TANROAD FC WATELEKEZA MITAMBO SHINYANGA

 ·Ni baada ya kuzabwa mabao 3-1 na Mahakama Sports Club

Na. Mwandishi wetu –Mahakama

Timu ya mpira wa miguu ya Mahakama Sports Club Shinyanga jana tarehe 12 Juni, 2022 iligeuka kuwa kaa la moto baada ya kuwasambaratisha Shinyanga Tanroad fc kwa ushindi wa mabao 3-1 kwenye mchezo wa kirafiki uliofanyika katika viwanja vya Tanroad Shinyanga.

Kabumbu hiyo ambayo ilichezwa kuanzia majira ya saa 10.00 jioni ilianza kwa kasi huku timu zote mbili zikionyesha kukamiana ambapo katika dakika za mwanzo mwanzo kulikuwepo na kosa kosa za hapa na pale.

Hata hivyo, Mahakama Sports Club Shinyanga ilianza kuonyesha makali yake katika dakika ya 35 ya mchezo mara baada ya Kiungo Punda Mshambuliaji wake hatari Frank Obadia kupachika bao safi kufuatia pasi mpenyezo kutoka winga ya kulia.

Hadi timu zote mbili zinaenda mapumziko (half time) ilikuwa  Mahakama Sports Club Shinyanga iliyokuwa mbele kwa bao 1-0 dhidi ya wapinzani wao Shinyanga Tanroad fc.

Mchezo katika kipindi cha pili pia ulianza kwa kasi huku Mahakama Sports Club Shinyanga wakiendelea kulisakama lango la Shinyanga Tanroad fc na katika dakika ya 50 wakafanikiwa kupata bao la pili kupitia kwa Nahodha wao Benidicto Mtewa, ambaye ni beki wa pembeni.

Kufungwa kwa bao hilo kuliendeleza mashambulizi na kama washambuliaji wa Mahakama Sports Club Shinyanga wangekuwa makini wangeweza kupachika mabao mengi zaidi. Hata hivyo, katika dakika ya 66 Mshambuliaji hatari Patrick Mluge akafanikiwa kupachika bao la tatu baada ya kupokea pasi murua kutoka kwa kiungo maeneo ya katikati ya uwanja.

Shinyanga Tanroad fc wakazinduka majira ya jioni na ilipofika dakika ya 86 ya mchezo wakafanikiwa kupata goli la kufutia machozi kupitia mchezaji wao Mudrika Changulu baada ya wachezaji wa Mahakama Sports Club Shinyanga kujiamini kupita kiasi kwa vile muda wa mchezo huo ulikuwa ukifikia ukingoni.

Hadi mechi inamalizika kwa dakika zote 90, ubao wa matangazo ulikuwa ukisomeka Mahakama Sports Club Shinyanga 3 huku Shinyanga Tanroad fc 1.

Akizungumza kufuatia matokeao hayo, Mwenyekiti wa Timu ya Mahakama ya Tanzania (Mahakama Sports) Wilson Dede amesema ushindi huo ni ishara nzuri ya maandalizi kuelekea mashindano ya Shimiwi yanayotarajia kufanyika hivi karibuni. Amesema Mahakama Sports imedhamiria kuchukua vikombe vingi zaidi kwenye mashindano hayo, ikiwemo kwenye mchezo wa mpira wa miguu.

Kocha wa Mahakama Sports Club Shinyanga na Mwenyekiti wa Michezo Shinyanga) Abdulmuumin Mbaraka (mwenye tracksuit) akiwapongeza wachezaji wake baada ya kuibuka washindi kwa mabao 3-1 dhidi ya Shinyanga Tanroad fc 1.