MAHAKAMA SPORTS MPIRA WA MIGUU YAUPIGA MWINGI IKIWATOA JASHO VINGUNGUTI VETERAN

Na Faustine Kapama-Mahakama

Timu ya mpira wa miguu ya Mahakama Sports Ijumaa tarehe 24 Juni, 2022 ilitoshana nguvu na Timu ya Vingunguti Veteran baada ya kutoka sale ya 2-2 katika mechi nzuri ya kirafiki iliyochezwa kwenye Viwanja vya Shule ya Sheria kwa Vitendo (Law school) iliyoko Mikocheni jijini Dar es Salaam.

Mchezo huo uliochezwa kuanzia majira ya 10:20 jioni ulianza kwa kasi na iliwachukua dakika ya 16 tu katika kipindi cha kwanza kwa Mahakama Sports kupachika bao zuri kupitia mshambuliaji wake hatari Gulam Katwila baada ya kupokea pasi safi kutoka kwa mshambuliaji machachari King's Chilemba Hassan Chikawe.

Kupatikana kwa bao hilo kuliamsha ari ya wachezaji wa Mahakama Sports ambao walilisakama lango la wapinzani wao Vingunguti Veteran mara kwa mara ambapo kulikuwepo na kusa kosa za hapa na pale.

Hata hivyo, Vingunguti Veteran walijibu mashambulizi katika dakika ya 31 na kufanikiwa kupata bao, hivyo kuufanya ubao wa matokeo kusomeka 1-1. Hadi kipindi cha kwanza kwa dakika 45 kinamalizika timu zote zilienda kwenye mapumziko zikiwa nguvu sawa.

Mchezo katika kipindi cha pili ulianza kwa timu zote kushambuliana kwa zamu ambapo katika dakika ya 73 Mahakama Sports ikafanikiwa kupachika bao la pili lililofungwa kwa shuti kali na Mshambuliaji machachari Chilemba Hassan Chikawe (King's Chikawe) baada ya kupokea pasi murua kutoka kwa mlinzi wa kushoto Chentro.

Hata hivyo, baada ya kosa kosa za hapa na pale kutoka timu zote mbili, Vingunguti Veteran walipata bahati ya kusawazisha goli hilo majira ya jioooni kabisa katika dakika 87 ya kipindi cha pili. Hadi mpira unamalizika Mahakama 2 na Vingunguti Veteran 2.

Alizungumza baada ya mchezo huo, Kocha wa Mahakama Sports Spear Mbwembwe amewapongeza vijana wake kwa mchezo mzuri waliouonyesha katika vipindi vyote na ameridhishwa na matokeao hayo kwa kuzingatia ugumu na uzoefu wa timu waliyocheza nayo.

“Hii ilikuwa ni mechi safi, nzuri na muhimu sana kwetu, ni mechi ya kujipima na kujiweka sawa. Kwani Timu tuliyocheza nayo ni Timu nzuri yenye uwezo mkubwa kisoka. Vingunguti Veteran ina wachezaji wazuri wanaojua mpira, ni wazoefu na wenye pasi za uhakika, ni wachezaji wenye kasi sana hasa katika ushambuliaji,” amesema.

Kwa upande wake Mwenyekiti wa Mahakama Sports Wilson Dede ameshukuru kwa timu yake kupata matokeo hayo na ameona uwezo wa timu yake, ipo vizuri na inazidi kuimarika kwa kiasi kinachoridhisha. Amesema bado wanaendelea na mazoezi ya kujinoa zaidi wakiwa chini ya kocha mzoefu na mahiri Spear Dunia Mbwembwe ambaye ni kocha mchezaji,  aliyekuwa golkipa wa zamani wa Timu ya Simba Sports Club.

“Tunawaomba wanamichezo wote na watumishi wengine wa Mahakama Mikoa yote, wajitokeze na kushiriki kufanya mazoezi ya pamoja kwa nia ya dhati ya kuendeleza michezo ndani ya Mahakama, tuwe na nia ya kuimarisha timu yetu pamoja na kuimarisha afya zetu,”amesema.

Katika mechi hiyo wachezaji wa Mahakama Sports walikuwa Shaibu Hassan Kanyochole, Chentro, Msimbe Banzi, Saidi Albea, Jamali Mkumba, Victor, Ismail Lulambo, Gulam Katwila, Chilemba Hassan Chikawe,Mohamed Pazi, Mohamed Shabani Ugomba na Charles Mwakapimba, huku benchi la ufundi liliongozwa na Romwan Adam (Roma), Mariam Mayala na Jamila.

Wachezaji wa Timu ya mpira wa miguu ya Mahakama Sports wakiwa katika picha za pamoja baada ya mchezo na Vingunguti Veteran.