidhi wa Mahakama Kuu ya Tanzania, Kanda ya Musoma, Mhe. Fahamu Mtulya amemshukuru Mtendaji Mkuu kwa ujio wake katika Kanda hiyo na kumhakikishia kuwa maelekezo  aliyoyatoa yanayotekelezeka yatafanyiwa kazi.

Kaimu Mtendaji Kanda ya Musoma Bi, Alicia Felician (katikati) akielezea jambo wakati wa ukaguzi wa jengo na mazingira ya Mahakama Kuu Musoma.

Afisa TEHAMA Kanda ya Musoma Bw. Simon Lyova (mwenye tai nyeusi) akielezea jambo kwa Mtendaji Mkuu wa Mahakama ya Tanzania, Prof. Elisante Ole Gabriel wakati wa ukaguzi wa mifumo ya TEHAMA inayotumika katika jengo la Mahakama Kuu Musoma.

Mtendaji Mkuu wa Mahakama ya Tanzania, Prof. Elisante Ole Gabriel akishauriana jambo na Mhandisi wa mradi wa ujenzi wa Mahakama ya Wilaya Rorya, Eng. Pius Mallya kuhusu mpango kazi wa ujenzi wa Mahakama ya Wilaya Rorya.

Mtendaji Mkuu wa Mahakama ya Tanzania, Prof. Elisante Ole Gabriel akielekeza jambo kwa Mhandisi wa mradi wa ujenzi wa Mahakama ya Wilaya Rorya baada ya ukaguzi wa mradi huo.

Mtendaji Mkuu wa Mahakama ya Tanzania, Prof. Elisante Ole Gabriel akikagua ubora wa mchanga unaotumika katika upigaji lipu kwenye jengo la Mahakama ya Wilaya Butiama.

Mtendaji Mkuu wa Mahakama ya Tanzania, Prof. Elisante Ole akiongea na wasimamizi wa mradi wa ujenzi wa Mahakama ya Wilaya Butiama wakati wa ukaguzi wa maendeleo ya ujenzi wa mradi huo.

Mtendaji Mkuu wa Mahakama ya Tanzania, Prof. Elisante Ole Gabriel akiongea na watumishi wa Kanda ya Musoma wakati wa ziara yake katika Kanda hiyo.

Mtendaji Mkuu wa Mahakama ya Tanzania, Prof. Elisante Ole Gabriel akiongea na wananchi wanaosubiri kupata huduma mbalimbali wakati wa ziara yake Mahakama Kuu Musoma.

Mtendaji Mkuu wa Mahakama ya Tanzania, Prof. Elisante Ole Gabriel (wa pili kushoto waliokaa) akiwa katika picha ya pamoja na viongozi na watumishi wa Mahakama Kanda ya Musoma.